Wóspork (WL/SN). Sakska ministerka za kulturu a turizm Barbara Klepsch (CDU) je wčera tři projekty wopytała, kiž je Akademija pućowacych a putnikow z fondsa za infrastrukturu spěchowała. Mjez druhim wona w putniskej hospodźe „Santa Martha“ w Hrodźišću pozasta. Tam ju serbski zapósłanc Sakskeho krajneho sejma Marko Šiman (CDU) witaše. Tež Wósporkski měšćanosta Jürgen Arlt a dr. Gudrun Hetzel ze spěchowanskeho towarstwa „pro Hrodźišćo“, kiž hospodu wobhospodarja, ministerku wočakowaštaj.
Chirurgowka Gudrun Hetzel je hižo sedme lěto „dobra duša“ hospody. Wjac hač 300 putnikow 460 kilometrow dołheho ekumeniskeho putniskeho puća wot Zhorjelca do Vacha wob lěto w Hrodźišću přenocuje. Woni pochadźeja z Němskeje a z Europy. Tež žona z Neuseelandskeje bě hižo w domje załožiła. Přećelni wobydlerjo Łužicy a krasna přiroda putnikow stajnje zaso zahorja.