Prěni raz je Komitej Budyšin z.t. wčera na wustajeńcu w kapałce na pohrjebnišću na Nuklacej hórce přeprosył. Čłon předsydstwa,­ farar Christian Tiede, witaše nimale 60 ludźi. Jim předstaji Budyski grafikar Christian Ratajczak (nalěwo) pod hesłom­ „pusta a prózdna“ wjace hač 25 swojich mólbow, kiž su w minjenych třoch lětach nastali. Wopomnišćo w susodstwje Budyskeho jastwa chce z wuměłstwom nowych zajimcow na pohrjebnišćo wabić, hdźež buchu wot 1945 do 1949 mnozy zemrěći­ ­specialneho lěhwa pochowani. Hač do kónca septembra je wustajeńca stajnje njedźelu wot 15 do 18 hodź. přistupna. Foto: Andreas Kalauch

Antje Meichsner je jedna z kursistkow, kotřiž lětsa we wobłuku programa Domoj hornjoserbsce wuknu. Medijowa wuměłča bydli w Drježdźanach. Pochadźa pak ze wsy blisko Łužicy. Jako młodostna měješe mnohich přećelow-punkow we Łužicy, kotrymž serbskosć tak wažna njebě. „Njejsu so z tym identifikowali“, wona zwurazni.

Hakle pozdźišo je při swojich subkulturnych aktiwitach na serbskosć storčiła, na přikład na koncerće Paula Geigerzählera. „Tón je Serb a punk a hraje husle“, a to Antje zajimowaše. Tež queerfeministiska rap-skupina Kolektiw Klanki zbudźi jeje zajim, dokelž reprezentuje rědku „mjeńšinu w mjeńšinje“. Tak dojědźe sej Antje ekstra na dźiwadłowu hru, zo by hudźbu Kolektiwa Klanki w předstajenju słyšała. Tam wona skupinu narěča.

Pozdźišo tež na festiwalu Metasolis jako hudźbnica wustupi. Festiwalowa crew napodobnješe za sebje radijo, při kotrymž so mjez sobu serbsce lóštnje komentowachu. Tam Antje prěni raz słyšeše, kak so Serbja serbsce rozmołwjeja. Najebać lóštneje situacije bě šokowana, jako zwěsći, zo njebě so dotal ženje z rěču rozestajała.

140 000 eurow hišće faluje

Budyšin. Hač a kak budźe wokrjes Budyšin hišće pobrachowacy podźěl 140 000 eurow za wudźeržowanje Kamjenskeje porodźernje hač do kónca lěta wuzbytkować, njeje dotal jasne. Kaž krajnoradny zarjad našemu wječornikej wobkrući, chcedźa tole hakle zwěsćić. Ze šmórnjenjom busowych linijow je wo­krjesny sejmik poł miliona eurow zalutować chcył. Zwoprawdźenje rozsuda pak je so prawniskich zadźěwkow dla dliło.

Mjenje dźěći, mjenje kubłarjow

Budyšin. Dwanaće dźěłowych městnow chce město Budyšin hač do klětušeho lěća w swojich pěstowarnjach wottwarić. Přičina toho su spadowace ličby dźěći w přebywanišćach. Zo njebychu přistajenym wupowědźić trjebali, chce město kubłarkam a nawodnicam dobrowólne zběhnjenske zrěčenja poskićić. Jutře měšćanska rada rozsudźi, kelko wotnamakanja ma so jim w tym zwisku płaćić.

Wukubłanje wotzamknyli

Radwor (MkWj/SN). We wobłuku swjatočnosće su minjeny pjatk w Radworju wjelelětneho dirigenta tamnišeho chóra Meja Achima Brankačka składnostnje jeho­ 100. posmjertnych narodnin počesćili. Nimale 50 zajimcow bě za to do Stareje cyrkwički přichwatało. Tam chowaja nasćěnowej kamjentnej plaće, na kotrymajž su mjena zasłužbnych Radworskich wótčincow minjenych lětstotkow zadypane. Wotnětka je tam tež Achim Brankačk zwěčnjeny. Mjez přitomnymi běchu nimo něhdyšich spěwarjow a zajimo­wanych Radworčanow tež syn počesćeneho, Stanisław­ Brankačk z mandźelskej, wnučk Měrko kaž tež bratr Jakub Brankačk. Radworski­ chór Meja, kotryž je lěta 2013 zemrěty Achim Brankačk na wšě 47 lět dirigował a wuměłsce nawjedował, wob­rubi ze swojim tuchwilnym dirigentom Pětrom Cyžom dostojnu swjatočnosć. Wosadny farar Beno Jakubaš kamjentnu taflu z nowym zapiskom žohnowaše. Iniciatiwu za zapisanje Achima Brankačka na lisćinje wótčincow nastorčił je Měrkowčan Marko Hančik na jednej z hłownych zhromadźiznow chóra. To předsyda Daniel Henich přitomnym přeradźi.