Radźićeljo Halštrowskeje Hole přiwšěm za solarnu připrawu hłosowali

Hory (AK/SN). Pola Zabroda ma wuchodnje a zapadnje zwjazkoweje dróhi B 97 na wjace hač 17 hektarow wulkej płoninje solarny park nastać. Tomu je wjetšina gmejnskich radźićelow Halštrowskeje Hole na swojim zašłym posedźenju přihłosowała. Twarić chce jón Zabrodske předewzaće BUG, kotremuž płoniny słušeja. „Za to dyrbimy plan wužiwanja ležownosćow změnić“, rozłoži Heidrun Eger z twarskeho zarjada gmejny.

Potrjechene su předewšěm lěsne płoniny. Přećiwo tomu so wobydlerjo a Zabrodska wjesna rada wobaraja. „Wjetšina wobydlerjow je přećiwo tomu, zo ma so za solarny park 17 hektarow lěsa zhubić“, praji bywši wjesny předstejićer Siegbert Bogott. Po jeho słowach bě so potrjecheny lěs 1990 z woporom wohenja stał. Mjeztym su štomy zaso derje narostli a měli so dale škitać.