Nowe nadawki hižo čakaja
Njebjelčanska gmejna zhladuje na wuspěšne lěto 2025
Njebjelčicy (JK/SN). Na lońšim poslednim posedźenju Njebjelčanskeje gmejnskeje rady w nowembru je wjesnjanosta André Bulank (njestronjan) dźěławosć gremija a gmejnskeho zarjadnistwa w lěće 2025 bilancował. Byrnjež gmejna z wulkimi hospodarskimi wužadanjemi wojować měła, móže so to, štož su minjene lěto na dobro wobydlerjow zwoprawdźili, widźeć dać. To dźě njeje runje mało a pokazuje, što móže zaměrne dźěło a přezjedne postupowanje zamołwitych a dobrowólnych pomocnikow wuskutkować.
Z wulkim praskanjom do noweho lěta
Poslednje hodźiny stareho a prěnje noweho lěta kóždy na swoje wašnje dožiwja. Naša swobodna awtorka je so w Budyšinje rozhladowała, kak ludźo tule stare lěto rozžohnowachu, nowe lěto witachu a kak ze silwesterskimi praskotakami wobchadźachu.
Silwester je so za mnohich Budyšanow hižo jara zahe započał, mjenujcy 29. decembra. Tón dźeń započachu tu kaž wšudźe druhdźe w kraju praskotaki předawać. Někotryžkuli njemóžeše dočakać a hižo samsny wječor praskać započa. A přichodny dźeń respektiwnje w nocy na to móhł sej čłowjek myslić, zo je silwester tónraz zašo.
Porno tomu bě w běhu 31. decembra najprjedy raz trochu měrnišo. Wodnjo je so rjenje sněžiło, wječor pak bě wjedro skerje mokre, wětřikojte a zymne – žane idealne wuměnjenja to za silwesterske praskanje. Tak bě hodźinu do połnocy na hasach a naměstach poměrnje mało ludźi, štož snano tež na zdźěla hładkich pućach a chódnikach zaležeše. Něchtóžkuli sej radšo do jednoho z hosćencow wućekny abo dźěše do Dźiwadła na hrodźe, hdźež so silwesterski swjedźeń wotmě. Wulki dźěl hosćencow w starym měsće pak njebě wočinjeny.
Hanka Rjelcyna, Jadwiga Kaulfürstowa, Fabian Kaulfürst a Marek ...
W młodźinskich klubach wolili
Krótkopowěsće (02.01.26)
Zwěrjenc z trěbnej ličbu hosći
Běła Woda. Njehladajo na „dešćikojte nalěćo a pancate prózdninske dny“ je Běłowodźanski zwěrjenc z minjenej sezonu spokojom. Dohromady zličichu loni wjace hač 40 000 wopytowarjow, štož je po informacijach ze stron institucije „wažne, zo njetrjebali so spěchowanske pjenjezy w hódnoće cyłkownje 104 000 eurow podźělnje wróćo płaćić“. Tele srědki su na ličbu wopytowarjow wjazane.
Kwota budźe stupać
Kamjenica. Wuhlady za dźěłowe wiki su w nowym lěće dosć špatne. Wjednik regionalneje wotnožki zwjazkoweje agentury za dźěło w Sakskej Klaus Peter Hansen je sej wěsty, zo budźe ličba bjezdźěłnych stupać. Wosebje za młodych ludźi riziko bjezdźěłnosće spochi přiběra. „Budźemy so na kwotu bjezdźěłnych 7,X zwučić dyrbjeć“, měni Hansen.
Dwělomna inspiracija z USA
Koncertuja na kóncu lěta
Baćoń. Na kónclětny koncert přeprošuje Baćońska wosada srjedu, 31. decembra, w 17 hodź. do swojeje cyrkwje. Lětsa wuhotuja jón Rjelkec mandźelskaj Hanka a Marek kaž tež Kaulfürstec mandźelskaj Jadwiga a Fabian.
... a na spočatku noweho
Radwor. Chór Meja přeprošuje wšitkich zajimcow wutrobnje na swój nowolětny koncert, kotryž budźe sobotu, 3. januara, we 18 hodź. w Radworskim hosćencu „Meja“. Spěwajo chcedźa tónraz na tradicije a wašnja Serbow w zymskim času zhladować. Přizamknu so reje.
Cyrkwinski chór zaspěwa
Chrósćicy. Tradicionalny hodowny koncert Chróšćanskeho cyrkwinskeho chóra wotměje so njedźelu, 4. januara, w 14 hodź. w Chróšćanskej cyrkwi. Mjez druhim zaklinči čěski hodowny cyklus. Wšitcy lubowarjo serbskeho chóroweho spěwa su wutrobnje přeprošeni.
Ćěło a duch zesylnjeć
Božemje hodam z punk rockom
Festiwalej so dale wotmějetej
Gmejna zwoprawdźa swój strategijowy koncept za turizm
Hamor (AK/SN). Při Bjerwałdskim jězoru smětej so zarjadowani pod hołym njebjom dale wotměwać. Při tym jedna so wo festiwalej HOLI na Hamorskim pobrjohu a Break the Rules na Klětnjanskim pobrjohu. To je wjetšina Hamorskeje gmejnskeje rady na swojim zašłym posedźenju wobzamknyła. Najprjedy raz hač do lěta 2029 gmejna woběmaj zarjadowanjomaj dale podpěru přilubi. Zakład je strategijowy koncept za turizm při Bjerwałdskim jězoru. Za potrjechene ležownosće ma so kóžde lěto wužiwanske zrěčenje mjez zarjadowarjom a gmejnu wotzamknyć. Nimo toho so zarjadowar zawjaza, najpozdźišo hač do spočatka 2027 wotnožku w Hamoru wotewrjeć a w gmejnje přemysło přizjewić.
Policija (30.12.25)
Wobšudnikam njewěrili
Budyšin. We Wojerecach a w Budyšinje su njeznaći njedźelu wječor spytali, ludźom pjenjezy wulišćić. Při telefonje wudawachu so jako policisća a powědachu, zo je rumunska cwólba po puću a zo chce so do bydlenjow zadobyć. Jako so wobšudnicy ludźi prašachu, kelko pjenjez doma maja, kedźbliwi wobydlerjo telefonat skónčichu.
Kamin pokradnyli
Njezdašecy. Zahrodowy domčk bě minjene dny cil paduchow w Njezdašecach. Tam pokradnychu mjez druhim kamin, wuheń z wocla, ručicy za durje, boiler za ćopłu wodu a dalše wěcy. Škoda wučinja něhdźe 12 500 eurow.
Zwyša podruž za garaže
Wojerecy (AK/SN). Podruž za swoje garaže chce město Wojerecy klětu zwyšić. „Nadźijamy so přidatnych dochodow něhdźe 944 000 eurow“, rozłoži twarski zamołwity města Dietmar Wolf. Pozadk je wobzamknjenje měšćanskeje rady z junija 2025, z čimž dźěl hospodarskeho strukturneho koncepta zwoprawdźa. „Najwjetši dźěl podružnych zrěčenjow so 35 lět změnił njeje“, Dietmar Wolf wuzběhny. „Dohromady mamy 890 zrěčenjow za jednotliwe garaže a 26 zrěčenjow za garažowe zjednoćenstwa. Wšitke smy přepruwowali. Dotal mějachmy 223 000 eurow dochodow. Z nowymi płaćiznami wočakujemy 1,167 milionow eurow dochodow, potajkim 944 000 eurow wjace hač dotal. Město Wojerecy wobsedźi cyłkownje 6 700 garažow.
Podruž za jednotliwu garažu w měsće ma wob lěto 180 eurow płaćić, to je 15 eurow měsačnje. Na kromje města je podruž trochu niša a płaći 13,50 eurow měsačnje. W parkowanskim domje na Łućanskej dróze płaći jedne městno přichodnje měsačnje 17 eurow. 300 městnow tam Wojerecy dohromady ma. Swoje dotalne garaže chce město na kóždy pad wobchować, tak Wolf. Zawěsćene pak dyrbi być, zo podružnicy wěsće k swojim garažam přijědu.
