Za čołmikowanje so přizjewić
Worklecy. Serbscy młodostni su lětsa wospjet na zhromadny dekanatny wulět přeprošeni, kiž wotměje so njedźelu, 13. septembra. Z busom chcedźa sej do Sprjowjow (Sprey) pola Hamora dojěć. Tam budźe zhromadny nyšpor w tamnišej cyrkwi. Přizamknje so čołmikowanje z Čelnoho hač do Noweho Města nad Sprjewju. Tam wulět z grilowanjom při Ruhlec młynje wuklinči. Busy wotjědu w 12 hodź. mjez druhim z Kulowa kaž tež z Chrósćic, a pojědu potom wotpowědnje přizjewjenjam po wsach. Młodostni nawróća so wokoło 19.30 hodź. Přinošk wučinja na wobdźělnika 25 eurow, čłonojo serbskeho dekanatneho kružka kaž tež wobsedźerjo karty Juleica płaća pjeć eurow. Z tym su busowa jězba, padlowanje kaž tež meni k wječeri zapłaćene. Dalšu jědź móže sej kóždy při přizjewjenju skazać. Zajimcy měli so hač do póndźele, 10. awgusta, online přizjewić. Link je pod www.posol.de wozjewjeny.
Koncertuja na zahrodźe
Woswjeća jubilej wohnjoweje wobory
Hórki (SN/MWj). Na swoje 120lětne wobstaće zhladuje jutře, sobotu, dobrowólna wohnjowa wobora w Hórkach. Pětr Šołta, kotryž bě ju wot 2005 hač do 2017 nawjedował, je so ze stawiznami wobory dokładnje zaběrał. Oficialny załoženski datum bě 10. awgusta 1906. Tón dźeń su we wsy mału gratownju za klumpu, kotruž běchu hižo w meji samsneho lěta kupili, poswjećili. W chronice je wjele mjenow wobornikow zapisanych, kotřiž su so za wohnjowu woboru angažowali, a runje tak najwšelakoriše podawki, zasadźenja a zajimawosće.
Wiki rjemjesła wotměja so jutře, sobotu, wot 10 hodź. w Radworskim ...
Krótkopowěsće (26.06.26)
Inwestuja do kubłanja
Radeberg. Na bywšej ležownosći Eschebach w Radebergu nastawa moderna wotnožka Humboldtoweho gymnazija, hdźež ma přichodnje 500 šulerkow a šulerjow wot 5. do 7. lětnika wuknyć. Zakładny kamjeń za projekt Budyskeho wokrjesa su tam wčera połožili a z tym inwesticiju we wysokosći 23,3 milionow eurow zahajili. 12,1 milion eurow dochadźa ze spěchowanskich srědkow Sakskeje, 11,2 milionaj ma wokrjes Budyšin zwjesć.
Algi w spjatym jězorje
Budyšin. Budyski strowotniski zarjad tuchwilu wot kupanja při Budyskim spjatym jězorje wotradźa. Při kontrolach su sylne rozmnoženje módreje mokricy (Blaualge) zwěsćili. Na nje móhli wosebje dźěći a sensibelni ludźo reagować. Wosebje njeměli so ludźo kupać, hdźež je woda jasnje zelena. Na tutych městnach njeměli so dźěći ani hrajkać. Dalše poskitki při jězorje pak hodźa so wužiwać.
Chinjanam zrěčenje wupowědźa
W hrodźe rjeńšo kwasować
W Lichanju maja tři nowe městnosće za stawniske wěrowanja
Lichań (UM/SN). Hród we Wulkodubrawskim wjesnym dźělu Lichań (Spreewiese) je hižo wjele lět požadana adresa za kwasowanje. Dotal bě jenož dwór jako wěrowanske městno předwidźane. Tola Malešanska stawnica Juliane Barthe – do jeje wobwoda słušatej nimo Malešanskeje gmejny tež Wulkodubrawska a Radworska – pyta stajnje za nowymi móžnosćemi za najrjeńši dźeń w žiwjenju. W Lichanju je so wona wot wobsedźerja hrodu Paula Wehrleho po hrodźe a wokolnym parku wodźić dała a při tym hnydom tři nowe móžne městnosće namakała.
Policija (25.06.26)
Woduwarjaka dla spinać dyrbjała
Budyšin. Na Friedricha Wolfowej dyrbješe wutoru 45lětna žona z awtom mócnje spinać, dokelž před njej nadobo woduwarjak na puć padny. Přičina bě, zo so w bliskim bydlenju 30lětna žona z Ukrainy na něšto hóršeše a při tym kuchinski nastroj na puć ćisny. Tuž změje so wona nětko strašneho zasahnjenja do nadróžneho wobchada dla zamołwić.
Wuchowanska straža bórze hotowa
Šulerjo dźensa koncertuja
Radwor. Na žurli Radworskeho hosćenca „Meja“ wotměje so dźensa, štwórtk, we 18.30 hodź. lětuši lěćny koncert Radworskeje wotnožki Budyskeje wokrjesneje hudźbneje šule. Šulerki a šulerjo su wotměnjawy program spřihotowali. Solisća a ansamble hudźa zhromadnje ze swojimi wučerjemi. Mjez druhim wustupi dujerska band RadworBrass, kotraž jako wosebitosć zhromadnje z dorostowymi dujerjemi RadworBrassJuniors zahudźi. Dalši wjeršk budźe smyčkowy kwartet Unisono, kiž posledni raz wustupi.
Grit Lemke powjedźe po měsće
Wojerecy. Wosebity poskitk změja sobotu, 27. junija, we Wojerecach. Turistiska informacija přeprošuje zhromadnje z awtorku a filmowču Grit Lemke na měšćanske wodźenje na slědach jeje knihi „Kinder von Hoy“. Wone započnje so w 10 hodź. a powjedźe w běhu štyrjoch hodźinow po starym a nowym měsće. Na wubranych městnach porěči Grit Lemke wo ludźoch a stawiznach, kiž so w jeje knize jewja. Wodźenje zwjazuje literarne perspektiwy z měšćanskimi stawiznami a wosobinskimi dopomnjenkami. Zajimcy njech přizjewja so pod telefonowym čisłom 03571 2096170.
Po wjacorych lětach přinoški zwyša
Rakecy (JK/SN). Runje tak horco kaž bě wčera nawječor wonka, su w Rakečanskej gmejnskej radźe wo staršiskich přinoškach za Rakečansku pěstowarnju diskutowali. Wjacore lěta běchu přinoški njezměnjene. Nětko njeda so zwyšenje hižo wobeńć, wčera rěkaše. Stupace zawodowe kóšty, wosebje dla zwyšenja personalnych wudawkow, žadaja sej zwyšenje staršiskich přinoškow.
