Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (58)

Před něšto časom je mi znaty foto pósłał, na kotrymž bě na wěstym blaku na kožuchu młodeje jałojcy kožana kulka widźeć. Něhdźe dwaj centimetraj wulka kulka bě njejapcy narostła a bě kruće z kožu zwěrjeća zrosćena. Wobsedźer chcyše nětko wědźeć, što to je, hač wjace tajkich kulkow nastawa a hač měł so tohodla starosćić.

Zasadnje je diagnostika ryzy přez foto łoskoćiwa naležnosć. Hakle na městnje móžeš pad jasnje přepytować. W najlěpšim padźe sćele so proba podhladneje włokniny (Gewebe) do labora. Tam wobhladuja sebi specialisća bańki a móža na zakładźe wuslědka rjec, wo kajki zróstk so jedna. Tola někotre chorosće skića jara jasny wobraz a su typiske za wěste družiny skotu.