Rejwarka mólby wustaja
Na mejemjetanje
Malešecy. Dźěći Malešanskeje Witaj-pěstowarnje „K wódnemu mužej“ swjeća njedźelu, 4. junija, w 15 hodź mejemjetanje. Swjedźeń zahaja z programom. Na to wubědźuja so hólcy wo česć mejskeho krala. Přizamknjetej so zhromadny kofej a pisany program. A komuž brjuch korči, móže sej słódny lód abo praženu kołbasku popřeć.
Duchowna hudźba zaklinči
Budyšin. Na duchownu hudźbu z Drježdźanskim koncertowym chórom „Let’s Sing!“ su wšitcy zajimcy njedźelu, 4. junija, do Budyskeje tachantskeje cyrkwje prošeni. Pod nawodom Nica Müllera zaklinči gospelowa, popowa a filmowa hudźba. Započatk je we 18 hodź. Zastup je darmotny. Přizamknje so kolekta.
Wustajeńca k posmjertninam
Wojerecy. Składnostnje 25. posmjertnin Gerharda Gundermanna je hišće hač do 18. julija we Wojerowskej měšćanskej bibliotece widźeć wosebita wustajeńca wo spěwarju a hudźbniku.
Kulturna zahroda přeprošuje
Budyšin. Po dźensnišim prěnim zarjadowanju lětušeje „Kulturneje zahrody“ při Serbskim ludowym ansamblu sćěhuja přichodne dny dalše. Tak wustupi tam jutře, pjatk, w 19.30 hodź. skupina Placebo Flamingo. W njej hraja Micha Winkler, Matthias Macht a Tomaš Kreibich-Nawka. Sobotu w samsnym času smědźa so wopytowarjo wjeselić na duwo Izabela Kałduńska a Walburga Wałdźic. Njedźelu w 17 hodź. přizamknje so program „Tina a Hadrijan“ z komornej hudźbu a tekstami Jurja Brězana.
Młodostni putnikuja
Nowa wustajeńca w klóštrje
Pančicy-Kukow. Towarstwo Cyrila a Metoda je składnostnje lětušeje 775. róčnicy wobstaća klóštra Marijineje hwězdy wustajeńcu wo serbskich wjerškach w zwisku z jubilejom před 25 lětami zestajało. Wotewru ju pjatk, 2. junija, po wječornych kemšach, kotrež budu w 19.30 hodź. w rumnosći w přechodźe z klóšterskeho dwora w Pančicach-Kukowje. Přistupna budźe přehladka wot póndźele do pjatka wot 10 do 16.30 hodź. a sobotu wot 12.30 do 16 hodź. We wustajeńcy su mjez druhim wobrazy wo procesionje na swjateho Marka z lěta 1998, wo dźiwadłowym předstajenju „Hwězda jasna“, swjedźenskim ćahu k tehdyšemu jubilejej klóštra a scyła k jeho stawiznam wozjewjene.
Na knižnu premjeru
Budyšin. Smolerjec kniharnja přeprošuje na knižnu premjeru z temu „Hornjoserbska rěčna politika w kubłanju – rěč wróćo abo doprědka přinjesć?“ Awtorka Nicole Dołowy-Rybińska a jeje kolegina při slědźenju, Cordula Ratajczakowa chcetej swoje dopóznaća w Budyskim zarjadnišću 1. junija w 19 hodź. zjawnje předstajić. Tute stej wědomostnicy w lětach 2017 do 2019 na Budyskim Serbskim gymnaziju zběrałoj a zdobyłoj.
Radźićeljo wuradźuja
Serbski čitanski dyrdomdej
Wot jutřišeho do kupjele
Kulow. W Kulowskej lěsnej kupjeli zahaja jutře w 13 hodź. lětušu kupansku sezonu. Na wopytowarjow čaka nowe 93 metrow dołhe suwadło. Natwarili su je za dohromady 200 000 eurow dźakowano spěchowanju z programa za witalne wjesne srjedźišća. Nowe su tohorunja wobě hrajkanišći, startowe bloki a wobhrodźenja. Kupjel je wot póndźele do pjatka wot 13 do 20 hodź. wotewrjena, kónc tydźenja a swjate dny wot 11 do 20 hodź. Zastup su snadnje zwyšili. Dźěći płaća 1,50 a dorosćeni 2,50 eurow.
Spěwaja we wopomnišću
Psowje. Na swjatkowne spěwanje přeprošuje Rakečanski žónski chór sobotu, 27. meje, w 14.30 hodź. k wopomnišću w Psowjach (Oppitz). Po zabawnej hodźince před kćějacymi rododendronowymi kerkami poskićuja wopytowarjam kofej a tykanc. Wjesny klub Psowje čłonki chóra při pohosćenju wopytowarjow podpěruje. Tež we wobłuku kolesowanskeje jězby móžeš tam derje pozastać. Při dešćiku zarjadowanje wupadnje.
Wustajeja w ateljeju
Radźićeljo wuradźuja
Róžant. Hnydom tři parlamenty gmejnow zarjadniskeho zwjazka Při Klóšterskej wodźe so jutře, štwórtk, k wuradźowanju zetkaja. Wot 18.30 hodź. zaběra so gmejnska rada Ralbic-Róžanta w Róžeńčanskej gmejnskej sydarni z dalšimi nadawkami za nowotwar Ralbičanskeje pěstowarnje, mjenujcy za třěchikryjerske dźěła, lift a za meblěrowanje. Dale póńdźe wo twarske wustawki za Róžant.
Chrósćicy. Skerje skromny je porno tomu dnjowy porjad zjawneho wuradźowanja Chróšćanskich radźićelow, kotřiž zetkaja so w 19 hodź. w swojim gmejnskim a kulturnym centrumje. Tam póńdźe wo stejišćo k twarskej próstwje a wo lisćinu namjetow přisydnikow za hamtsku dobu 2024 do 2028.
Worklecy. Worklečanskej gmejnskej radźe předstaja wot 19.30 hodź. w tamnišej šuli projekt kupy, hdźež ma nowe kulturne a towarstwowe srjedźišćo wsy nastać. Dale wobzamknu radźićeljo lětne wotličenje 2016 Worklečanskeje gmejny. Na wšitke posedźenja su wobydlerjo wutrobnje přeprošeni.
Na Smochčanski forum
Smochćicy. „Je to hižo ekstremizm?“ rěka dalše zarjadowanje w rjedźe Smochčanskeho foruma jutře, srjedu, w 19 hodź. w Smochčanskim kubłanišću swjateho Bena. Politologaj Tom Thieme a Christoph Meißelbach porěčitaj mjez druhim wo prašenju, hač móžeš prawicarski a lěwicarski ekstremizm přirunować a hač je AfD prawicarsko-ekstremistiska strona. Wšitcy su přeprošeni.
Protyki zaso w poskitku
Kamjenc. Zapósłanc Sakskeho krajneho sejma Alojs Mikławšk (CDU) ma w swojim Kamjenskim wólbnym běrowje na Zapadnej 4 zaso šulerske protyki za šulske lěto 2023/24 w poskitku. Tydźenski planowar je přewodnik po šulskim lěće a skića dosć městna za wosobinske zapiski. Nimo toho informuje wón wo krajnej politisce a wo dźěle krajneho parlamenta. Protyka hodźi so za šulerjow wot 7. lětnika. Běrow je přistupny wot póndźele do pjatka stajnje wot 8 do 14 hodź.
Wolgang Berghofer přijědźe
Za dyrdomdej so přizjewić
Budyšin. Rěčny centrum WITAJ přewjedźe w kooperaciji z Němsko-Serbskim ludowym dźiwadłom za šulerjow 3. a 4. lětnika serbskich zakładnych šulow pjatk, 9. junija, čitanski dyrdomdej na Budyskich wěžach. Nóžkujo po starym měsće wopytaja šulerjo tři wšelake wěže, zhonja stawizniske zajimawostki a předčitaja sej na wěžach mjez sobu ze swojich serbskich knihow. Mały piknik, zabawne hry a kónčny kwis zhromadny wječor skulojća.
Městna su wobmjezowane, přizjewjenja přijimuje RCW wot 22. do 26. meje.
Darmotnje do muzeja
Budyšin. Na Mjezynarodnym dnju muzejow, 21. meje, je njedźelu tež w Serbskim muzeju zastup darmotny. Je to dobra składnosć sej wustajeńcu „Čej’ da sy?“ wobhladać. W 15 hodź. poskići so wodźenje w němskej rěči a w 16 hodź. w serbskej rěči.
Poskića prózdninskej lěhwje
