Pčołki za cyłu swójbu
Budyšink. Składnostnje mjezynarodneho dnja pčołkow, kotryž bě wčera, zarjaduje pčołarske towarstwo Šěracha pjatk, 23. meje, wot 16 hodź. dźěłarničku za cyłu swójbu. Zarjadowanje wotměje so w Domje Šěracha w Budyšinku. Tón dźeń chcedźa tam předstajić, kak so měd dźěła. Zajimcy móža so sami gratu přimać a čerstwje nadźěłany měd woptać.
Radźićeljo wuradźuja
Róžant. Přichodne posedźenje gmejnskeje rady Ralbicy-Róžant budźe štwórtk, 22. meje, we 18.30 hodź., w Róžeńčanskej gmejnskej sydarni. Radźićeljo zaběraja so wospjet z nowej Ralbičanskej pěstowarnju, kotruž nazajtra oficialnje přepodadźa. W dnjowym porjedźe steji, zo zaběraja so z prašenjom, hač přetwarja kaž dotal planowane staru pěstowarnju na hort abo hač měli město toho při šuli nowy hort natwarić.
Policija (21.05.25)
Do kólnje so zadobyli
Prawoćicy. Hakle nětko su wobydlerjo w Prawoćicach pytnyli, zo su so w prěnjej połojcy měsaca pola nich paduši zadobyli. Kaž policija zdźěli, załamachu so skućićeljo w času wot 1. do 16. meje do kólnje. Z njeje pokradnychu koleso marki Diamant kaž tež napjelnjeny bencinowy kanister. Rubizna je něhdźe 1 300 eurow hódna. Nimo toho naparachu paduši něhdźe 20 eurow wěcneje škody. Slědy policisća namakachu a zawěsćichu.
Dróhu mjez wjeskomaj wutwarja
Zrěčenje na zmylki přepruwuja
Gmejnska rada chce milinowemu parkej dale zadźěwać
Łaz (AK/SN). Łazowska gmejna twar milinowych wětrnikow mjez Běłym Chołmcom a Hórnikecami dale wotpokazuje. Na zašłym posedźenju gmejnscy radźićeljo wozjewichu, zo njemóža pismo prawniskeho dohladowanskeho zarjada z 29. januara akceptować. Woni měnja, zo běchu wobzamknjenja gmejnskeje rady wo wotpokazanju wětrnikow njeprawniske.
Radźićel Udo Steglich (Lěwica) je nětko gmejnskej radźe nowu próstwu zapodał. Po jeho měnjenju dyrbja w měrcu 2024 mjez gmejnu a předewzaćom Sabowind wotzamknjene zrěčenje přepruwować. „Mjez druhim měło so zwěsćić, kak su tehdyšu gmejnsku radu do wudźěłanja zrěčenja integrowali. Wuslědki pruwowanja měli w juniju předležeć.“, tak Steglich.
„Lěsny hrodźik“ zaso přeprošuje
Dźensa často wo tym słyšiš, zo dyrbja hosćency zawrěć, dokelž dosć personala nimaja abo dokelž so dalšich přičin dla wobhospodarjenje hižo njezadani. We Wulkej Dubrawje porno tomu za něšto dnjow nowy hosćenc wotewru, ale z trochu hinašim konceptom, hač zwučene.
Wulka Dubrawa (UM/SN). Kóždy dźeń ma Sven Petasch „Lěsny hrodźik“ w dwójnej křiwicy na kromje Wulkeje Dubrawy do směra na Kamjenej před wočomaj. Runje napřećo su drjewowe dźěłarnje P&M, kotrychž jednaćel wón je. „Mje je bolało, jako widźach, zo je dom prózdny a rozpaduje“, předewzaćel powěda. Před pjeć lětami je wón twarjenje při nanuzowanym přesadźowanju přewzał. Wón chcyše gastronomiju z přenocowanjom natwarić.
Na wobraz baćonow w jich hnězdach smy so wšudźe na wsach zaso ...
Krótkopowěsće (21.05.25)
Filmowy festiwal zahajili
Žitawa. Ze swětowej premjeru digitalnje restawrowaneho filma „Śląsk“ režiserki Viole Stephan bu wčera 22. filmowy festiwal Nysa w Žitawskim Gerharta Hauptmannowym dźiwadle zahajeny. Hač do njedźele pokazaja na cyłkownje 19 hrajnišćach w Sakskej, Pólskej a Čěskej wjace hač sto paskow. Mjez druhim prezentuja zajutřišim pod hesłom „Serbske wobrazy“ štyri přinoški w Budyšinje.
Dyrbja wjace dźěći škitać
Budyšin. Młodźinski zarjad Budyskeho wokrjesa zdźěli, zo je ličba wohroženjow derjeměća dźěsća přiběrała. Loni su něhdźe 1 300 padow registrowali, štož je dźesać procentow wjace hač w lěće 2022. Tohorunja je potrjeba wob lěto wo něhdźe dźesać procentow wyša. Poradźowanja zarjada su wot lěta 2022 hač do 2024 wo 25 procentow stupali.
Prawicarjow dźensa zajeli
Domizniski dźeń dopřihotowany
Lejno/Ptačecy (AK/SN). Program lětušeho 19. domizniskeho dnja ewangelskich Serbow Wojerowskeho regiona je w dalokej měrje zestajeny. Tole zdźěli farar Wojerowskeje Janskeje wosady Heinrich Koch. Wón zdobom přihotowanskemu kruhej přisłuša. Po lěće 2015 wotměje so domizniski dźeń lětsa 15. junija znowa w Lejnom a Ptačecach.
Přeprosyli su sej generalnu superintendentku Theresu Rinecker, superintendenta Daniela Schmidta kaž tež fararja na wuměnku a iniciatora domizniskeho dnja Joachima Nagela. Dźeń započnje so ze serbsko-němskimi kemšemi w Lejnjanskej cyrkwi. Runočasnje wotměja so kemše za dźěći. Wo hudźbne wobrubjenje postarataj so chór Židźino a kantor Johannes Leue. Wot Lejnoho pojědu wobdźělnicy z konjacymi zapřahami do Ptačec. Při tym zahraje Rakečanska dujerska kapała. Po wobjedźe zaklinča serbske pěsnje a předstaja serbsku narodnu drastu. Na nutrnosći po kofeju chcedźa serbski parament – wudebjeny rub za liturgiju – do słužby stajić.
Morjenje zjawnosć dale zaběra
Mortwa młodostna blisko Łužnicy policiju a ludnosć dale zaběra. K mnohim dypkam, kotrež nadal jasne njejsu, so poněčim tež wěstosće a dalše wuslědźenja přidružeja.
Łužnica (dpa/SN/MG). Prěnju powěsć wo mordarstwje na 21lětnej w lěsu blisko Łužnicy bě němska powěsćernja dpa wčera krótko po 10 hodź. wozjewiła. Policajska direkcija w Zhorjelcu bě w tutym času mjenujcy wozjewiła, zo běchu „zastojnicy policajskeho rewěra Kamjenc nježiwu wosobu“ nadešli. W prěnjej zdźělence hižo rěka, zo su 16lětneho, kiž je młodu žonu pozdatnje zamordował, zajeli. Wčera připołdnju policija potom wozjewi, zo je sudnik přikazał, zo ma skućićel za čas přepytowanjow w „fachowej chorowni“ přebywać.
„Młynska reja“ wjeršk była
Ćisk (JT/SN). Wot někotrych šwihelow dešća njejsu so młodostni w Ćisku zatrašić dali a přewjedźechu sobotu mejemjetanje. Wobdźěliło je so 14 porow. Holcy běchu so serbsku drastu woblekli. Hižo před tydźenjemi běchu štom wobstarali, kónc apryla pletwu zwili, meju stajili a ju pozdźišo wobstajnje stražowali. Nětko móžachu ju skónčnje powalić.
Na swjedźenišću bě wšitko přihotowane a meja wuryta. 34 metrow wysoka wona do předwidźaneho směra padny. Najspěšniši při wjeršku bě Carlo Nitzsche, kiž sej swoju partnerku Lisu Caban za mejsku kralownu wuzwoli. Druhi dźěl zarjadowanja zmištrowachu młodostni ja jewišću. W połhodźinskim programje pokazachu serbske reje, kotrež běchu ze Susann Sulkowej wot Ćišćanskeje rejwanskeje skupiny nazwučowali. Wjeršk bě „Młynska reja“. Ju bě Helga Hanšowa před lětami choreografowała.
