Budyšin (CS/SN). Šoferow, kotřiž minjeny štwórtk z Budyšina do směra na juh jědźechu, je policija na Nowosólskej dróze při nadróžnej mištrowni přez jeje dwór dirigowała. Přičina bě wulka policajska kontrola. Cil bě, přepruwować, hač su šoferojo jězdźenja kmani. Runočasnje su přichodni drogowi specialisća w praksy nazhonjenja zběrali. 36 nowačkam na tymle­ polu běchu do toho w Budyskej policajskej šuli teoriju sposrědko­wali. Nětko mějachu woni swoju wědu w praksy nałožować.

Wojerecy. Rěčna motiwatorka w župje „Handrij Zejler“ Marija Šołćic přeprošuje na lěćny poskitk w dwěmaj dźělomaj. Wutoru, 14. julija planuje wona dwójce zarjadowanje, w kotrymž zhotowjeja wobdźělnicy serbske smoothije, a to wot 14 do 15.30 hodź. abo wot 16 do 17.30 hodź. we Wojerowskim Domowinskim domje. Druhi dźěl je zelowe wuchodźowanje z pedagogowku za hojace rostliny a zela Reginu Krawcowej pjatk, 17. julija, wot 17 do 19 hodź. Zajimcy zetkaja so při busowym zastanišću w Koćinje. Woni so njech hač do 13. julija pod telefonowym čisłom 03571 601613 abo e-mailnje pod přizjewja. Wobdźělenje na woběmaj zarjadowanjomaj płaći sydom eurow.

Zhromadnje spěwać

Budyšin. Zwjazk serbskich spěwarskich towarstwow přeproša na dalše zhromadne spěwanje. A to wutoru, 7. julija, we 18 hodź. w chórowej rumnosći Serbskeho ludoweho ansambla. Wšitcy zajimcy su wutrobnje witani.

W Kulowskim dźěćacym domje su wuwzaćne rjadowanje skónčili

Kulow (AK/SN). W Kulowskim dźěćacym domje Swjateje Marije w nošerstwje katolskeje wosady su ličbu hortowych městnow wot šulskeho lěta 2026/2027 znižili. W lěće 2022 wot krajneho młodźinskeho zarjada přizwolenu wuwzaćnu dowolnosć njepodlěša. Tohodla změja tam zaso tule kapacitu městnow, kajkuž­ su ju při twarje zarjadnišća planowali. „Bohužel njejsu so ze staršimi zhromadnje dojednali. Rěča samo wo tym, zo něchtó swoje dźěłowe městno zhubi“, kritizowaše měšćanska radźićelka Susanne Kockert (Powšitkowne wobydlerske zastupnistwo) na zašłym posedźenju měšćanskeje rady. „Sym wosobinsce přesłapjena, zo njejsmy zhromadny wupuć namakali“, wona rjekny.

Rakecy (UM/SN). Štóž do dworoweho wobchoda Andréja Gana a jeho mandźelskeje Antje na Cyhelskej w Rakecach zastupi, zanuri so do swěta wónjow a aromow. Wóń kobołka při tym přewahuje. Bjez dźiwa, wšako so w swójbnym předewzaću wšitko wokoło kobołka wjerći. Tón abo tamny snano hišće někotre rozdźěle čuje, wjetšina pak ma cyłkowny zaćišć­ w nosu. Pola Andréja Gana je to hinak. Wón ma mjeztym wjele nazho­njenjow z korjeninami a je lěpje spóznawa a rozeznawa hač druzy ludźo. Tele kmanosće chce přichodnje hišće intensiwnišo wužiwać, wšako smě so wot njedawna someljer korjeninow mjenować.