Publikumej sčasami dych wotrazył
Budyšin (CS/SN). Wón je bohužel přerědko w swojim ródnym měsće Budyšinje, rjekny dźiwadźelnik Roman Knižka minjeny štwórtk wopytowarjam zarjadowanja „Ich hatte einst ein schönes Vaterland“ w Budyskim wopomnišću. Wone wotmě so we wobłuku Lěta židowskeje kultury w Sakskej TACHELES. Tacheles woznamjenja, wotewrjenje a cyle direktnje wo bytostnym rěčeć. Ze swojim programom, kotrehož hesło je wuprajenje Heinricha Heiny, zwjaza dźiwadźelnik čas wot 18. lětstotka hač do přitomnosće ze swědkami židowskeho žiwjenja w Němskej. Přewodźał je jeho kwintet Opus 45, kotryž interpretowaše židowsku hudźbu.
Tójšto ludźi je wčera na dnju wotewrjenych zahrodow składnosć ...
Hudźbnicy přihladowarjow zahorili
Krótkopowěsće (08.06.26)
Podhladnaj zajataj
Zhorjelc. Tři tydźenje po sypnjenju chěže w Zhorjelcu staj pozdatnaj skućićelej, kiž staj njezbožo zawinowałoj, hižo zajataj. Podhladnaj staj pozdatnje w pincy domu roły wobškodźiłoj abo manipulowałoj. Polak a Afghana nětko w přepytowanskim jastwje sedźitaj, policija zdźěli. Zastojnicy dale za slědami pytaja a swědkow namołwjeja so přizjewić.
Gymnazij a dźiwadło kooperujetej
Budyšin. Němsko-Serbske ludowe dźiwadło a Serbski gymnazij Budyšin prezentujetej 24. junija wuslědk kooperaciskeho projekta „Domizna“. Šulerki a šulerjo 9. lětnika běchu so minjene měsacy z titulnej temu zaběrali a na tutym zakładźe inscenaciju wuwili. Zdobom NSLDź zdźěli, zo kooperaciju z kubłanišćom w nowym šulskim lěće pokročuje, a to pod samsnym hesłom z dohromady 77 wobdźělnikami.
Lisćinu žadanjow přepodali
W małej kupjeli zahaja sezonu
Nowy Miłoraz (AK/SN). Póndźelu, 8. junija, započnje so lětuša kupanska sezona w nowonatwarjenej małej kupjeli w Nowym Miłorazu. To zdźěli twarski zamołwity Slepjanskeje gmejny Steffen Seidlich na zašłym posedźenju gmejnskeje rady. W kupjeli je mjeztym tež oficialnje dowolene, rumnosć za prěnju pomoc wužiwać. Strowotniski zarjad Zhorjelskeho wokrjesa wodu wobstajnje pruwuje. Hakle minjene dny su w tym zwisku proby přepytowali. Lětsa změja štyrjoch dohladowarjow, kotřiž so wo wěstotu hosći staraja a sezonu zaruča, Seidlich informowaše. Mała kupjel je jedna z naprawow wotškódnjenja přez LEAG za hač do kónca lěta 2024 přesydlenu wjes Miłoraz.
Kupjel su loni spočatk awgusta přepodali. Zastup za dźěći płaći 1 euro a za dorosćenych 2,50 eurow. Nowa kupjel je trochu mjeńša hač ta w starym Miłorazu. Basenk je 13 metrow dołhi, 6,4 metry šěroki a mjez 0,8 a 1,35 metrow hłuboki.
Wo hrajkanišću zahorjene byli
Wotrow. Składnostnje dnja dźěsća je Wotrowska pěstowarnja „Dźěćacy raj“ w nošerstwje Serbskeho šulskeho towarstwa swojim chowancam rjanu překwapjenku wobradźiła. Ze swojimi kubłarkami dojědźechu sej holcy a hólcy do Ramnowa na wulke hrajkanišćo pod třěchu.
Hižo jězba z busom bě přewšo zajimawa. Po puću wobdźiwachu młodźi pasažěrojo traktory, nakładne awta a wulke kranowe jězdźidło.
Wulke hrajkanišćo z krosnowadłom, suwadłom a awtkami k jězdźenju dźěći hnydom zahori. Tež wotdźěl za žłobikowe dźěći skićeše wulkotne móžnosće sej hrajkać. Někotrym so wosebje tołsta roła lubješe. Ju móžachu z bulikami napjelnić, kotrež horjeka zaso won třělachu. Za zastaranje njemějachu jenož mały přikusk sobu, ale dóstachu tež wobjed, kiž je kuchnja klóštra Marijina hwězda do Ramnowa dowjezła. Hańžka Nawcyna
W přizjewjerni termin trěbny
Kamjenc. Přizjewjernja za jězdźidła a jězbne dowolnosće w Kamjencu přetwara dla wot 8. hač do 26. junija jenož we wobmjezowanej měrje dźěła. W tym času naležnosće wobydlerjow jenož wobdźěłaja, hdyž je sej něchtó do toho termin wučinił. Za chwatne naležnosće měli so wobydlerjo na přizjewjernju w Budyšinje wobroćić.
Dźěći steja w srjedźišću
Wojerecy. Měšćanski dźeń dźěsća přewjedu njedźelu, 7. junija, we Wojerecach. Wot 10 do 18 hodź. su swójby z dźěćimi do zwěrjenca a hrodu přeprošene, hdźež su organizatorojo wotměnjaty program z hrami, kreatiwnej zaběru a dyrdomdejom přihotowali. Zastup płaći na dźěćo 7, na dorosćeneho 11,50 a za swójby 23 eurow.
Radźićeljo wuradźuja
Pančicy-Kukow. Přichodna zjawna zhromadźizna zarjadniskeho zwjazka Při Klóšterskej wodźe wotměje so wutoru, 9. junija, w 19 hodź. w sydarni twarjenja zarjadniskeho zwjazka w Pančicach-Kukowje. Nimo změny plana wužiwanja ležownosćow zaběraja so zastupjerjo přisłušnych gmejnow z nastajenjom komunalneho plana za ćopłotu. Wšitcy su wutrobnje přeprošeni.
Porěča wo forumje wědy
Policija (05.06.26)
Druheho awta dla do štoma prasnył
Hlinowc. Na statnej dróze S 100 ze směra Pančicy-Kukow dyrbješe so předwčerawšim rano krótko před Hlinowcom 23lětny wodźer awta typa Volvo druhemu jězdźidłu wuwinyć, zo njeby do njeho zrazył. Při tym prasny na prawej kromje jězdnje do štoma. Tamne awto so zhubi. Zranił so na zbožo nichtó njeje, škoda pak wučinja něhdźe 13 000 eurow.
Zwučuja za beneficny koncert
Budyšin (LM/SN). W awli Budyskeho Schilleroweho gymnazija je so předwčerawšim prěnja proba chóroweje akademije serwisoweho kluba Rotary Bautzen-Budyšin wotměła. Pod nawodom Friedemanna Böhme nazwučuje něhdźe 60 spěwarkow a spěwarjow hač do nazymy program za beneficny koncert. Mjez druhim su to twórby z cyklusa „Počasy“ Korle Awgusta Kocora a Handrija Zejlerja kaž tež moteta „Exsultate jubilate“ Wolfganga Amadeusu Mozarta. Je to hižo pjaty raz, zo so chórowa akademija wotměje.
Towarstwo z nowymaj předsydkomaj
Spěchowanske towarstwo serbskeju šulow we Worklecach měri so z nowymaj předsydkomaj na mnohe nadawki, kiž čłonkam a čłonam w přichodnym času do rukow hladaja.
Worklecy (SN/MG). Antje Bobcyna woteda swoje zastojnstwo na čole Spěchowanskeho towarstwa serbskeje šule we Worklecach. Mnohe lěta bě so jako předsydka wo to postarała, zo dóstawa wosebje wyša šula přidatnu financielnu podpěru. Strowotniskich problemow dla pak nadawk hižo wukonjeć njemóže. Na hłownej a wólbnej zhromadźiznje wuzwolichu čłonki a čłonojo minjenu wutoru Janu Mejglowu a Janu Šustrowu za nowu dwójku na čole towarstwa. Wo financy stara so Daniela Ćemjerowa, kotraž bě nadawk hižo minjene lěta wukonjała.
