Worklecy/Smječkecy. „Wotkryjemy sej Worklecy a wokolinu“ je hesło tohole prózdninskeho tydźenja we Worklečanskim horće „K wódnemu mužej“. Tak podachmy so wutoru do swojeho bjezposrědneho susodstwa a wopytachmy wohnjowu woboru w Smječkecach. Měrćin Nowak nam nadawki wobornikow nazornje rozkładźe. A to nic jenož za blidom! Holcy a hólcy smědźachu so sami wuspytać, woheń zamiškrić a wobkedźbować, kak spěšnje mała škrička k wulkemu wohenjej rosće. Tež telefonat z wuchowanskej dispatchernju běše dźěl programa. Po tym zo běchu dźěći čisło 112 wolili, mějachu same daty dale dać a nuzowu situaciju wopisać. To bě přewšo napjate dožiwjenje. Wulke wjeselo knježeše, jako smědźachu mali wopytowarjo z hadźicu a z wohnjohašakom płomjenja podusyć.
Zawěsće dźěći doma wjele rozprawjachu. Snano so tón abo tamny, ta abo tamna z nich rozsudźi, so pozdźišo sam/a z wobornikom stać.
Měrćinej Nowakej a kameradam w Smječkecach zapłać Bóh za rjane dožiwjenje! Christina Měškankowa
Warnuja před wobšudnikami
Budyšin. Žołmu wobšudniskich telefonatow je policija wčera w Hornjej Łužicy zwěsćiła. Z Kamjenca, Kumwałda, Załomja a Lubija je wjace hač dźesać wotpowědnych pokiwow wobydlerjow dóšło. Na zbožo nihdźe škoda nastała njeje. Zo by tak wostało, měli ludźo kedźbliwi być. Wobšudnicy přizjewja so jako policisća a mjenuja samo čisło swojeho běrowa, najskerje zo by to wěrje podobnje klinčało. W někotrych padach běchu tež pozdatni swójbni při aparaće. Zwjetša woni ludźom napowědachu, zo bě so njezbožo stało, zo je něchtó zemrěł a zo dyrbi zawinowar do jastwa. Tomu móhło so z kawciju wotwobarać. Za to žadachu wot zawołanych hač do 50 000 eurow. Policija namołwja ludźi, so wobwliwować njedać a cuzym na žadyn pad pjenjezy abo debjenki přepodać. Kohož su skućićeljo zazwonili, njech so pola policije přizjewi.
Wojerecy (AK/SN). Z nowej internetnej stronu Wojerowski měšćanski muzej zmóžnja, zo wopytowarjo skulpturowe wuměłstwo a jeho stawizny na žiwe wašnje a digitalnje dožiwjeja. Tole zdźěli nawodnica muzeja Kerstin Noack.
„We Wojerecach mamy dźensa něhdźe sto skulpturow. Wone steja mjez platowymi bydlenskimi domami, na zelenišćach a při hłownych dróhach“, Noack rozłoži. „Wone powědaja wo wosebitym času, kotryž měješe wizije wo mjezynarodnych zetkanjach a zmužitosć, wuměłstwo samozrozumliwje w zjawnym rumje prezentować.“ Z nowej internetnej stronu „Na slědach kamjenjow“ chce muzej tónle wotrězk měšćanskich stawiznow zajimowanym wužiwarjam zbližić. Tale strona přeprošuje tomu, sej skulptury wobhladać, so dopominać a dale myslić.
Budyšink/Plusnikecy (UM/SN). Malešanska gmejnska rada je na swojim zašłym posedźenju próstwu firmy ProStein, kotraž skału w Plusnikecach wobhospodarja, jednohłósnje wotpokazała. Předewzaće bě namjetowało, zo ležownosć bjezposrědnje južnje pódla swojeho terena wot gmejny přewozmje a za to k skale wjeducu dróhu Budyšink-Plusnikecy saněruje. Kaž ze stejišća gmejnskeho zarjadnistwa wuchadźa, „je potrjechena ležownosć z hajkom wobrosćena. Tónle hajk wulki dźěl hary a procha, kotryž ze skały wuchadźa, wotpopadnje.“ Budyšink ćerpi tak a tak sylnje hary a smjerda dla, wšako stej nimo skały tež awtodróha a mlokowy kombinat w bliskosći.
Krajny rada: Kupjel ma přichod
Krušwica. Po insolwency Dožiwjenskeho swěta w Krušwicy je Zhorjelski krajny rady Stephan Meyer (CDU) management zmylkow dla kritizował. Wón gmejny na sewjeru wokrjesa namołwi, wudźeržowanje kupjele podpěrować. Płuwanišćo wostanje najprjedy zawrjene, wellness, sawna a gastronomija maja so bórze zaso wočinić. Po trěbnych inwesticijach změje kupjel přichod, měni Meyer.
Nowy festiwal w Nuknicy
Nuknica. „Lěz mi na pěc“ rěka nowy festiwal pod hołym njebjom, z kotrymž chce towarstwo barakka po dwulětnej přestawce na tradicionalny openair Nukstock nawjazać. Posledni kónc tydźenja awgusta koncertuje dohromady wosom skupinow resp. solistow w Nuknicy. Hudźbny spektrum saha wot dark jazza hač k black metalej. Wustupowacych wuměłcow wozjewi towarstwo krok po kroku na swojich digitalnych kanalach.
Čěske pistole za Němsku
Hórnikecy. Festiwal elektroniskeje hudźby swjeća wot pjatka hač do njedźele při Hórnikečanskej Energijowej fabrice. Čłonojo towarstwa Stroga jón tuchwilu přihotuja. Tak změja wjacore jewišća a rejwanišća. Dokelž widźiš wonkowne připrawy energijoweje fabriki jenož we wobmjezowanej měrje, płaća wopytowarjo hač do njedźele potuńšeny zastup. Wot wutory přichodneho tydźenja spóznaja wopytowarjo wšitko zaso na zwučene wašnje.
Plahuja bjez chemije
Bukojna. Derje wuwita rožka bjez chemije rosće wot lětušeho na polu w Bukojnje. Robert Hennig a Delphine Peroche měještaj ideju, zhromadnje z ludźimi, kotřiž so za ekologiju horja, ratarić. Woni něhdźe jedyn hektar wulke polo wotnaja. Pod projektowym mjenom „Kulterbse“, skrótšenka hesła ,,kulturne herbstwo być“, plahuja sad a zeleninu za swójsku potrjebu sobuskutkowacych. Loni su entuziasća płoninu wotpowědnje přihotowali a mjez druhim nazymsku rožku a zela wusyli. Štóž so za projekt zajimuje, njech so z mejlku pod přizjewi.
Čita w lěsu
Wjele pjenjez zhubił
Łuty. Kaž policija hakle nětko zdźěli, bě wobydler Łutow minjene tydźenje z woporom wobšudnikow. Na internetnej stronje, kotraž seriozna skutkowaše, inwestowaše muž pjećcyfrowu sumu pjenjez do tak mjenowaneje kryptoweje měny. Pozdźišo so wukopa, zo su pjenjezy fuk. Wojerowska kriminalna słužba so z padom zaběra.
Zasadźenje wuža dla
Kamjenc. Mortweho hada dla su wutoru w Kamjencu policiju zasadźili. Wustróžana žona připołdnju zdźěli, zo je hada wuhladała. Jako zastojnicy dojědźechu, zwěsćichu, zo je to njestrašny wuž (Ringelnatter). Mortwe zwěrjo zrumowachu.
Awto do kolesa zrazyło
Mały Wjelkow. Ćežke wobchadne njezbožo stało je so wutoru w Małym Wjelkowje. Tam je 57lětna wodźerka Renaulta naprawo na zwjazkowu dróhu B 96 wotbočiła. Při tym njewobkedźbowaše wona kolesowarja, kiž bě do směra na Budyšin po puću. 72lětny muž so při zražce ćežko zrani, tak zo dyrbjachu jeho do chorownje dowjezć.
Wojerecy (AK/SN). 26. Sakska krajna domchowanka 2025 wot 12. hač do 14. septembra we Wojerecach woswjeća na wobmjezowanej płoninje w nowym měsće. Přičina su krućiše žadanja wěstoty, kotrež nětko nadpada na hodowne wiki w Magdeburgu dla płaća. „Wobmjezujemy swjedźenišćo na nowe město z jewišćomaj na Łužiskim naměsće a na Einsteinowej kaž tež na centralny park a na centralne wopomnišćo“, praji nawoda běrowa Wojerowskeho wyšeho měšćanosty Olaf Dominick. Wobsahi a ličbu wobdźělnikow porno tomu njeskrótša. Podobnje kaž na druhich tajkich wulkich zarjadowanjach dyrbja na přikład zaručić, zo žane cuzy jězdźidła na swjedźenišću njebudu. Nimo toho maja wšitke dróhi a puće z ćežkimi jězdźidłami zahaćeć. „Swjedźenišćo budźe přewidniše hač te, kotrež planowachmy spočatnje“, praji Wojerowski měšćanosta Mirko Pink. Prěnja warianta je tež stare město sobu zapřijała. Zaručenje wěstoty mjenuje Pink „wulke wužadanje“.