Chrósćicy (hn/SN). Wot zašłeje soboty steji w Chrósćicach na nawsy zajimawy konstrukt mobilneje kapałki. Wosebity připowěšak ,,přeprošuje wšitkich nimo ducych zajimcow, do kapałki pokuknyć“, praji Claudia Kochowa, wobsedźerka kapałki, kotruž mjenuje wona ,,The moving chapel“ (pohibowaca so kapałka).

Wot lěta 2024 je so Claudia Kochowa z ideju nosyła, sej mobilnu kapałku jako připowěšak za swój transporter wutwarić. Lětsa w januarje sej z Freiburga pochadźaca swój són zwoprawdźi. Z pomocu swójby a přećelow natwari kapałku na koleskach. Wona wšak přiznawa, zo je jej druhdy chětro ćežko, so hladajo na swójbnych a přećelow, kiž wostanu doma, sama na puć podać. „Hdyž pak njebych sej tutón són zwoprawdźiła, njebych woměrje dale žiwa być móhła“, wona doda. Wot kónca februara je Claudia po cyłej Němskej po puću. Podłu Jakuboweho puća chce ze swojej mobilnej kapałku po móžnosći na wjele městnach pozastać a wobydlerjow a nimo ducych zwjeselić. Najwjetši són Claudije Kochoweje je, z njej hač do Jerusalema jěć, zo by ludźi tam k rozmołwje a modlitwje pohnuła.

Policiji z mejlku hrozył

Kinspork. K njewšědnemu zasadźenju policije je wutoru dopołdnja w Kinsporku dóšło. Tam bě dotal njeznaty muž mejlku napisał, w kotrejž rozprawješe wo rozbuchadłach we wěstym zawodźe. Policija bjerješe tele hroženje chutnje a po­trjecheny objekt přepyta. Při tym zasadźichu mjez druhim wosebje wukubłane psy. Někajke rozbuchadła pak namakali njejsu. Policija tónle pad hroženja jako njeskutk dale přepytuje.

Lejno (MDź/SN). Župa „Michał Hórnik“ Kamjenc je wutoru wjesnych chronikarjow do Lejnjanskeho hosćenca přeprosyła. Po lońšim wozrodźenju koła bě to jeho druhe zetkanje, rozłoži županka Diana Wowčerjowa. Hosćo běchu Anna Měrćinowa, Marhata Deleńkowa a Wito Bejmak ze Serbskeho instituta. Pod hes­łom „Žórła namakać a stawizny pisać“ předstajichu woni Serbsku centralnu biblioteku, Serbski kulturny archiw a dalše žórła, z kotrychž móža chronikarjo při swojim dźěle čerpać.