Cwólba za pjenjezami honiła
Młodostni so wo pisane poskitki na wjesnym swjedźenju postarali
Njebjelčicy (AKr/SN). Na pisany kónc tydźenja je Njebjelčanska młodźina wšitkich wjesnjanow a hosći zbliska a zdaloka wot minjeneho pjatka hač do njedźele přeprosyła. Třidnjowski swjedźeń zahajichu pjatk z party inkluzije, kotruž mjenowachu „Danci“. Štož je so z małej ideju započało, bě nětko hižo štwórty raz kruty wobstatk swjedźenja. Bě to wječor za ludźi z dušinym abo ćělnym zbrašenjom – a z nimi. Přitomni běchu z domow za zbrašenych z Pančic-Kukowa, Smječkec, Lěskeje a Kamjenca. Woni mějachu swoje wjeselo při rejowanju abo při hrach, kotrež běchu młodostni z wjele lubosću přihotowali a přewjedli. Diskoteku wobrubi inkluziska band z Lěskeje. Zbrašeni běchu so hižo dołho na tutón podawk wjeselili. Prěni króć wotmě so sobotu popołdnju koparski turněr, na kotrymž wobdźěli so sydom mustwow. Dobyło je mustwo „Nikotin Róžant“.
Hamor hižo w zwjazku njeje
Hamor (AK/SN). Na próstwu Budyskeho wokrjesa bu Hamorska gmejna z turistiskeho zwjazka Łužiska jězorina wuzamknjena. Tole su čłonojo 3. junija na zhromadźiznje wobzamknyli. Wjesnjanosta gmejny Hendryk Balko rozsud wobžaruje. Gmejna Hamor bě lěta 2012 ze załoženskim čłonom zwjazka a je wjele lět w projektach kaž tež dźěłowych skupinach sobu dźěłała. Tež na zhromadnym zwičnjenju bě gmejna wobdźělena. Gmejna wšak pak bě do toho ze zaměroweho zwjazka Łužiska jězorina Sakskeje wustupiła. Přičina bě sylne zwyšenje wotedawka wot lěta 2027. Město 14 000 eurow měł Hamor zaměrowemu zwjazkej potom 95 000 euro płaćić. Tute zwyšenje je gmejnska rada wotpokazała. Rozsud njeje radźićelam lochko padnył, woni pak nochcychu financielne poćežowanje akceptować.
Krótkopowěsće (16.06.26)
Rěče mjeńšinow lěpje škitać
Berlin. Zwjazkowa rada je na swojim posedźenju minjeny pjatk próstwje Schleswigsko-Holsteinskeje, Sakskeje, Braniborskeje a Delnjeje Sakskeje wotpowědowała, regionalne a mjeńšinowe rěče w markowym prawje Europy lěpje škitać. Konkretnje dźe wo zapřijeća abo rěčne wobroty, kotrež su w charće regionalnych a mjeńšinowych rěčow Europy škitane.
Namołwjeja k akciskemu dnjej
Bórkowy. Komunalne načolne zwjazki su zhromadnje k akciskemu dnjej „komuny na limiće“ 22. junija w Bórkowach namołwjeli, dokelž je financna situacija městow, wokrjesow a gmejnow dramatiska. Tak mjenowanych dobrowólnych nadawkow dla maja dźeń a mjenje pjenjez k dispoziciji. Mjez nimi je tež turizm, kotryž je w Bórkowach najsylniši hospodarski faktor.
Nowe pišćele w katedrali
Policija (15.06.26)
We wulkim stilu kradnyli
Kinspork. We wulkim stilu su njeznaći w běhu zašłeho tydźenja w Kinsporku kable kradnyli. Jich cil bě fotowoltaikowa připrawa při Wojerowskej dróze. Skućićeljo přewinychu płót, bjez toho zo bychu škodu načinili. Na to dohromady 42 kilometrow koporoweho kabla zwutorhachu. Hódnota rubizny wučinja něhdźe 50 000 eurow, kaž policija rozprawja.
Znowa wobšudźić spytali
Budyšin. Minjene dny je k wjacorym telefonatam dóšło, w kotrychž su njeznaći ludźi wobšudźić spytali. Zwjetša wudawachu so woni jako zastojnicy kriminalneje policije a ludźom napowědachu, zo běchu rubježnu cwólbu zajeli. Pola njeje namakana lisćina z mjenami wobsahowaše pječa tež mjeno zatelefonowanych. Z tutej łžu wobhonichu so skućićeljo za pjenjezami abo debjenkami w domjacnosći. Zwjetša su ludźo telefonat na to skónčili. Sobotu wječor pak so skućićelam tola poradźi, staršej žonje w Kamjencu 6 000 eurow wulišćić.
Domowinsku skupinu wozrodźili
Při pomniku rjedźić
Pančicy-Kukow. Domowinska skupina Pančicy-Kukow namołwja swojich čłonow a wšitkich dalšich zajimcow jutře, wutoru, 16. junija, w 17 hodź. kołowokoło pomnika Jakuba Barta-Ćišinskeho w Lipju sobu rjedźić. Štóž ma chwile a móže pomhać, njech sej trěbny grat kaž hrabje, chošćo a podobne sobu přinjese. Skupinske předsydstwo nadźija so prawje bohateho wobdźělenja.
Eksponaty jara njewšědne
Stróža. Tak mjenowane cyanotypije steja w srjedźišću noweje wosebiteje wustajeńcy, kotraž je wot minjeneho pjatka w Stróžanskim Domje tysac hatow widźeć. W tutej wosebitej fotografiskej technice zhotowjene twórby wustaja Zhorjelski wuměłc Sebastian Hänel. Módrojte wobrazy wotbłyšćuja zwjetša motiwy z přirody. 28. junija wotměje so w Stróži we wobłuku přehladki dźěłarnička, hdźež wuměłc předstaji, kak cyanotypije nastawaja.
Z kosu syc nawuknyć
Kulturna nóc po cyłym měsće
Syły wopytowarjow sej poskitki cyłkownje 17 zarjadowanišćow wotkryli
Budyšin (CS/SN/bn). Dołha nóc kultury je w Budyšinje mjeztym z rjanej tradiciju. Město wšak tež wjele skići. Nic jenož wulke kulturne zarjadowanišća, ale tež mjeńši akterojo pokazuja, k čemu su kmani. 17 wobdźělenych je zajimcow předwčerawšim přeprosyło, najwšelakoriše poskitki wužiwać. Tola wopytowarjam bě lědma móžno, wšudźe pódla być. Tak je na přikład Němsko-Serbske ludowe dźiwadło zjawnu probu za swój lětuši lěćny spektakl pod hołym njebjom wo połdra hodźiny přestorčiło, štož prěkowaše so na přikład z čitanjom Andreasa Henniga w galeriji Budissin. Paralelnje wotmě so nimo toho „Gundermannowy program“ Uwe Kottecka a Axela Stillera w měšćanskej bibliotece, kotryž běchu njewěstych wjedrowych wuměnjenjow dla z dwora do sydarnje knihownje přepołožili.
Serbsku tradiciju zachowuja
Spale (AK/SN). Z „Lubku liliju“ a dalšimi serbskimi ludowymi pěsnjemi witaše spěwna skupina Přezpólni njedźelu připołdnju dźewjeć konjacych zapřahow před Spalowskim hosćencom. Cyle prědku jědźeše Rakečanska dujerska kapała sobu. Na tamnych zapřahach sedźachu wobdźělnicy 20. serbskeho ewangelskeho domizniskeho dnja, kotřiž přijědźechu wot Božeje słužby we Wojerowskej Janskej cyrkwi.
Spale běchu wčera po lěće 2011 znowa z hosćićelom domizniskeho dnja, na kotrymž předewšěm wjesna młodźina sobu pomhaše. Za tónle dźeń běchu zelenu pletwu ze serbskim napisom „Witajće k nam“ nawili a nad zachodom hosćenca připrawili. Hosći posłužowachu holcy w serbskej drasće. „Smy hižo před lětomaj w Čornym Chołmcu pomhali, lětsa so znowa wobdźělimy. Činimy to za serbsku tradiciju a za wjesnu zhromadnosć“, praji Vanessa Markec ze Spalowskeho młodźinskeho kluba. Wona a jeje přećelki a přećeljo nošachu serbsku kwasnu poliwku kaž tež chrěn a howjaze mjaso na žurlu. „W Spalach je so wjele serbskeje tradicije zhubiło“, młodostna znazorni. „Štož je móžno, spytamy zachować.“
Hnydom dwaj jubilejej swjeći dźensa Krollec zahrodnistwo we ...
Krótkopowěsće (15.06.26)
Dorostowi rejwarjo so předstajili
Budyšin. Swoju zakónčacu galu su rejwarki a rejwarjo dorostoweho studija Serbskeho ludoweho ansambla (SLA) wčera w Budyšinje předstajili. Rejowanske skupiny „Łužičanki“ z Chrósćic a Radworja kaž tež „Łužiska rapsodija“ pokazachu na žurli SLA program „Mały ptačk“. Na dwěmaj předstajenjomaj je něhdźe 80 dźěći a młodostnych z wjesołymi rejemi w pisanych kostimach publikum zawjeseliło.
300 lět Serbski seminar
Praha. Dźensa před třomi lětstotkami bu w Praze zakładny kamjeń Serbskeho seminara połoženy. Dom bu pozdźišo jako Seminarium Budissinorum ad s. Petrum pomjenowany a bě třeći serbski konwikt w měsće. Kapacita předchadźacych njeje za ličbu zajimcow studija katolskeje teologije hižo dosahała. Z někotrych žórłow wuchadźa, zo bu zakładny kamjeń 15. pražnika połoženy. Za dokładnym datumom ma so dale slědźić.
Awta z Chiny njewitane
