Hórnikecy (KD/SN). Štyrjo dobrowólni wobydlerjo Hórnikec wodźa tuchwilu hač do kónca oktobra prěni tak mjenowany wobydlerski bus města Wojerecy. Jedna so wo mały bus z wosom městnami, kiž je Wojerowska wobchadna towaršnosć (VGH) krótkodobnje za to přewostajiła, rozprawja wjesna předstejićerka Ulrike Neumann. Aktualna přičina je, zo je puć z Mučowa na kromje Hórnikec zawrjeny, dokelž tam móst ponowjeja. Přez tónle móst powjedźe wot spočatka přichodneho lěta wšón wobchad přez Hórnikecy, dołhož puć do Koblic po­nowja. Tutón budźe potom dospołnje zawrjeny.

Busowy zwisk z Hórnikec do Wojerec je tuchwilu chětro poćeženy. Dźěławi maja swoju lubu nuzu, hdyž dyrbja rano sčasom na dźěle być. Zakładni šulerjo, kotřiž chcedźa ze šule z Wulkich Zdźarow domoj, dyrbja popołdnju cyłu hodźinu na zjawny bus čakać. Tohodla su so wobydlerjo pola města a na krajnoradnym zarjedźe hóršili, a to wuspěšnje. Jednaćel VGH Stephan Löwe přewostaji jim mały bus, kiž wjacore razy wob dźeń jědźe.