Radźićeljo wuradźuja
Róžant. We wobłuku zarjadniskeho zwjazka Při Klóšterskej wodźe so štwórtk, 23. oktobra, hnydom tři gmejnske rady schadźuja. Delanscy parlamentownicy zetkaja so we 18.30 hodź. w Róžeńčanskej gmejnskej sydarni. Mjez druhim chcedźa naćisk noweho horta při Ralbičanskej šuli předstajić. Dale póńdźe wo twarske dźěła, z kotrymiž ma so něhdyši žłobik w Smjerdźacej na běrowowe rumnosće přetwarić.
Chrósćicy. Radźićeljo Chróšćanskeje gmejny wuradźuja wot 19 hodź. w gmejnskim a kulturnym centrumje. Hłowna tema budźe přetwar busowych zastanišćow na Hórnikowej w Chrósćicach.
Pančicy-Kukow. Radźićeljo gmejny Pančicy-Kukow schadźuja so jutře w 19 hodź. w Lejnjanskim hosćencu. Mjez druhim steji změna mjezy mjez Pančičanskej gmejnu a městom Halštrowom na dnjowym porjedźe.
Přewjedu kurs za yoga
Wjace hač jenož kehelernja
W Rodecach wobydlerski centrum swjatočnje přepodali
Rodecy (CS/SN). Póndźela bě za Bukečansku gmejnu wulki dźeń. We wjesnym dźělu Rodecy přepodachu nowy wobydlerski centrum. Spočatnje měješe so w čerwjenym twarjenju jenož stara kehelowanska čara za wubědźowanja ponowić. Mjeztym pak je tam wjace hač jenož kehelernja. Nowotwar móža nětko rozdźělne skupiny ludźi najwšelakorišo wužiwać. Rumnosće z cyłkownej wulkosću 570 kwadratnych metrow móža so multifunkcionalnje dźělić abo zwjazać.
Bukečanski wjesnjanosta Thomas Meltke, kotryž je projekt swojeho předchadnika Norberta Wolfa dale wjedł, rjekny, zo je kónc lěta 2019 wot gmejnskeje rady wobzamknjeny plan znamjo za žiwu strukturnu změnu. Dale je to dopokaz za to, zo njeje wjesna kónčina wopušćena. Wobydlerski centrum je 2,9 milionow eurow płaćił. Z toho dóstachu 90 procentow spěchowane. Najwjetši dźěl twarskich dźěłow su rjemjeslnicy z bjezposrědneje wokoliny wukonjeli, wjesnjanosta wuzběhny.
Nowu pěstowarnju poswjećili
Rowno (AK/SN). Po tym zo běchu dźěći a kubłarki hižo spočatk julija do noweje Rownjanskeje pěstowarnje „Milenka“ zaćahnyli a dosć chwile měli, so w njej zažiwić, su kubłanišćo wčera oficialnje poswjećili. Přitomni běchu nimo wobydlerjow sakski kultusowy minister Conrad Clemens, Slepjanski wjesnjanosta Jörg Funda (wobaj CDU) a zastupowacy předsyda Domowiny dr. Hartmut Leipner. Wón mjez druhim rjekny, zo ma serbšćina w nowej pěstowarni dołhodobny přichod. Kubłanišća kaž „Milenka“ tomu přinošuja, rěč přichodnym generacijam posrědkować.
Do pěstowarnje su 3,3 miliony eurow inwestowali. Najwjetši dźěl je Swobodny stat Sakska zapłaćił. Tamny dźěl dóstachu ze spěchowanskeho programa Leader a wot energijoweho koncerna LEAG. Tuž njeje Slepjanska gmejna swójski podźěl přidać njetrjebała, minister Clemens podšmórny. Dale wón wuzběhny, zo je Sakska do pěstowanje inwestowała, byrnjež ličby dźěći woteběrali. „Tola kóždy nałoženy euro je inwesticija do přichoda.“
Pod mjenom swojeho wjelelětneho hosćenca „Culinarium“ wjedźe ...
Krótkopowěsće (22.10.25)
Na dwórnišću so paliło
Budyšin. Na Budyskim dwórnišću je wčera wječor woheń wudyrił. Něhdźe 100 ludźi dyrbješe ležownosć wopušćić. Koš za papjeru na nuzniku bě so zapalił, policija zdźěli. Zastojnicy z toho wuchadźeja, zo bě něchtó z wotpohladom woheń zamiškrił. Woheń bu spěšnje zhašeny. Twarjenje dwórnišća dyrbjachu nachwilnje zawrěć. Nastupnišćo pak móžachu sobujěducy ćahow dale wužiwać.
Zatřělenej wjelkaj nadešli
Wětnica/Lipiny. W běhu tydźenja su w Budyskim wokrjesu dwaj mortwej wjelkaj – po informacijach policije prawdźepodobnje zatřělenej – nadešli. Jednoho namakachu póndźelu wječor blisko Wětnicy (Wiednitz) pola Njedźichowa, dalšeho wutoru wječor blisko Lipiny (Lippen) pola Łaza. Hač padaj mjez sobu zwisujetej, je dotal njejasne. Policija přepytuje podhlada zranjenja přirodoškitneho zakonja dla.
Blamaža we wopačnej šuli
Policija (21.10.25)
Płuna dla so zranili
Budyšin. Wjacori młodostni a jedyn dorosćeny su so wčera na wyšej šuli w Budyskej Allendowej štwórći zranili, po tym zo bě tam něchtó agresiwny płun rozpryskał. Stało je so to dopołdnja krótko do 10 hodź. Kaž policija rozprawja, su njeznaći płun na nuzniku šule zasadźili. Jako wjacori młodostni a jedyn dorosćeny po tym na nuznik přińdźechu, so snadnje zranichu. Jich dyrbjachu lěkarsce zastarać, zdźěla jich do chorownje dowjezechu. Čehodla je něchtó płun rozpryskał, njeje znate. Wučbu pokročowachu w rjadowniskich rumnosćach, kotrež njeběchu potrjechene. Policija pad dale přepytuje.
Na slědach ludoweho basnika
Wopomnjenski puć wokoło Hodźija dopomina na Pětra Młónka
Hodźij (CS/SN). Na bura a ludoweho basnika Pětra Młónka dopomina wotnětka pomnik w formje wopomnjenskeje šćežki. Ju su minjenu sobotu w Hodźiju při tamnišej cyrkwi wotewrěli. Něhdźe sto zajimcow je nutrnosć w cyrkwi a wotkryće prěnjeje stacije sobu dožiwiło. Dźěl z nich poda so z busom na dalše stacije w Žičenju, Žičenku, Dźiwoćicach, Małej Boršći a Praskowje. Cyłkownje dźesać stacijow na wosom kilometrow dołhim puću rysuje žiwjenski puć bura, ćěsle a ludoweho basnika.
Fanojo jězdźidłow w Spalach so zešli
Čestnohamtscy šoferojo wodźa bus
Hórnikecy (KD/SN). Štyrjo dobrowólni wobydlerjo Hórnikec wodźa tuchwilu hač do kónca oktobra prěni tak mjenowany wobydlerski bus města Wojerecy. Jedna so wo mały bus z wosom městnami, kiž je Wojerowska wobchadna towaršnosć (VGH) krótkodobnje za to přewostajiła, rozprawja wjesna předstejićerka Ulrike Neumann. Aktualna přičina je, zo je puć z Mučowa na kromje Hórnikec zawrjeny, dokelž tam móst ponowjeja. Přez tónle móst powjedźe wot spočatka přichodneho lěta wšón wobchad přez Hórnikecy, dołhož puć do Koblic ponowja. Tutón budźe potom dospołnje zawrjeny.
Busowy zwisk z Hórnikec do Wojerec je tuchwilu chětro poćeženy. Dźěławi maja swoju lubu nuzu, hdyž dyrbja rano sčasom na dźěle być. Zakładni šulerjo, kotřiž chcedźa ze šule z Wulkich Zdźarow domoj, dyrbja popołdnju cyłu hodźinu na zjawny bus čakać. Tohodla su so wobydlerjo pola města a na krajnoradnym zarjedźe hóršili, a to wuspěšnje. Jednaćel VGH Stephan Löwe přewostaji jim mały bus, kiž wjacore razy wob dźeń jědźe.
Policist přednošuje
Pančicy-Kukow. Domowinska skupina Pančicy-Kukow přeprošuje na swoje přichodne zarjadowanje srjedu, 22. oktobra, w 19 hodź. do awle Šule Ćišinskeho. Přeprosyli su sej wobydlerskeho policista w gmejnach zarjadniskeho zwjazka Při Klóšterskej wodźe Andréja Kobera. Wón porěči wo swojim wšědnym dźěle a tež wo aktualnych strachach, hdyž na přikład wobšudnicy na ludźi zwonja a chcedźa jim pjenjezy wulišćić. Nimo skupinarjow su tež wšitcy dalši zajimcy na přednošk wutrobnje witani.
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady wotměje so srjedu, 22. oktobra, w 19 hodź. w tamnišej gratowni wohnjoweje wobory. Nimo ležownostnych prašenjow póńdźe mjez druhim wo to, hač partnerskej zrěčeni z madźarskej gmejnu Ladánybene a z gmejnu Ouidah w afriskim Beninje wupowědźa. Wopytowarjo drje smědźa na zajimawu diskusiju wćipni być.
Kak KI prawje wužiwać?
