Přichod hosćenca je wěsty
Spočatk lěta 2027 přewozmje Sebastian Krüger nawodnistwo hosćenca „K rybačkej“ w biosferowym rezerwaće Hornjołužiska hola a haty. Z tym wón žiwjenski skutk swojeju staršeju pokročuje.
Muzejownik njeznaje wotpočinka
Eckbert Kwast swoju historisku wědu za sebje njewobchowa. Něhdyši nawoda Grodkowskeho Delnjołužiskeho holanskeho muzeja je so w lěće 725. jubileja města z klučowej figuru wědomja swojeje domizny stał.
Grodk (JoS/SN). Eckbert Kwast skutkuje njesprócniwje za Grodkowski muzej a za wšitke jeho 14 wjesnych dźělow Grodka. Wón angažuje so we wjacorych towaršnostnych organizacijach a je tójšto po puću. Byrnjež 67lětny na wuměnku był, nałožuje něhdyši nawoda muzeja wospjet wšitke swoje mocy a wědu ze swojich wjac hač 30 powołanskich lět za lětuši mały měšćanski jubilej, a to zhromadnje z mnohimi Grodkowčanami. Wobydlerjo su jemu za to jara dźakowni.
Tučel nad meju – impozantny motiw w Miłoćicach je wčera rano ...
Krótkopowěsće (07.05.26)
Woda w fokusu festiwala
Choćebuz. Towarstwo Klima*Kollektiv wuhotuje wot dźensnišeho prěni Sprjewiny festiwal w Choćebuzu. Hač do njedźele steji kołoběh wody kaž tež sprawne a naslědne rozdźělenje tejele resursy w fokusu. Program wopřijima dźěłarnički, filmowe předstajenja a koncertaj skupiny Skaprifischer a spěwytwórca Jacke Schwarza kaž tež wustajeńcu Maje Nageloweje „Woda – wuhlo – Serbja“.
Wjac ludźi dźěła podźělnje
Kamjenc. Wjace hač třećina (35 procentow) přistajenych po wšej Sakskej dźěła podźělnje. Wo tym informowaše wčera Sakski statistiski zarjad w Kamjencu. Ličba je so w minjenych 20 lětach podwojiła. Regionalnje pak su wulke rozdźěle. W Zhorjelskim wokrjesu dźěła 39 procentow přistajenych podźělnje, we wokrjesu Šwikawa je to jenož 31 procentow.
Parada wupadnje
Mjeńšiny respektować
Roland Dantz, něhdyši wyši měšćanosta Kamjenca a jeho wid na Serbow
Demonstracija za zachowanje porodneje a gynekologiskeje stacije w Kamjenskej chorowni swj. Jana je Rolanda Dantza w swojej narěči k tomu pohnuła, serbski aspekt jako argument wuzběhnyć. Milenka Rječcyna je so z něhdyšim Kamjenskim wyšim měšćanostu rozmołwjała.
Z kotreje přičiny sće Serbow w zwisku z připowědźenym zawrjenjom wotrjadow wuzběhnył? A kak zhromadne žiwjenje Serbow a Němcow posudźujeće?
Regionalne wuměłstwo při wodarni
Kniha zajim zbudźiła
Permakultura skići šansu za Łužicu, kotrejž hrozy suchota
Njebjelčicy (SN/MiR). Prěnje čitanje załožby Wnučkokmanosć w Njebjelčicach je 1. meje popołdnju wjace hač połsta zajimcow přiwabiło. Mjez nimi běchu tež hosćo, kiž su sej ze zdalenišich kónčin, ze srjedźneje Łužicy, z Podstupima, Mišnjanskeho kraja kaž tež z Hessenskeje do Njebjelčic dojěli. W prěnim rjedźe pak běchu do noweho zetkawanišća na kromje wsy domoródni kaž tež wědomostnicy, regionalni politikarjo, předewzaćeljo, wuměłcy a wosebje čłonojo załožby přišli. Dźěći a młodostni móžachu so tam runje tak wědy nasrěbać kaž dorosćeni wopytowarjo. Kathinka Neff, kotraž ze swojim mandźelskim Johannom prěni króć we Łužicy přebywaše, přednošowaše wo swojich nazhonjenjach we wobchadźenju z přirodu a wo nałožowanju permakultury za swójske zastaranje na swojim statoku w Grub zapadnje Bamberga. W prěnim rjedźe pak so wona wobchadźenju z wodu wěnowaše. Na naprašowanje z publikuma poruči, we Łužicy štomy sadźeć, zo njeby póda regiona přichodnje pod njeznjesliwej suchotu ćerpjeła.
Boža mša wobornikow
Róžant. Dobrowólne wohnjowe wobory gmejnow zarjadniskeho zwjazka Při Klóšterskej wodźe a susodne wobory swjeća pjatk, 8. meje, dźaknu Božu mšu składnostnje swjedźenja swjateho Floriana. Kemše započnu so w 19 hodź. w Róžeńčanskej hnadownej cyrkwi. Wšitcy wobornicy kaž tež hosćo su wutrobnje přeprošeni.
Koncertuja w hrodźe
Njeswačidło. Přećeljo domizny a kultury přeprošuja wutrobnje na prěni lětuši hrodowy koncert, kotryž wotměje so njedźelu, 10. meje, w 15 hodź, w hrodźe w Njeswačidle. Tam wustupi trio Pinheiro z Drježdźan. Třo młodźi hudźbnicy wuhotuja komornohudźbnu jĕzbu wot Brazilskeje hač do Bołharskeje.
Móst při jězoru ponowja
Dźěwin (AK/SN). Při Brězowskim jězoru ma so móst kolesowanskeje šćežki saněrować. Nadawk za to we wobjimje 11 000 eurow je Dźěwinska gmejnska rada na swojim zašłym posedźenju twarskej firmje z Trjebina přepodała. Móst ma nowe drjewjane pokładźenje dóstać, rozłoži wjesnjanosta Sebastian Bertko (njestronjan). W lěće 2014 běchu jón posledni raz saněrowali. Nětko su při kontroli njedostatki zwěsćili. „Njebě scyła tak lochko, namakać firmu, kotraž tajki móst ponowi“, wjesnjanosta rjekny. Jenož dwaj zawodaj běštej so přizjewiłoj.
Brězowski jězor je woblubowane bliskowočerstwjenišćo w Slepjanskim regionje. Wón je 120 hektarow wulki a 26 metrow hłuboki. Něhdy bě tam brunicowa jama. Hač do lěta 1969 su z njeje brunicu wudobywali. Wot 1982 móžeš so w jězoru kupać. Dźensa wabi wón z mnohimi poskitkami za aktiwnu wólnočasnu zaběru. Nimo kupanja móža tam hosćo tež stand-up-padlować, bičwolejbul hrać, na trampolinje skakać a so na hrajkanišću zabawjeć. Za swójby je stanowanišćo na sewjernym pobrjoze idealne, hdźež maja suwadło a hosćenc a přenajeja čołmiki. Atrakcija je připrawa za wodoski.
