Krótkopowěsće (03.02.26)
Horst Gallert njeboh
Budyšin. Bywši krajny rada Budyskeho wokrjesa Horst Gallert je tele dny w starobje 88 lět zemrěł. Wot lěta 1992 do 2001 je so wón rozsudnje za wuwiće Budyskeho wokrjesa zasadźował. „Njezapomnite je wosebje jeho zasadźenje za kulturu, přewažnje za Němsko-Serbske ludowe dźiwadło“, krajny rada wokrjesa Udo Witschas a jeho předchadnik w zastojnstwje Michael Harig (wobaj CDU) wčera hódnoćeštaj.
Wo strategiji rozmyslowali
Wojerecy. Na wčerawšej rewěrowej konferency we Wojerecach diskutowaše něhdźe 20 wobdźělnikow z wobłukow komunow, politiki, hospodarstwa, wědomosće a ciwilneje towaršnosće wo přichodnym postupowanju hladajo na změnu strukturow w brunicowych kónčinach. Sakske ministerstwo za infrastrukturu a krajne wuwiće bě na nju přeprosyło. W srjedźišću konferency steješe ewaluacija a přichodna strategija.
Historisku chorhoj nabyli
Angažowana kubłarka na wuměnk šła
Přemało cokora do a po porodźe je strašne
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (74)
Princip, kotryž za kóžde zwěrjo a kóždeho čłowjeka płaći, zda so banalny: Za strowy wotběh ćěła a wukonow je energija trěbna. A energiju zdobywa sej čłowjek kaž zwěrjo z cyroby. Prosty mały energijowy dźělčk je cokor, zo bychu bańki ćěła dźěłać móhli.
Pobrachuje-li energija z cyroby, pyta ćěło za rezerwami. Tuki w ćěle so wottwarja a na wěstu formu energije přetworja. Hakle hdyž su wšitke tuki přetrjebane, so tež muskulatura za dobywanje energije wužiwa, zo bychu organy ćěła dale dźěłali.
Předstaja film
Budyšin. Sekcija hudźba Maćicy Serbskeje přeprošuje na dalše zarjadowanje. Štwórtk, 5. februara, w 19 hodź. předstaji w sydarni čo. 106 Budyskeho Serbskeho domu filmowu dokumentaciju serbskich ludowych rejow. Wšitcy zajimcy su wutrobnje přeprošeni.
Radźićeljo wuradźuja
Róžant. Přichodne posedźenje gmejnskeje rady Ralbicy-Róžant wotměje so štwórtk, 5. februara, we 18.30 hodź. w Róžeńčanskej gmejnskej sydarni. Mjez druhim póńdźe wo to, kotre stejišćo gmejna zabjerje, hdyž dóńdu próstwy inwestorow wo twar fotowoltaikowych připrawow na gmejnskich ležownosćach.
Chrósćicy. Tohorunja štwórtk, ale w 19 hodź., zeńdźe so Chróšćanska gmejnska rada w gmejnskim a kulturnym centrumje. Tam chcedźa mjez druhim hospodarski plan za lěto 2026 předstajić a wo nim diskutować.
Worklecy. Tež Worklečanska gmejnska rada zeńdźe so štwórtk, 5. februara, w 19 hodź., a to w horće „K wódnemu mužej“. Radźićeljo chcedźa dalše nadawki we wobłuku saněrowanja wyšeje šule „Michał Hórnik“ rozdawać. Tónraz póńdźe wo suchotwar a wo zatwar durjow.
Policija (02.02.26)
Njestrózbeho na e-scooteru lepili
Kamjenc. Při wobchadnej kontroli na Njeswačanskej dróze w Kamjencu su zastojnicy tamnišeho policajskeho rewěra mjez druhim 42lětneho na e-scooteru přepruwowali. Dźiwneho zadźerženja dla testowachu jeho na drogi. Test na amfetaminy bě pozitiwny.
Krabat zaso woła
W Čornym Chołmcu su z pokiwow a namjetow wopytowarjow wuknyli
Čorny Chołmc (SN/MiR). „W kurjawje samoty“ rěka lětuša inscenacija w rjedźe Krabatoweje powěsće, kotruž Kulturny centrum Krabatowy młyn w Čornym Chołmcu přihotuje. Kaž nowinska rěčnica Susann Wuško zdźěli, su za to regionalne předewzaće Kreevo tzwr z Noweje łuki zdobyli, kotrež so wo knihowanje zastupnych lisćikow stara. „Smy přispomnjenja a namjety wopytowarjow z lońšeho lěta přewzali“, rjekny jednaćel kulturneho centruma Anton Fuchs, „změjemy přidatne rjadowanje ze serwerom, kiž ma wulki nawal wopytowarjow na online-portalu wodźić.“ Loni běše naprašowanje porno předchadźacemu lětu wo 250 procentow stupało. Lětsa dalše stopnjowanje wo połsta procentow wočakuja.
Tójšto dźěła tež w nowym lěće
Radwor (SN/MkWj). Na dźěłapołne lěto zhladowali su spěwarki a spěwarjo Radworskeho chóra Meja na swojej hłownej zhromadźiznje minjeny štwórtk w swojim domicilu „Słodenku“. Předsyda Daniel Henich je cyłu sep terminow naličił, kotrež su čłonojo loni swěru zmištrowali.
Wusahowace zarjadowanja běchu sobuskutkowanje we wulkim chórje składnostnje swjedźenskeho tydźenja „800 lět Malešecy“. Dalše wjerški běchu lětni koncert při wosadnej cyrkwi kónc awgusta z 240 wopytowarjemi a ze skupinu „Wólbernosće“ jako hósć kaž tež nalětni koncert na žurli Serbskeho domu w Budyšinje z dobrym wothłosom.
Na wuspěšnej premjerje „Adwent na dworach“ na Radworskej nawsy je Meja tohorunja sobu skutkowała a tak prezencu serbskeje rěče zaručiła. Předsyda chóra dźakowaše so w swojej rozprawje wuraznje dirigentej Pětrej Cyžej za swěrny, mjeztym dobrych 20 lět trajacy hudźbny nawod kaž tež Lubinje Žurowej, kotraž jeho zastupuje, hdyž je trjeba. Dźakowali pak su so tež Monice Wenclowej za swědomite rjadowanje financow.
Po sobotnišich wječornych kemšach je so něhdźe 70 póstniskich ...
Krótkopowěsće (02.02.26)
Wostanu jednanjakmani
Zhorjelc. Zhorjelski wokrjes wodychnje. Sakska krajna direkcija je jemu dodatny etat přizwoliła. Najebać budget we wobjimje 841 milionow eurow pak je połoženje nadal napjate. Zhorjelski wokrjes so hižo dlěje z financielnymi ćežemi bědźi. Přizwolenje dodatneho etata bě jenož z wuwzaćnym rjadowanjom móžne.
Prawicarske pady přepytowali
Drježdźany/Lipsk. Statny škit je loni jědnaće padow z ekstremistiskim prawicarskim pozadkom na sakskich wysokich šulach přepytował a to w Drježdźanach a Lipsku. Tole zdźěli sakske ministerstwo za wědomosć na naprašowanje frakcije Lěwicy w Sakskim krajnym sejmje. Na Lipšćanskej uniwersiće bě to mjez druhim akcija z plakatami tak mjenowaneje Sachsengarde.
Na kursaj so přizjewić
Budyšin. Zajimcy za rěčny kurs čěšćiny w Praze (wot 16. julija do 13. awgusta) abo w Čěskich Budějovicach (wot 2. awgusta do 24. awgusta) njech w Rěčnym centrumje WITAJ hač do 15. měrca swoje přizjewjenske podłožki wotedadźa. Formular a dalše informacije su na internetnej stronje přistupne.
Mjetarjo finale přěhrali
Ma nowe ideje a wróći so k swojim korjenjam
Pascal Noack budźe bórze šef SKC w Slepom
Slepo (AK/SN). Pascal Noack ze Slepoho budźe wot měrca Slepjanski Serbski kulturny centrum nawjedować. Z tym naslěduje wón Sylwiju Panošinu. 28 lět je wona zarjadnišćo rozhladniwje nawjedowała a je přez dobre a ćežke časy wjedła. Nětko so wona na wuměnk poda.
„Formaty, kotrež su jara dobre a woblubowane, chcu dale wjesć“, praji Pascal Noack. „K tomu słušeja na přikład dźěćacy program ptačeho kwasa 25. januara, tradicionalne wiki jutrownych jejkow, wustajeńca jabłukow nazymu a program z nałožkami a tradicijemi w decembru.“ Zdobom ma 36lětny nowe ideje. Nastać móhła na přikład nowa rumnosć, w kotrejž móhli dźěći hrajkajo a na dyrdomdejske wašnje serbske baje, bajki, tradicije, nałožki a drasty zeznać. Pokročować chce nowy nawoda zhromadne dźěło z pěstowarnjemi a šulemi. „Předstajomne su tohorunja zarjadowanja za Slepo a wokolinu. Na přikład móhli so na žurli čaporowe wiki wotměć“, přichodny nawoda měni.
