Fachowcy sakskeho wjelčeho managementa slědy na pastwje zawěsćili

Njebjelčicy (SN/BŠe). W padźe torhnjenych wowcow pola Njebjelčic wucha­dźeja fachowcy wjelčeho managementa z toho, zo je wjelk to zawinował. Pjatk popołdnju je sakski zarjad za geologiju, ratarstwo a wobswět wotpowědnu informaciju po naprašowanju SN wozjewiło. Z tym je nětko jasne, zo je rubježne ­zwěrjo stadło wowcow wowčerja Gerata Šmita nadpadnyło. Kaž nowinska rěčnica zarjada Karin Bernhardt zdźěli, je minjeny štwórtk rano informacija na Kamjenskim policajskim rewěrje dóšła, zo je stadło wowcow z pastwy ćeknyło.

Myto za wuwiće šćěpjenjow

Stockholm. Dźensa zahaji so w Šwedskej tak mjenowana sezona Nobeloweho myta. Tradicionalnje so na jeje spočatku lawreaća w kategorijomaj fyziologija abo medicina wozjewja. Lětsa staj to Katalin Karikó a Drew Weissmann, kotrajž staj myto za swoje slědźenja na polu wuwića efektiwnych šćěpjenjow přećiwo koronje dobyłoj.

So powołansce orientowali

Wojerecy. Dźěłaćerske dobroćelstwo we Wojerecach „Łužica“ (AWO) je nowy projekt za powołansku orientaciju zahajiło. Něhdźe 70 šulerjow 9. lětnika tamnišeho Johanneuma je so w běhu zašłeho tydźenja na wšelakich powołanskich polach wuspytało. Mjez wobdźělnikami běchu tež Kulowska šula a kubłanišća z Kamjenca.

Zetkanje nuznje trěbne

Žně neplow kaž w prjedawšich časach chcychu njedawno šulerki a šulerjo 8. lětnika Ralbičanskeje wyšeje šule dožiwić. Z rjadowniskim wučerjom Michałom Wowčerjom a šulskej wjednicu Milenku Koberowej podachmy so z kolesom wot Ralbic na Korchec burski statok w Salowje. Po krótkej snědani dźěše hnydom do dźěła na polo neple zběrać. Dźěłachmy pilnje a zasobu, tak zo běše Bosćij Korch z nami jara spokojom. Po dwuhodźinskim dźěle wróćichmy so z połnym wozom ke Korchecom. Tam čakaše na nas wot pilnych kucharkow nawarjeny słódny wobjed. Samobělene neple z twarohom a lanym wolijom nam jara słodźachu. Samo z napojom zastara nas Korchec swójba kaž něhdy, mjenujcy z kisałej wodu, štož je woda, kisało a cokor. Skónčnje so Korchecom za rjany dźeń podźakowachmy a so pod přewodom krótkich šwihelow wróćo do Ralbic po­dachmy. Lětnik 8/2 SWŠ Ralbicy

Worklečanscy wohnjowi wobornicy přeprošuja na jubilej

Worklecy (aha/SN). Na 80lětne spomóžne skutkowanje zhladuje jutře a njedźelu Worklečanska wohnjowa wobora. Agilny nawoda čestnohamtskeho cyłka Bosćij Riedel ma za wažne sobotu wječor a wosebje njedźelu popołdnju wšěm Worklečanam a zajimcam ze susodnych wsow stajnu zasadźensku hotowosć kameradow předstajić. Woni kóždy čas swoje priwatne naležnosće wróćo stajeja a maja za samozrozumliwe, zo druhim ludźom pomhaja. Njedźelu popołdnju chcedźa zajimcam při kofeju a tykancu rozłožić, kak je so Worklečanska wobora w běhu lětdźesatkow wuwiła. Wažnu rólu hraje při tym wuwiće wohnjowoborneje techniki, kotruž hosćom demonstruja. Popołdnjo wobrubja chowancy wjesneje pěstowarnje.

Worklečansku woboru su za čas Druheje swětoweje wójny 2. julija 1943 załožili. Pod prěnim nawodom wobory Jurja Wincera mějachu hižo na dnju załoženja swoju zasadźensku hotowosć dopokazać. Na kóncu wójny zniči woheń Róblec hródź a bróžnju. Tež jako 30. junija 1945 błysk do Krawcec bróžnje dyri, su kameradojo hnydom pomhali.