Z kompjuterom wobšudźili

Běła Woda. Z woporom cuzych je so minjeny­ kónc tydźenja muž w Běłej Wodźe stał. Jeho ličak zdźěli jemu pozdatny nadpad. Na to přizjewi so muž pod te­lefonowym čisłom, kotrež bě jemu kompjuter­ jako móžnu pomoc pokazał. Z tym pak zalěze sej muž do paslow wobšudnikow. Skućićeljo jemu napo­wědachu, zo chcedźa jemu pomhać a žadachu sej wosobinske daty kaž tež dal­nopřistup na jeho kompjuter. Hišće za čas telefonata wobšudnicy wjackróć pjenjezy wot konta Běłowodźana wotzběhnychu. Dohromady nasta něhdźe 2 000 eurow škody. Policija radźi, w tajkim padźe­ ličak hnydom wot interneta dźělić a hasnyć.

Špihele pokradnyli

Budyšin. Wot minjeneho pjatka hač do njedźele su njeznaći w Budyšinje wot wjacorych awtow škleńcu wonkownych špihelow pokradnyli. Potrjechiło je to awta typow BMW, Porsche a Audi. Cyłkownje nasta 1 700 eurow škody.

Twarske dźěła za park wětrnikow pola Slepoho pokročuja

Slepo (AK/SN). Za prěni wotrězk Sle­pjanskeho parka wětrnikow twarske dźěła­ po wuprajenju inwestora, firmy Enercity, dale pokročuja. Tole zdźěli Slepjanska gmejna w swojim aktualnym hamtskim łopjenu. „Na Mułkečanskim nasypje su mjeztym wšitke štyri fundamenty za milinowe wětrniki z betonom wukidali. Tež na přepinarni w Syjku (Graustein) a na milinowej čarje dale dźěłaja“,­ tak gmejna.

W awgusće nasta w Mułkecach městno za překładowanje wokřidłow. Wot kónca oktobra wokřidła sem přiwjezu a tu najprjedy raz składuja. Pozdźišo je wottud na nasyp dowjezu. Hižo spočatk oktobra transportuja do Mułkec dźěle za wěže, generatory a tak mjenowane gondle. Tele transporty přijědu zwjetša w nócnych hodźinach. Wone wjedu hnydom na nasyp. Dokładne terminy hišće znate njejsu. Předewzaće pak chce wobydlerjow sčasom informować.

Slepo. Chór Lipa z Pančic-Kukowa je předwčerawšim, njedźelu, w Slepom nazymski koncert wuhotował. Tajke wurjadne dožiwjenje lědma hdy dožiwjach. Přichwatało je něhdźe 90 wopytowarjow. Za nich dyrbjachu zdźěla hišće stólcy přistajić. Hižo wot prěnjeho spěwa „Ha widźu-li ptačata ćahnyć“ běch přewšo hnuty. Tónle spěw smy naposledk k po­hrjebej našeje Leńki Nowakoweje spě­wali. Tehdy začuwachmy, kak ptački preč ćahnu, jako so kašć do zemje pušći – to so něšto pola nas zhubi. Ale nětko je tute „Ha widźu-li ...“ nas nutřkownje wote­wzało. Jako potom hišće Fabian Kaulfürst kóždy programowy blok w slepjanšćinje připowědźi, docpě chór tež wutroby poslednich připosłucharjow. Wosebje jasnosć jednotliwych hłosow zmóžni teksty połnje zapřimnyć. Móžu sej derje předstajić, kelko zwučowanjow je trěbne, doniž­ tajkile wustup bjez techniki nje­zmištruješ. Wulki kompliment na tymle městnje dirigentce Jadwize Kaulfürstowej. Dobra ideja bě tohorunja wobsahi spěwow němsce na programowe cedlki napisać. Derje, zo publikum z přikleskom njelu­towaše.

Budyšin (SN/MWj). W Budyskim měšćanskim archiwje nje­zběraja jenož hamtske podłožki mě­šćanskeho zarjadnistwa. Tam chowaja tohorunja­ takrjec njehamtske doku­menty towarstwow, zwjazkow kaž tež wuznamnych swójbow a jednotliwcow města.

Druhdy dóstanje so do archiwa za­wostajenstwo hišće žiwych wosobow. Zwjetša pak jedna so wo podłožki tych, kotřiž su hižo zemrěli. Minjene dny je archiw­ zawostajenstwo „wótca Małowjelkowskeho prazwěrjenca“ Franca Grußa (1931–2006) do swojeho wobstatka přijimał. Wone wopřijima wosobinske do­kumenty a fotografije nadarjeneho dekoraciskeho molerja kaž tež jeho twarske rysowanki a dalše podłožki wo nastaću prazwěrjatow a dalšich prehistoriskich žiwochow, kotrež je wón najprjedy w swojej priwatnej zahrodźe we Wulkim Wjelkowje a pozdźišo w Małowjelkowskim prazwěrjencu stworił. Z wobstatka něhdźe 250 hóstnych knihow je archiw dźesać wuzwolił a je tohorunja přewzał. Wone dokumentuja, zwotkel su wopy­towarjo minjene lětdźesatki pochadźeli a kak zahorjeni wo swojim wopyće běchu. Podłožki je wudowa Rosemarie Gruß archiwej přepodała.