Hrózba jatby kreatiwitu njepodusyła
Budyšin (CS/SN). Swój program „Hudźba, hdźež je mjelčenje“ wo wosebitych lěhwach w NDR je Anna Barbara Kastelewicz njedawno w USA předstajiła. Připosłucharjo drje su jón ze zajimom sćěhowali, tema pak bě tam dospołnje njeznata. Wo wosebitych lěhwach, po Druhej swětowej wójnje w NDR wutworjenych, so pozdźišo ani w NDR ani w ZRN rěčało njeje. Program, kiž bu sobotu w Budyskim wopomnišću předstajeny, so tuž přećiwo zabyću měri.
Kaž nawodnica wopomnišća Silke Klewin rjekny, bě w NDR dźesać tajkich lěhwow. Dohromady 27 000 ludźi bě tam zajatych. 3 000 z nich swobodu hižo dožiwiło njeje. Po słowach Silke Klewin njeběchu to žane dźěłowe lěhwa. Nawopak. Jeći běchu k tomu zatamani, ničo nječinić. Spěwanje a kóždažkuli kultura běštej zakazanej. Wiolinistka Anna Barbara Kastelewicz, kotraž bě knihu „Hudźba, hdźež je mjelčenje“ wudała a z njeje citowaše, rjekny, zo běchu tele wobstejnosće sčasami tróšku wolóžene. To pak zaležeše jeničce na tym, zo njebě jasne, štó bě za lěhwa zamołwity.
Zahrodu ze wšěmi zmysłami dožiwić móžachu minjeny kónc ...
Krótkopowěsće (22.06.26)
Wobaraja so lutowanju
Choćebuz. Marburgski zwjazk lěkarjow Berlin/Braniborska je zhromadnje z dźěłarnistwom Verdi a personalnej radu medicinskeje uniwersity Łužica w Choćebuzu k tomu namołwjał, dźensa připołdnju před zachodom kliniki protestnu akciju přewjesć. Samsny čas je so tajke zarjadowanje na klinikumje w Frankfurće nad Wódru wotměło. Akcija měri so přećiwo nowemu zakonjej zwjazkoweho knježerstwa, po kotrymž maja chorownje lutowanske naprawy zwoprawdźić. Hospodarska situacija chorownjow móhła so z tym přiwótřić.
Namjety za myta zapodać
Budyšin. Namjety za wuznamjenjenje z Mytom Domowiny, Mytom Domowiny za dorost a čestnym znamješkom Domowiny móža zajimcy mytowanskemu wuběrkej hišće hač do 30. junija zapodać. Móžno je to na adresu Domowiny w Budyšinje abo z mejlku. Ludźo měli za to wotpowědny formular wužiwać. Mytowanske zarjadowanje budźe lětsa 9. oktobra w Budyšinje.
Přibrjóh Nysy přetwarja
Wobornicy wuspěšnje zwučowali
Financny zarjad klětu přećehnje
Budyšin (UM/SN). Wo přichodźe Semperoweje kaserny w Budyskim starym měsće njeje hišće ničo rozsudźene, po tym zo financny zarjad klětu z njeje wućehnje. Tole wuchadźa z wotmołwy sakskeho financneho ministra Christiana Piwarza na naprašowanje zapósłanca Sakskeho krajneho sejma Franka Peschela (AfD). „Po tuchwilnym stawje za objekt Serbske hrjebje 3 w Budyšinje žane dalše wužiwanje přez zarjady Swobodneho stata Sakskeje předwidźane njeje. Hač ma so twarjenje perspektiwisce za nadawki Swobodneho stata Sakskeje wužiwać abo hač so objekt předa, njeje hišće rozsudźene“, tak minister. Dom bu wot 1842 do 1844 po naćisku wuznamneho Drježdźanskeho architekta Gottfrieda Sempera natwarjeny. Wot lěta 1933 su jón z krótkimi přetorhnjenjemi jako financny zarjad wužiwali.
Kompozicije z jastwa zaklinča
Budyšin. Za mnohich jatych sowjetskeho wosebiteho lěhwa w Budyšinje bě hudźba wuraz nadźije, nutřkowneho spjećowanja a njezlemjeneje čłowjeskosće. Wona jim pomhaše, ćežki wšědny dźeń w lěhwje přetrać a swědči hač do dźensnišeho wo žiwjenskej woli jatych. Tak nastachu w tak mjenowanej „Žołtej bědźe“ kompozicije z njewšědnej wurazliwosću – bjez papjery a wołojnika, jeničce z pomjatka.
Tutym po 1945 nastatym a dotal mało znatym twórbam wěnuje so wiolinistka Anna Barbara Kastalewicz. We wobłuku swojeho doktorskeho dźěła je wona notowy material z wosebiteho lěhwa wotkryła, wědomostnje předźěłała a zjawnosći spřistupniła. Jutře, 20. junija, w 11 hodź. wona wubrane twórby w Budyskim wopomnišću na Weigangowej zanjese. Nimo toho rozłoži historiske pozadki kompozicijow a zarjaduje je do konteksta stawiznow lěhwa. Wiolinistku přewodźa pianist Jakub Schmidt. Zwisk mjez slědźenjom, wuměłstwom a kulturu dopomnjeća zmóžnja njewšědny přistup k dotal mało wobkedźbowanemu kapitlej němskich powójnskich stawiznow.
Policija (19.06.26)
W cyrkwi kradnyli
Njeswačidło. Njeprošenych wopytowarjow mějachu zawčerawšim w Njeswačanskej cyrkwi. Tam su njeznaći w času mjez 7.30 a 18.30 hodź. jałmožnicu pokradnyli. Kelko pjenjez w njej bě njeje znate. Wěcna škoda, kotruž běchu skućićeljo načinili, wučinja něhdźe 200 eurow, policija zdźěli.
Prezentuja najlěpše trumfy
K 725. jubilejej Grodka serbskej motiwaj na škotowych kartach
Grodk (JoS/SN). Za lubowarjow škota ma město Grodk składnostnje swojeje 725. róčnicy wosebitu překwapjenku, mjenujcy Grodkowske škotowe karty. Ideju za to zrodźił je Michael Apel wot Grodkowskeho kinoweho a kulturneho zawoda, kiž je zdobom župan župy Delnja Łužica. Z dobrym partnerom bě při tym wabjenska agentura Mädler ze susodneje Čorneje Pumpy. „Jako nas Michael Apel narěča, smy hnydom připrajili. Tajki wosebity nadawk dźě kóždy dźeń njedóstanješ“, jednaćel Ronald Mädler rozłoži.
Zapřahi wubědźuja so wo medalje
Chrósćicy (BeW/SN). Kołowokoło Fulkec hórki w Chrósćicach je so minjene dny z ludźimi a techniku jenož tak mjerwiło. Mnozy pomocnicy su tam dźěłali, trawu posykli, zadźěwki nastajeli, je wobarbili a wšo dalše spřihotowali, štož je za wulki podawk konjaceho sporta trěbne. Jutře a njedźelu so w Chrósćicach mjenujcy konjace zapřahi wubědźuja.
Mjeztym sedmy raz zarjaduje konjace sportowe towarstwo „Při Klóšterskej wodźe“ Pančicy-Kukow samostatny turněr za jedno- a dwupřežne zapřahi. To budźe zdobom sakske mišterstwo. Organizatorojo Pančičanskeho konjaceho sportoweho towarstwa wočakuja pohončow z wjacorych zwjazkowych krajow w Hornjej Łužicy.
