Krótkopowěsće (24.03.25)
Literarnu dźěłarničku přewjedłoj
Budyšin. Lubina a Dušan Hajduk-Veljkovićec staj znowa literarnu dźěłarničku w nošerstwje Załožby za serbski lud zarjadowałoj. Ćežišćo dźěłarnički w Budyskim Serbskim domje bě literarne přełožowanje. Pjeć zajimcow je so wobdźěliło. Woni běchu někotre wotrězki dźěćaceje knihi „Kuzłarska kula“ Steffena Gemmela z němčiny do hornjoserbšćiny přełožili. Na zakładźe rěčneje a stilistiskeje analyzy přełožki diskutowachu.
Dawidowski do Mišna
Chrósćicy. Drježdźansko-Mišnjanski biskop Heinrich Timmerevers je Chróšćansku wosadu z dekretom wo tym informował, zo zakónči farski wikar farar Tomaš Dawidowski k 1. aprylej swój nadawk we wosadźe a zdobom nowy nadawk přewozmje. Wón ma w přichodźe měšniske słužby we wosadźe swjateho Bena w Mišnje wukonjeć.
Najdlěšu tramwajku předstajili
Chrósćicy: Swjedźenski ćah rozjimali
Chrósćicy (SN/mb). W Chrósćicach su zašłe dny wažne kročele do směra lětušeje 800. róčnicy wosady a gmejny šli. Nimo wuradźowanja přihotowanskeho wuběrka ze zastupjerjemi wosady a gmejny su so na farje schadźowali, zo bychu so zaso ze swjedźenskim ćahom zaběrali, kotryž słuša do wjerškow jubilejneho lěta. Kaž su na Instagramje wozjewili, běchu so zamołwići jednotliwych wobrazow zešli. Dotal je jich 44 planowanych. Katharina Jurkowa a Uwe Macka jim mjez druhim wažne informacije wo rozměrach ćaha a wotběhu podaštaj. Tohorunja wothłosowachu so wo napismach na tafličkach a wo zestawje jednotliwych wobrazow a wuměnichu sej informacije wo wobrazach. Na zakładźe tych chcedźa na přikład podłožki za moderaciju swjedźenskeho ćaha přihotować.
Kursaj čěšćiny w Čěskej
Budyšin. Štóž ma zajim, so na rěčnym kursu čěšćiny w Praze (17.07.–14.08.2025) abo w Čěskich Budějovicach (03.08.– 25.8.2025) wobdźělić, njech woteda hač do njedźele, 23. měrca, swoje přizjewjenske podłožki w Budyskim Rěčnym centrumje WITAJ abo njech sćele je z mejlku na: . Wotpowědny formular a dalše informacije su na internetnej stronje přistupne.
Na škot do Radworskeje Meje
Radwor. Škotowacy serbscy seniorojo su zaso wutrobnje na nowe koło w turněrje přeprošeni, kotrež wotměje so wutoru, 25. měrca, w 14 hodź. w Radworskej Meji. Kaž přeco su tež nowačcy wutrobnje witani. Dalše zarjadowanje serbskeho škota budźe 29. apryla w 14 hodź. w Ralbičanskim sportowym domje.
W muzeju jutrowne jejka debić
Na zhromadne lěta spominali
Policija (21.03.25)
Njezbožo ze smjertnym woporom
Rakecy. Wčera popołdnju něhdźe w 14.30 hodź. je na zwjazkowej dróze B 96 mjez Stróžu a Rakecami k ćežkemu wobchadnemu njezbožu dóšło. Z dotal njejasnych přičin zajědźe 77lětna žona ze swojim wosobowym awtom w křiwicy na napřećiwnu jězdnju dróhi a zrazy frontalnje do bližaceho so nakładneho awta. Zražka běše tak sylna, zo šoferka hišće na městnje njezboža zemrě. 37lětny šofer nakładneho awta so ćežko zrani. Zwjazkowa dróha běše přepytowanjow posudźowarjow na městnje dla dźewjeć hodźin dospołnje zawrjena. Policija trochuje wěcnu škodu tuchwilu na dohromady něhdźe 60 000 eurow.
Towarstwo w Malešecach wozrodźili
Dosć spokojacy rezultat
Radźićeljo gmejny Ralbicy-Róžant wo naćisku lětušeho etata wuradźowali
Róžant (JK/SN). Spokojom a dźakowni su radźićeljo gmejny Ralbicy-Róžant swoje wčerawše posedźenje gmejnskeje rady zakónčili. Komornica Franciska Čapikowa běše róžkowe daty a pozadki naćiska lětušeho hospodarskeho plana předstajiła. Pozicije při dochodach a wudawkach su so porno lońšemu planej we wjacorych pozicijach změnili. „Rezultat pak je na kóncu lěta pod smužku dosć spokojacy“, praji komornica.
Wjacore fakty tomu dopomhaja, zo so wobjim likwidnych srědkow derje wuwiwa. W prěnim rjedźe zwisuje to z tym, zo ma gmejna na zakładźe wuwića dochodow z přemysłoweho dawka nowe zastopnjowanje. Tohodla dóstanje wjace klučowych připokazankow. Dalše wuwiće cyłkownych financow njehodźi so po słowach Čapikoweje tuchwilu pohódnoćić, dokelž dokładne rjadowanja kraja Sakskeje njepředleža. Hospodarski etat swobodneho stata hišće njesteji a tak njeje jasne, kelko spěchowanskich srědkow abo připokazankow gmejny wot kraja dóstanu.
Chorym a strowym na dobro
Wojerecy (KD/SN). Poskitki strowotniskeho zarjada Budyskeho wokrjesa su kóždemu – wšojedne hač je chory abo strowy – na dobro. Mnozy pak wo najwšelakorišich nadawkach tamnišich sobudźěłaćerjow wjele njewědźa. „Tohodla zajimcam na dnju strowotniskeho zarjada wšitke swoje štyri wotrjady předstajamy“, praji nawodnica zarjada dr. med. Jana Gärtner. Wona přispomni, zo móža wobydlerjo Budyskeho wokrjesa sobudźěłaćerjow wšitkich fachowych wobłukow na stejnišćach w Budyšinje, Kamjencu a Wojerecach stajnje narěčeć. Kontaktne daty nadeńdu online na .
Wuznawa so k serbstwu
Wóslink (SN/mb). Gmejnska rada Wóslinka je srjedu wobzamknyła, zo ma so dalšich sydom z dźewjeć wjesnych dźělow serbskemu sydlenskemu rumej přizamknyć. Jitro (Milstrich), ródna wjeska komponista Bjarnata Krawca, hižo do serbskeho teritorija słuša. Tajka próstwa zašłe lětdźesatki ze žaneje gmejny dóšła njeje, kaž nam wjelelětna serbska politikarka CDU Marja Michałkowa wobkrući. Předsyda Domowiny Dawid Statnik dźakuje so w zdźělence gmejnskej radźe a wjesnym radam za wuznaće k serbskej rěči, kulturje a stawiznam.
„Wjeselu so, zo smy jednohłósny pozitiwny rozsud tworili. Mamy serbsce rěčacych wobydlerjow. Jich kulturna identita so respektuje. Zhromadnje pěstujemy serbske tradicije, kaž mejestajenje abo camprowanje. Nimo toho poskića so wučba serbšćiny na swobodnymaj křesćanskimaj šulomaj we Wóslinku“, tak wjesnjanosta Johannes Nitzsche, kotryž je tež naměstnik předsydy frakcije AfD w Budyskim wokrjesnym sejmiku.
Zakład wobzamknjenja běchu pokiwy serbskich wobydlerjow. Někotři sćelu dźěći na serbsku wyšu šulu do Ralbic.
Krótkopowěsće (21.03.25)
W Sakskej rady piwo warja
Berlin/ Drježdźany. Po cyłej Němskej je dźeń a mjenje piwarnjow, nawopak je tomu w Sakskej. Wot lěta 2019 do 2024 bu w zwjazkowym kraju dohromady sydom nowych piwarnjow wotewrjenych. Tole zdźěli Zwjazk piwarcow Němskeje, kiž so na nachwilne daty Zwjazkoweho zarjada za statistiku powołuje. Cyłkownje wobsteji w Sakskej 84 piwarnjow.
Po jězoru nětko tež z čołmom
Drježdźany/Bjerwałd. Sakska krajna direkcija je z powšitkownymaj wukazomaj trajne wužiwanje Bjerwałdskeho jězora za čołmy dowoliła. Wot 1. apryla móža jězor tuž wšitcy z čołmom wužiwać, wšojedne hač ma čołm motor abo nic. Z cyłkownej płoninu 13 kwadratnych kilometrow je něhdyša brunicowa jama najwjetši jězor Sakskeje.
„Šćežka Goetheho“ nastawa
