W Malešecach maja na Hućinjanskej dróze wot njedawna nowe ...
Krótkopowěsće (12.03.25)
Wokrjes woła wo pomoc
Budyšin. Dale a wyšich wudawkow socialnych naprawow dla su zamołwići Budyskeho wokrjesa nětko reagowali. Hišće tónle tydźeń chcedźa so ze šefomaj frakcijow sakskeje koalicije a sakskim ministerskim prezidentom Michaelom Kretschmerom (CDU) wo krizy rozmołwjeć. Hladajo na tuchwilne financne wobstejnosće wokrjes samo skóržbu njewuzamknje.
Pjenjezy za projekty
Rakecy. Towarstwo za wuwiće Hornjołužiskeje hole a haty (OHTL) je swoju pjatu spěchowansku namołwu zahajiło. Cyłkownje steja za to nimale 1,7 milionow eurow k dispoziciji. We strategiji za wuwiće su štyrnaće wobłukow definowali. Mjez druhim su to zakładne zastaranje, žiwjenska kwalita, bydlenje abo přiroda a wobswět. Priwatne wosoby, předewzaća atd. móža so wo spěchowanske pjenjezy za swoje projekty požadać.
Wjace pjenjez za zakitowanje
Policija (11.03.25)
Młodostnaj ćeknyć spytałoj
Wojerecy. Wobsadce policajskeho awta je njedźelu nawječor napadnyło, zo mopedistaj z Wojerec do směra na Šibojski jězor na kolesowanskim puću jědźetaj. Jako chcychu zastojnicy jeju kontrolować, spytaštaj wobaj ćeknyć. Při tym zhubi najprjedy 17lětny kontrolu nad swojim jězdźidłom a padny, ale so njezrani. Jeho runje tak stary towarš dale ćěkaše, ale pozdźišo tohorunja padny. Při tym zrazy do policajskeho awta. Tež wón so na zbožo njezrani. Přičina jeju zadźerženja bě spěšnje jasna. Wobaj žanu jězbnu dowolnosć njeměještaj. Za to změjetaj so nětko zamołwić. Po wšitkich policajskich formalitach přepodachu młodostneju jeju staršimaj.
Radźićeljo wuradźuja
Worklecy. Twarske dźěła při mosće z Worklec do Lejpolda budu jedna z temow přichodneho posedźenja Worklečanskeje gmejnskeje rady jutře, srjedu, we 18.30 hodź. we Worklečanskim horće. Dalša tema budu twarske dźěła na tamnišej wyšej šuli. Nimo toho zaběraja so radźićeljo z psyčim dawkom a diskutuja wo hospodarskim planje za lěto 2025.
Radwor. Tohorunja jutře we 18.30 hodź. zetkaja so radźićeljo Radworskeje gmejny w gmejnskej sydarni. Jedna z jich temow budźe integrowany koncept za škit klimy a natwar wotpowědneho kontrolneho mechanizma.
Njebjelčicy. Tež Njebjelčanska gmejnska rada so jutře schadźuje. Započatk budźe w 19 hodź. w gmejnskej sydarni. Radźićeljo chcedźa wo wustupje z towaršnosće Łužiska přirodna energija diskutować. Nimo toho wuradźuja woni wo móžnosćach twarskich naprawow w tak mjenowanym wonkownym wobłuku.
Šěsć krótkofilmow
Nadźijeja so lěpšich časow
Dźěwin (AK/SN). Najebać wobmjezowane móžnosće w hospodarskim planje chce Dźěwinska gmejna lětsa dale do swojeju pěstowarnjow a do wohnjoweje wobory inwestować. Tole podšmórny komornica Dana Piehl na zašłym posedźenju gmejnskeje rady, jako wjetšina jeje čłonow etat za 2025 wobzamkny. Za wuhotowanje pěstowarnje w Dźěwinje je 3 500 eurow předwidźanych, za pěstowarnju w Brězowce 40 000 eurow. Staru wohnjowobornu gratownju w Brězowce chcedźa na wjacezaměrowu rumnosć přetwarić. Za to planuja 40 000 eurow. Dźěwinscy wobornicy maja nowy pneumatiski hamor za 7 000 eurow dóstać.
Wužiwa wjacore techniki naraz
Slepo (JoS/SN). „Jejo wot kokoše hač k štrusej“ je hesło lětušeje jutrowneje wustajeńcy w Slepjanskim Serbskim kulturnym centrumje (SKC). Přehladku wuměłskich drohoćinkow Huberta Bartscha z Rěčic su minjeny štwórtk wotewrěli. „W našej lětušej jutrownej wustajeńcy spóznawamy njezaměnliwy rukopis cyle wosebiteho debjenja jutrownych jejkow“, rjekny nawodnica SKC Sylwija Panošina. Wona so wjeseleše, zo móžeše na wotewrjenju dalše debjerki jutrownych jejkow witać, kaž Petru Nakońcowu ze Slepoho, Birgit Patokowu z Horow a Beatris Sachse z Mikowa. Wo hudźbne wobrubjenje postaraštej so Michaela Neubauer a Yvonne Marko na akordeonje.
B 156 nětko twarnišćo
Zwjazkowu dróhu w sydom twarskich wotrězkach saněruja
Zdźěr (SN/MWj). Sewjernje Delnjeje Hórki su wčera zwjazkowu dróhu B 156 hač do Zdźěrje wutwarić započeli. Na dołhosći 3,5 kilometrow jězdnju w Čelchowje a Zdźěri kaž tež zwonka wobeju wsow saněruja, krajny zarjad za dróhotwar a wobchad (Lasuv) w nowinskim wozjewjenju zdźěli. Dróhu rozšěrja na 7,50 metrow. Podłu njeje natwarja 2,50 metrow šěroki kolesowanski puć. Nimo toho nastanjetej dwaj mosćikaj, zo móhli wudry pod nimaj tamny bok dróhi docpěć. Cyłkownje maja twarske dźěła hač do julija 2026 trać.
Krótkopowěsće (11.03.25)
Požadaja so wo myto
Rakecy. Rakečanska ewangelska wosada wobdźěli so ze swojej spirituelnej zwukowej instalaciju „Dobry pastyr“ na lětušim wubědźowanju wosadow křesćanskeho časopisa Chrismon. Dohromady 12 projektow ma wuhlady na pjenježne myto mjez 500 a 2000 eurami. Podpěraćeljo móža wot dźensnišeho online na za Rakečanski projekt hłosować.
JANKAHANKA předstaja nowy album
Drježdźany. Po dźewjećlětnej přestawce je serbska band JANKAHANKA swój druhi hudźbny album zestajiła. Zběrku produkcijow z titulom „Wokomiki“ chce skupina sobotu 26. apryla w Budyskim Kamjentnym domje zjawnosći předstajić. Tikety za koncert předawaja na internetnej stronje Budyskeho Kamjentneho domu.
Kak w horće serbsce kubłać
Budyšin. W horće Budyskeje Serbskeje zakładneje šule su so dźensa kubłarki a kubłarjo serbskich hortow na fachowu wuměnu zetkali. Tema bě serbskorěčne kubłanje. Zarjadowar dalekubłanja je Rěčny centrum WITAJ, wuměnu je sobudźěłaćerka centruma Jadwiga Kaulfürstowa moderěrowała. Wo wuslědkach informujemy w jutřišim wudaću SN.
Lajskim hrajerjam „Sławu“ zanjesli
Parkowanišća budu wužadanje
Za krajny žnjowy dźakny swjedźeń so hač do pjatka přizjewić
Wojerecy (AK/SN). Přihoty za lětuši 26. sakski krajny žnjowy dźakny swjedźeń wot 12. hač do 14. septembra we Wojerecach derje běža. Tole rjekny referent wyšeho měšćanosty Olaf Dominick na zašłym posedźenju měšćanskeje rady w swojej rozprawje. „Pytnjemy, zo su towarstwa, iniciatiwy a zajimowe skupiny jara motiwowane, a to we Wojerecach kaž tež we wokolinje“, Dominick rozłoži. Žnjowy dźakny swjedźeń wotměje so runočasnje z měšćanskim swjedźenjom. Hłowny organizator je Łužiska hala hromadźe z mnohimi nazhonitymi partnerami. Mjez druhim je to Sakski krajny kuratorij za wjesnu kónčinu, kotryž přewostaji 250 000 eurow. Swjedźeń zahaja 12. septembra z mytowanjom dobyćerjow 32. wubědźowanja wo najrjeńšu žnjowu krónu a najrjeńši žnjowy wěnc. Wuhotowarjo tohole wubědźowanja su zwjazk wjesnych žonow a cyrkwinske wosady.
