Chorym a strowym na dobro
Wojerecy (KD/SN). Poskitki strowotniskeho zarjada Budyskeho wokrjesa su kóždemu – wšojedne hač je chory abo strowy – na dobro. Mnozy pak wo najwšelakorišich nadawkach tamnišich sobudźěłaćerjow wjele njewědźa. „Tohodla zajimcam na dnju strowotniskeho zarjada wšitke swoje štyri wotrjady předstajamy“, praji nawodnica zarjada dr. med. Jana Gärtner. Wona přispomni, zo móža wobydlerjo Budyskeho wokrjesa sobudźěłaćerjow wšitkich fachowych wobłukow na stejnišćach w Budyšinje, Kamjencu a Wojerecach stajnje narěčeć. Kontaktne daty nadeńdu online na .
Wuznawa so k serbstwu
Wóslink (SN/mb). Gmejnska rada Wóslinka je srjedu wobzamknyła, zo ma so dalšich sydom z dźewjeć wjesnych dźělow serbskemu sydlenskemu rumej přizamknyć. Jitro (Milstrich), ródna wjeska komponista Bjarnata Krawca, hižo do serbskeho teritorija słuša. Tajka próstwa zašłe lětdźesatki ze žaneje gmejny dóšła njeje, kaž nam wjelelětna serbska politikarka CDU Marja Michałkowa wobkrući. Předsyda Domowiny Dawid Statnik dźakuje so w zdźělence gmejnskej radźe a wjesnym radam za wuznaće k serbskej rěči, kulturje a stawiznam.
„Wjeselu so, zo smy jednohłósny pozitiwny rozsud tworili. Mamy serbsce rěčacych wobydlerjow. Jich kulturna identita so respektuje. Zhromadnje pěstujemy serbske tradicije, kaž mejestajenje abo camprowanje. Nimo toho poskića so wučba serbšćiny na swobodnymaj křesćanskimaj šulomaj we Wóslinku“, tak wjesnjanosta Johannes Nitzsche, kotryž je tež naměstnik předsydy frakcije AfD w Budyskim wokrjesnym sejmiku.
Zakład wobzamknjenja běchu pokiwy serbskich wobydlerjow. Někotři sćelu dźěći na serbsku wyšu šulu do Ralbic.
Krótkopowěsće (21.03.25)
W Sakskej rady piwo warja
Berlin/ Drježdźany. Po cyłej Němskej je dźeń a mjenje piwarnjow, nawopak je tomu w Sakskej. Wot lěta 2019 do 2024 bu w zwjazkowym kraju dohromady sydom nowych piwarnjow wotewrjenych. Tole zdźěli Zwjazk piwarcow Němskeje, kiž so na nachwilne daty Zwjazkoweho zarjada za statistiku powołuje. Cyłkownje wobsteji w Sakskej 84 piwarnjow.
Po jězoru nětko tež z čołmom
Drježdźany/Bjerwałd. Sakska krajna direkcija je z powšitkownymaj wukazomaj trajne wužiwanje Bjerwałdskeho jězora za čołmy dowoliła. Wot 1. apryla móža jězor tuž wšitcy z čołmom wužiwać, wšojedne hač ma čołm motor abo nic. Z cyłkownej płoninu 13 kwadratnych kilometrow je něhdyša brunicowa jama najwjetši jězor Sakskeje.
„Šćežka Goetheho“ nastawa
Policija (20.03.25)
Njewuspěšny paduch
Połčnica. Wočiwidnje jara aktiwneho paducha je Kamjenska policija wutoru popołdnju w Połčnicy zajała. Předawarjo twarskich wikow su muža při tym wobkedźbowali, kak je sej wšelake rjemjeslniske mašiny a graty skradźu do wačoka tyknył. Jako chcyše paduch předawanišćo bjez zapłaćenja wopušćić, jeho narěčachu – wón pak twochny. Wjacori předawarjo a kupcy jeho přesćěhowachu. Wón pak jim znowa ze swojim awtom twochny. Mjeztym jemu tež informowani policisća sćěhowachu. Skónčnje nadeńdźechu awto paducha při Dróze Połčničanski doł. Swědk informowaše zastojnikow, zo je skućićel podłu rěčki Połčnicy do směra na Kinspork ćeknył. Dołho njetraješe, zo policisća 37lětneho Georgičana popadnychu a zajachu. Cyłkowna hódnota rubjenych tworow, kotrež w jeho awće nadeńdźechu, wučinja 5 000 eurow.
Młode wuměłstwo z Wojerec
Wojerecy. Wot pjatka, 21. měrca, prezentuja dwanatkarjo Wojerowskeho gymnazija Leóna Foucaulta wosebitu wustajeńcu pod titulom „Mjez rjejenjom a mjelčenjom“. Přehladka předstaja twórby młodych talentow we wuměłskich wobłukach molerstwo, grafika, měšana technika, plastika a objektowe wuměłstwo. Hižo wjele lět spěchuja zamołwići na šuli wuměłsce nadarjenych šulerjow. Wustajeńca w gymnaziju je za zjawnosć w šulskim času přistupna.
Alafia ensemble koncertuje
Budyšin. Na přichodnym zarjadowanju w rjedźe Budyskich komornych koncertow na žurli Budyskeho Serbskeho muzeja wustupi renoměrowany Alafia Ensemble a to sobotu, 22. měrca, w 19.30 hodź. Šěsć hudźbnikow z jara rozdźělnymi kulturnymi korjenjemi zwjazuje klasiska hudźbna tradicija, kotruž na inowatiwne wašnje interpretuja a kotruž regionalna hudźba wowliwuje. Zastupny lisćik w Budyskej turistiskej informaciji płaći 16, potuńšeny 13 eurow. Skazać móžeće jón tam pod telefoniskim čisłom 03591-42016. Zastup na wječoru předstajenja płaći 18 respektiwnje 15 eurow.
Drjewo za zymu nadźěłali
Stabilny hospodarski fundament
Rakecy (JK/SN). Dalši wažny krok do směra zwoprawdźenja lětsa planowanych inwesticijow je na swojim wčerawšim posedźenju Rakečanska gmejnska rada zmištrowała. Wona je jednohłósnje nadawk za hłowne twarske dźěła za nowotwar gratownje wohnjoweje wobory w Stróži schwaliła. Wosom firmow běše poskitk za hruby twar zapodało. Jenož dwě pak stej planowane wudawki za tute předewzaće dodźeržałoj. Gmejnska rada je so doskónčnje za firmu HFS z Habrachćic rozsudźiła, kotraž budźe natwar za 234 200 eurow zwoprawdźić. Nowotwar gratownje chcyše gmejna hižo loni zahajić. Njepřizwolenych spěchowanskich srědkow dla je tute předewzaće na lětsa přestorčiła. Za to planowane srědki z lońšeho hospodarskeho plana přewza gmejna nětko do lětušeho, to je rada wčera wobzamknyła.
Namrěwstwo w dobrych rukach
Budyska hudźbna šula z koncertom na zasłužbnu wučerku spominała
Budyšin (CRM/SN). Loni we wysokej starobje 94 lět zemrěła je dr. Magdalene Kemlein. Na polu hudźbneho kubłanja w Budyšinje bě wona jara připóznata wosobina, kotraž zawostaji směrodajne slědy. Minjenu sobotu zarjadowa k jeje čestnemu wopomnjeću Wokrjesna hudźbna šula portretowy koncert w awli Schilleroweho gymnazija. Połni dźaka a z wjele radostnymi dopomnjenkami su generacije něhdyšich hudźbnych šulerjow a šulerkow kaž tež dalši hosćo přeprošenje na wopomnjenski koncert za hudźbnu pedagogowku, chórowu dirigentku a komponistku dr. Magdalene Kemlein sćěhowali.
Wona je wot lěta 1958 hač do lěta 1997 w hudźbnej šuli předewšěm hraće na klawěrje a hudźbnu teoriju wuwučowała kaž tež chóry nawjedowała. W lěće 1967 załožeše wona legendarny Holči komorny chór. Zahoriće spěwachu w nim tež serbske šulerki. Jako zastupowaca direktorka šule pěstowaše wona dobre kolegialne přećelstwo z direktorom Jurjom Winarjom.
Porjedźernja jara woblubowana
Poskitk brigady za wuporjedźenje we Wojerowskej Kulturnej fabrice (Kufa) je jara woblubowany. Jónu wob tydźeń reparuja w tamnišej dźěłarni skóncowane nastroje a wěcy. Nětko poskića tež přednoški z mediciniskim pozadkom.
Wojerecy (SiR/SN). Załožili su brigadu před třomi lětami na iniciatiwu Wojerowskeje přirady za seniorow a zbrašenych. Wotpohlad běše wobydlerjam pomoc za samopomoc poskićić, jim městno k dispoziciji stajić, hdźež sej nazhonjenja a wědu wuměnjeja. W porjedźenskej dźěłarni móža sej zajimcy defektne mjeńše nastroje, drasty, črije, kolesa abo ličaki z pomocu a nawodom čestnohamtskich fachowcow sporjedźeć. „Zdruha přisporja projekt wědomje za naslědnosć a lutowanje resursow. Chcemy pak ludźom tež zmysłapołnu zaběru zmóžnić, runje wuměnkarjam“, powěda iniciatorka projekta Gabriele Mark.
