Mjezynarodne myto Rudišej

Zhorjelc. Čěski spisowaćel Jaroslav Rudiš je z lawreatom lětušeho Mjezynarodneho mostoweho myta europskeho města Zhorjelc/Zgorzelec. Awtor „překročuje mjezy rěče, narodnosće, stawiznow a geografije, při čimž je ludźom stajnje přewšo bliski. Wón tematizuje často bolostne změny 20. a 21. lětstotka a wutworja tak rumy za reflektowanje zašłosće“, jury rozsud wobkruća.

Ćeže na internetnych stronach

Budyšin. Ludowe nakładnistwo Domowina skedźbni na to, zo ma tele dny ćeže z internetnymi stronami Serbskich Nowin, Noweho Casnika a Rozhlada. Fachowcy intensiwnje na rozrisanju dźěłaja. Abonenća Serbskich Nowin su informowani a dóstawaja wječornik jako pdf-ku.

Nowi wotnajerjo za kulturny dom

Na Sakskej šuli kamjenjećesarjow polěpša wukubłanske wuměnjenja

Zemicy-Tumicy (UM/SN). Zakładny kamjeń za rozšěrjenje Sakskeje šule za kamjenjećesarjow su njedawno w Zemicach-Tumicach połožili. Šula přisłuša Kamjenskemu powołanskošulskemu centrumej a je w nošerstwje Budyskeho wokrjesa. Wona je jedna z mało tajkich wukubłanišćow w Němskej. Wučomnicy přichadźeja z cyłeje wuchodneje Němskeje sem, zo bychu powołanje kamjenjećesarja abo socharja nawuknyli.

Krajny rada Udo Witschas (CDU) poda přehlad wo twarskim předewzaću. Z rozšěrjenjom nastanu dwě nowej rjadow­niskej rumnosći a awla w přizemju. Do nowotwara zapřija wulku pěc. Dale při­twarja halu, w kotrejž maja w přichodźe z kompjuterom wodźene CNC-mašiny wulke kamjenje rězać a wobdźěłać. Na te wašnje wukubłanje technisce rozšěrja, wobchowaja pak tradicionalne rjemjesło. Z tym takrjec błócko z techniku CNC zwjazaja, tak Witschas.

Něhdźe 40 lubowarjow chóroweho spěwanja je wčera zjawne zwučowanje Serbskeho muskeho chóra Delany w Konjecach wopytało­. Měnjateho wjedra dla njejsu mužojo pod hołym njebjom na dworje towarstwoweho domu probowali, ale pod třěchu při towarstwowym domje. Nimo serbskich klasikarjow a čěskich pěsnjow zaklinča na přeće hosći najnowši spěw „Domizna“ na melodiju­ hita Beatlesow „Yesterday“, za kotryž bě dirigent chóra Matej Kowar serbski tekst spisał. Tež nowy spěw su mužojo zwučować započeli a wězo su sej ze swojimi hosćimi wjacore serbske štučki zaspěwali. Foto: Ramona Wowčerjowa

Minjeny kónc tydźenja su Nowowješćenjo swój lětuši wjesny swjedźeń swjećili. Tři dny wočakowaše wopytowarjow wotměnjawy program ze sportowymi wu­bědźowanjemi, hudźbu, překwapjenkami a dobrej naladu. Na swjedźenišću witachu­ tójšto hosći ze wsy a z wokoliny.

Swjedźeń zahaji so z natočenjom piwa, při čimž so diskotekaraj Phase2 a DJ Savid wo hudźbu staraštaj. Hač do zažnych rańšich hodźin hosćo rozwólnje swje­ćachu a rejwachu. To bě radźeny start swjedźenskeho kónca tydźenja. Sobota steješe cyle w znamjenju hry, wjesela a zhromadnosće. Na klubowej olympiadźe měrješe sydom mustwow we wšelakich disciplinach swoje mocy. Hač při krosnowanju na walčkach słomy, při wubědźowanju z wotpadkowymi sudobjemi abo na dalšich stacijach – teamowy duch a wušiknosć běštej požadanej. Wosebity wjeršk bě rodejo na mechaniskim byku, kotryž wobdźělnikow a přihladowarjow w samsnej měrje zahori. Na kóncu so wospjet mustwo High5 přesadźi a z tym swój lońši titul wuspěšnje zakitowaše.