Wopomnjenski kamjeń wotkryli
Z wotkryćom wopomnjenskeho kamjenja na kěrchowje w Trjebinje su minjeny štwórtk rjad swjatočnosćow składnostnje 115. posmjertnych narodnin zasłužbneho dudaka Hanza Šustera zahajili.
Trjebin (JoS/SN). Angelika Bertkowa, wnučka serbskeho dudaka a wjelelětneho čłona instrumentalneje skupiny Serbskeho folklorneho ansambla Slepo Hanza Šustera běše loni Trjebinsku Domowinsku skupinu narěčała, hač njemóhła jej pomhać, na městnje rowa swojeho dźěda wopomnišćo stworić. Po 30 lětach běše čas wužiwanja rowa wuběžał. Předsydstwo Domowinskeje skupiny jeje namjet podpěrowaše, runje tak tež wjesnjanosta Trjebinskeje gmejny Robert Sprejz (CDU).
Nukstock tola njeje mortwy!
180 fanow metal-hudźby w Nuknicy na festiwalu „Lěz mi na pěc“ swjećiło
Nuknica (PaC/SN). Štóž běše kónc tydźenja we wokolinje Nuknicy a Chrósćic po puću, je cyle wěsće zwuki elektriskich gitarow, bijadłow a swojorazne spěwanje słyšał, kotrež skerje na škrěčenje dopomina. Tute wašnje spěwanja hudźbneho stila metala mjenuje so woprawdźe „screaming“ abo „shouting“, štož woznamjenja serbsce škrěčenje. Prěni raz je so kónc tydźenja festiwal twjerdeje hudźby z titlom „Lěz mi na pěc“ na Jaworkec dworje w Nuknicy wotměł.
„Nukstock is dead“ (serbsce: Nukstock je mortwy) bě na zastupnym banćiku napisane. „Ach, to běše jenož mały žorćik“, wotmołwi čłon organizaciskeho teama festiwala Měrćin Wjenk na naprašowanje, što za tym tči. „Poprawom wšak nadeńdźeš wjele elementow něhdyšeho Nukstock-festiwala tež na lětušim zarjadowanju, tak na přikład party-stan, baru abo kuchnju. Wjelelětni swěrni fanojo-wopytowarjo festiwala móža so tuž tež lětsa, na mjeńšej wersiji zarjadowanja, doma čuć“, Měrćin Wjenk přispomni.
Krótkopowěsće (01.09.25)
Ludźo ze stejnišćom zwjazani
Čorna Pumpa. Něhdźe 17 850 hosći bě zawčerawšim na dnju wotewrjenych duri na 70lětne wobstaće industrijneho parka w Čornej Pumpje zhladowało. Ličba wotbłyšćuje wusku zwjazanosć ludźi ze stejnišćom a je dobry signal z Łužicy, su sej organizatorojo zarjadowanja přezjedni. Hesło dnja bě „Zańdźenosć zetka přichod“. W industrijnym parku je 120 předewzaćow zaměstnjenych.
Za zachowanje lěsa
Rowno. Skupina Serbska reja je wčera na zarjadowanju wobswětoweje skupiny Choćebuz we wohroženym lěsu pola Rownoho hudźiła a spěwała. Mnozy přitomni, mjez kotrymiž běchu wjacore swójby, su sobu spěwali a rejowali. Fararka Slepjanskeje wosady Jadwiga Malinkowa bě na němsko-serbsku nutrnosć přeprosyła. Mjez štomami běchu grafiki wuměłče Maje Nageloweje wustajene.
Bio-zawody so předstaja
Kónc ponowjenja schodow so dliji
Rjedźenski nastroj schwalili
Róžant (SN/MiP). Radźićeljo gmejny Ralbicy-Róžant su so wčera w Róžeńće na swoje posedźenje zešli. Schwalili su nakup noweho nastroja za rjedźenje hrjebjow a rěčkow. Štyri předewzaća běchu gmejnje za to poskitk předpołožili. Radźićeljo su so za najtuńši poskitk z wobjimom 9996 eurow firmy BayWa AG z Niedercunnersdorfa rozsudźili. Dale su radźićeljo změnje plana wužiwanja ležownosćow zarjadniskeho zwjazka „Při Klóšterskej wodźe“ přihłosowali. Tole potrjechi na přikład ležownosć w Sernjanach.
Z mytom šulski dwór ponowja
Zakładna šula we Wulkich Zdźarach 65 000 eurow we wubědźowanju dobyła
Wulke Ždźary (AK/SN). Zakładna šula „Při Hórnikečanskim jězoru“ we Wulkich Ždźarach je sej lětsa we wubědźowanju idejow „Klima 2025“, kotrež běše Sakski krajny zarjad za wobswět, ratarstwo a geologiju (LfULG) wupisało, 65 000 eurow mytowanskich pjenjez wudobyła. Z tutej sumu chce swój šulski dwór ponowić.
Łazowscy gmejnscy radźićeljo su w awgusće wotpowědny projektny plan jednohłósnje wobzamknyli. Projekt ma so wot februara 2026 hač do apryla 2027 zrealizować.
„We wubědźowanju su ideje za naprawy pytali, z kotrymiž móhło so horcoće, suchoće, sylnemu dešćej abo wětrej kaž tež eroziji w našim wobswěće zadźěwać a kiž z tym našu strowotu přisporjeja“, wjesnjanosta Łazowskeje gmejny Thomas Leberecht (CDU) na posedźenju wuswětli. Zhromadnje ze šulerjemi a wučerjemi je gmejna koncept z titulom „Naša zelena přestawka“ nadźěłała, kotryž jurorow wubědźowanja přeswědči.
Wjesny swjedźeń we Wotrowje
Wotrow. Wotrowčenjo swjeća kónc tydźenja swój wjesny swjedźeń. Z natočenjom piwa zarjadowanje pjatk we 18 hodź. zahaja. Sobotu wotměje so wot 15 hodź. mjez druhim wolejbulowy turněr. Wječor w 20 hodź. chce wjesna młodźina hosći z programom zawjeselić. Njedźelu poskićuja nimo rańšeho piwka tež wobjed. Popołdnju so wohnjowi wobornicy wubědźuja.
Słuchohra we Łužiskim centeru
Wojerecy. Marija Šołćic, motiwatorka za serbsku rěč we Wojerowskej kónčinje, přeproša njedźelu, 31. awgusta, w 14 hodź. do Łužiskeho centera na wotewrjenje wustajeńcy składnostnje jeho 30lětneho wobstaća. Mjez eksponatami je tež štom bajow, z kotrehož zaklinči serbsko-němska słuchohra. Dialogi za to su wobdźělnicy intensiwneho kursa serbšćiny DOMOJ po třoch a poł měsacach wučby nahrawali.
Wjesela so na konjacy turněr
Hórki. Na lětušim turněrje konjaceho sporta w Hórkach wubědźuje so kónc tydźenja dohromady 160 jěcharjow ze Sakskeje, Braniborskeje a Durinskeje. Wo titul sakskeho mištra a mišterki w mnohostronskim jěchanju wojuje dohromady 17 jěcharjow, mjez nimi třo z domjaceho jěchanskeho towarstwa „Při Klóšterskej wodźe“ w Pančicach-Kukowje. To su Franciska Bobkec, Hana Brězanec a Jurij Bobka.
„Je trochu škoda, zo schorjenja konja abo jěcharja dla někotři lokalni matadorojo lětsa w boju wo mišterstwa pódla njejsu“, informuje předsydka towarstwa Sandra Berndtowa. To su mjez druhim Jakub a Pětr Bobka kaž tež Křesćan Zahrodnik. Najebać to wjeseli so wona nad dohromady 17 jěcharjemi ze swójskeho towarstwa – wot třilětneho pjeracha hač k seniorej, kiž so na wšelakich pruwowanjach turněra wobdźěla. Nowostka na lětušim turněrje je, zo spožči zarjadowar myto za fairny wobchad z konjom.
Wšojedne hač z papjeru, filcom, wóskom, drjewom abo płatom – ...
Krótkopowěsće (29.08.25)
Dale a wjac chorhojow
Wjazońca. Před radnicu we Wjazońcy wisaja wot wčerawšeho chorhoje Němskeje, Sakskeje a gmejny. Tole wobkrući nam Dominik Hampel, předsyda frakcije AfD w gmejnskej radźe, kotraž je to zawčerawšim na namjet AfD z 13 hłosami a jednym hłosawzdaćom rozsudźiła. Přikład bě radźe wobzamknjenje wokrjesa za šule jako „wuznaće k domiznje a Zwjazkowej republice Němskej“, tak Hampel.
Realne mzdy stupaja
Kamjenc. Přistajeni w Sakskej móža sej wot swojich dochodow wjace popřeć. Přerězna realna mzda je wot apryla hač do kónca junija porno předchadźacej dobje w lěće 2024 wo 2,2 procentaj stupała, krajny zarjad za statistiku w Kamjencu dźensa zdźěli. Trend stupacych realnych mzdow dale traje.
Wubědźowanje zahajene
Budyšin. Marketingowa towaršnosć Hornja Łužica-Delnja Šleska je zawčerawšim namołwu za Hornjołužiske předewzaćelske myto wozjewiła. Ćežišćo wubědźowanja su lětsa fachowcy. Za myto móža so předewzaća přizjewić abo namjetować, kotrež z dobrymi idejemi a zmužitosću přeswědčeja a ludźi z tym zahorjeja. Myto spožčeja hižo wot lěta 1996.
