Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (4)

Stawizny wohnjoweje wobory we Worklecach sahaja wróćo hač do 60tych lět 19. lětstotka. Je znate, zo je woheń w zymje lěta 1854 štyri statoki we wsy zničił. Jenož dźewjeć lět pozdźišo wotpalichu so tři dalše, mjez druhim piwarnja knježeho dwora. Dwaj domaj buštej zaso natwarjenej. Při tym wobkedźbowachu wot toho lěta płaćace předpisy, zo maja so masiwne twaršćizny wužiwać. Tehdy je so hrabja Stollberg wo to postarał, zo dóstachu za swój čas modernu mobilnu sykawu. Tuta je při hašenju mnohich dalšich wohenjow, wosebje při hrózbnej katastrofje w awgusće 1886, pomhała. Tehdy so wjac hač 30 twarjenjow wotpali a dospołnje zniči. Njedostatk šprycy bě, zo njemóžeše wodu z hata abo rěki srěbać, ale woda dyrbješe so w bowach dodawać. Při wohenju měješe tehdy gmejnski předstejićel za hašenje zamołwitosć. Kóždy dyrbješe so jeho přikazam podrjadować.