Wojerecy. Na wšěch šěsć kolesow su w decembru na teritoriju města Wojerec namakali w namakanskim běrowje měšćanskeho zarjadnistwa wotedali. Kaž z nowinskeje zdźělenki města wuchadźa, jedna so wo štyri žonjace kolesa, jedyn mountainbike a jedne mužace koleso. Nimo toho nańdźechu wobydlerjo ćmowy nachribjetnik z črijemi, wšelake kluče, mjez druhim awtowe, słónčne nawoči a rukajcy. Po poł lěće móža namakane wěcy přesadźować, hač na kluče.
Wopak parkowali
Wojerecy. Něhdźe 2 000 ludźi je we Wojerecach loni wopak parkowało. To je městu něhdźe 31 000 eurow dochodow wobradźiło. W lěće do toho bě to něhdźe 2 000 eurow mjenje.
Wulke Ždźary. Nalěto započnu we Wulkich Ždźarach wopłóčkowy kanal kłasć, kaž Łazowski wjesnjanosta Thomas Leberecht (CDU) připowědźi. Za twarske dźěła zwjazkowu dróhu B 96 po wotrězkach dospołnje zawru. Bus mjez Budyšinom a Wojerecami pojědźe potom po Stróžanskim puću. Tamny wobchad powjedu po hinašej wobjězdce.
Kuchnja skónčnje hotowa
Hórnikecy. Wobydlerski centrum w Hórnikecach je nětko skónčnje z nowej kuchnju wuhotowany. Hižo wot lěta 2019 su so we wobłuku wobydlerskeho etata města Wojerec wo kuchnju prócowali. Dokelž pak budget jednoho lěta njedosahaše, su tež pjenjezy z 2020 a 2021 zapřijeli. Tak móžachu tohorunja wšelake twarske ćeže přewinyć. Mjeztym je wšitko zatwarjene a kuchnja funguje, kaž město Wojerecy zdźěli. Ze zbywacymi pjenjezami chcedźa hišće grat a sudobja kupić.
Budyšin. Strowotniski zarjad Budyskeho wokrjesa ma nětko přidatne zjawne šćěpjenske městno přećiwo koronawirusej, a to na Tzschirnerowej 14a pódla kupnicy Penny w bywšej přizjewjerni jězdźidłow. Wotpowědne terminy móža wobydlerjo online skazać. Šćěpiwo wobstara Budyski krajnoradny zarjad. Kaž wottam w nowinskej informaciji pišu, šćěpja tuchwilu předewšěm serum Moderna. Přizjewjenja su jeničce přez formular w syći móžne. Zajimcy nadeńdu formular z linkom .
14 škodowanych
Wulke Ždźary. Při zesunjenju pobrjoha Hórnikečanskeho jězora a naslědnej žołmje na Wulkoždźarowskim přibrjohu před něhdźe dźewjeć měsacami je 14 škodowanych materielnu škodu poćerpjeło. Kaž Łužiska a srjedźoněmska towaršnosć hórnistwoweho zarjadnistwa (LMBV) zdźěli, wobličichu cyłkownu škodu na 200 000 eurow. Wo wobjimje jednotliwych wotrunanjow móžachu so ze wšitkimi potrjechenymi dojednać, jeno z jednym nic. W tymle padźe jednaja ze Sakskim wyšim hórniskim zarjadom w Freibergu. Mjez škodowanymi stej płachtakowanski klub a wobsedźer kónctydźenskeho bungalowa.
Chrósćicy. W Domje swjateje Ludmile w Chrósćicach poskićuja dźěłowe městno při dohladowanju wobydlerjow, kotrež chcedźa wot 1. februara přichodneho lěta z 20 hodźinami wob tydźeń wobsadźić. Wosebite wukubłanje za to trěbne njeje. K nadawkam na tymle dźěłowym městnje mjez druhim słuša, z wobydlerjemi so zaběrać, z nimo so rozmołwjeć a so wuchodźować. Nadrobniše informacije poda wjednistwo domu pod telefonowym čisłom 035796/ 947 330.
Boža mša w rozhłosu
Smochćicy. Rozhłosowy sćelak MDR-Kultur wusyła njedźelu, 2. januara, Božu mšu originalnje z cyrkwje swjateho Bena w Smochćicach. Kemše započnu so w 10 hodź.
Budyšin. Statistika turistow za město Budyšin pokazuje, zo su w oktobrje plus jědnaće procentow při skazanju přenocowanjow zwěsćili. Lěta do toho njebě tón měsac wosebje atraktiwny był. Lětsa je sej dohromady 8 072 turistow a turistkow do sprjewineho města dojěło, mjez kotrymž běchu mnozy, kotřiž wužiwachu tež móžnosće campinga. W cyłku bu 20 486 přenocowanjow zličene. Přerěznje přebywachu ludźo dwaj a poł dnja w Budyšinje. Loni bě tu 6 381 turistow přerěznje 2,6 dnjow přebywało, štož wučinješe 16 619 přenocowanjow.
Smě ludźi wěrować
Budyšin. Budyski wyši měšćanosta Alexander Ahrens (SPD) je so ze swojim znapřećiwjenjom přesadźił. Dohladowanski zarjad je tudyšej měšćanskej radźe wumjetował, zo bě přećiwo prawu postupowała. Radźićeljo běchu wotpokazali, zo smě Ahrens přichodnje pory stawnisce wěrować. Po rozsudźe zarjada, zo bě postupowanje rady njeprawy zasah do organizaciskeje suwerenity a swobody při wukonjenju powołanja, to měšćanosta Ahrens nětko smě. Kaž wón zdźěli, dźěše jemu jeničce wo móžnosć, hdys a hdys wěrowanja přewjesć a stawnistwo w jeho dźěle wolóžić.
Budyšin. Čłonojo Budyskeho měšćanskeho zwjazka CDU su zašłe měsacy namjety za kandidatow wyšeho měšćanosty zběrali. Wjackróć mjenowany bu Karsten Vogt, kiž bě hižo zwólniwosć zwuraznił, kandidować. Předsydstwo zwjazka je tomu wčera jednohłósnje přihłosowało.
Boži narodk wobdźiwać
Smochćicy. Boži narodk z figurami, wulkimi kaž čłowjek, wabja wot patoržicy hač do 2. februara do Smochčanskeho kubłanišća swj. Bena. Po wuchodźowanju po ležownosći z Božim narodkom kaž tež po parku móža sej zajimcy Betlehemske měrowe swětło w cyrkwi wšědnje wot 8 do 17 hodź. sobu wzać. Boži narodk běchu sobudźěłaćerki a sobudźěłaćerjo zarjadnišća loni twarili. Boža mša patoržicu w 17 hodź. w cyrkwi je wuknihowana, ta 26. decembra w 10.30 hodź. hišće nic. Přistup je jenož po prawidle 3G móžny. Je trjeba so do lisćiny zapisać. Přizjewjenje trěbne njeje.
Dźak krajneho rady