Njezjawnje wuradźowali

Kamjenc. Peticiski wuběrk sakskeho krajneho sejma je dźensa wo peticiji wuradźował, kotraž měri so na zachowanje porodźernje a gynekologije w Kamjenskej chorowni swj. Jana. Wjace hač 20 000 ludźi je online-dokument podpisało. Wuradźowanje je so njejapcy njezjawnje wotměło. Před Kamjenskej radnicu čakacy zhonichu na městnje, zo bu zeńdźenje do rumnosćow chorownje přepołožene.

Filmowy festiwal so zahajił

Žitawa. Dźensa zahaji so 23. filmowy festiwal Nysa (NFF) w Žitawje. Na šěsć dnjach wotměwacym so festiwalu pokazaja něhdźe 100 filmow z Němskeje, Pólskeje a Čěskeje. Nimo toho poskića zarjadowarjo wustajeńcy, dźěłarnički a koncerty. Dohromady 19 kinow a kulturne domy podłu a pódla Nysy so na festiwalu wobdźěli. Na poslednim dnju chcedźa organizatorojo jědnaće mytow přepodać.

Horca faza so bliži

Hbjelsk (CS/SN). Hač na poslednje městno bě minjenu njedźelu cyrkej w Hbjelsku (Gebelzig) wobsadźena. Z hudźbnym nyšporom woswjećichu tam nawrót křćenskeho jandźela. Stworił bě jón wokoło lěta 1700 po wšěm zdaću drjewo­rězbar Johann Georg Urbansky. Swojeje historiskeje a wuměłskeje hódnoty dla figuru 1924 jako požčonku Budyskemu měšćanskemu muzejej přewostajichu. Tam je jandźel hač do dźensnišeho we wotrjedźe za křesćanske wuměłstwo ­wustajeny a tak wjetšemu kruhej ludźi přistupny. Dźakowano móžnosćam moderneje techniki je so křćenski jandźel nětko přiwšěm do cyrkwje swjateho Jurja w Hbjelsku nawróćił. Original su mjenujcy wotfotografowali a trochu powjetšeny na wulku płachtu ćišćeli. Tuta wotnětka nad dupu wisa.

Łaz. Swjatki njedźelu móža sej zajimcy farmu štrusow we Łazu wobhladać. Mějićel Enrico Gabel zdźěli, zo budźe wona wot 10 do 18 hodź. wotewrjena. W tym času poskićuja tam steaki a pražene kołbaski ze štrusaceho mjasa, dalše domjace wudźěłki a regionalne produkty. Wopytowarjam chcedźa nastaće a wuwiće wot lěta 2005 wobstejaceje farmy rozłožić.

Psyči sport w měsće

Kamjenc. Swjatkowny kónc tydźenja steji­ město Kamjenc cyle w znamjenju psyčeho sporta. Tam wotměje so wot soboty hač do póndźele němske młodźinske a juniorowe mišterstwo Towarstwa za němske wowčerske psy. Po cyłodnjowskim treningu sobotu poskićuja wopytowarjam njedźelu a póndźelu wotměnjawy program we wšelakich disciplinach. Nadrobniše informacije a wobšěrny přehlad nadeńdu zajimcy internetnje na .

Wotewru wustajeńcu

Z posedźenja Worklečanskeje gmejnskeje rady w Smječkecach

Smječkecy (SN/jp). Jědnaće Workle­čanskich gmejnskich radźićelow je so wčera wječor zhromadnje z wjesnjanostu Clemensom Poldrakom (njestronski) w Smječkečanskim wjacezaměrowym domje zetkało. Do gratownje wohnjo­weje wobory bě nimo předsydy zarjad­niskeho zwjazka Při Klóšterskej wodźe Stefana Andersa tež předsyda Smječkečanskeje wohnjoweje wobory Andreas Kuša přišoł. Wón předstaji skutkowanje wohnjowych wobornikow.

Wobzamknyli su radźićeljo wčera ponowjenje dróhi mjez Róžantom a Nowej Wjesku. Puć je mjeztym chětro skóncowany a ma so w lětnich prózdninach, hdyž je lědma busoweho wobchada, saněrować. Gmejna Worklecy wuda za to 57 500 eurow. Zbytne 28 400 eurow přida gmejna Ralbicy-Róžant. Jeje radźićeljo so z tym přichodny tydźeń zaběraja.