Wojerecy (AK/SN). Ponowjenje Wojerowskeho dwórnišća traje po wšěm zdaću lěto­ dlěje hač spočatnje předwidźane. Hakle wot lěća 2027 budu pućowacy nastupnišći­ 3 a 4 kaž tež tři nowe lifty wužiwać móc. Na to skedźbnja rěčnik Němskeje železnicy Jörg Bönisch.

Třěšna konstrukcija nastupnišća je bóle zerzawa, hač bě do toho wotwidźeć. Tuž dyrbja nowe třěchi natwarić. „Nimo toho su ćežke geologiske poměry tomu wjedli, zo nowy tunl za pěškow sčasom njedotwarja.“ Tohodla trjebaja wjace časa, praji Jörg Bönisch. Němska železnica ponowja dwórnišćo hromadźe ze Swobodnym statom Sakskej, z wobchadnym zwjazkom VVO a dalšimi partnerami. Twarske dźěła wukonja Budyska firma Hentschke. Projekt płaći 21 milionow eurow.

Z třomi liftami budu předewšěm zbrašeni a pućowacy z ćežkimi kóframi abo z kolesami nastupnišća lěpje docpěć móc. Tam připrawja dospołnje nowe wobswětlenje. Z nowym tunlom nastanje direktny zwisk wot nastupnišćow na naměsto před dwórnišćom.