Derje wopytane bě minjenu njedźelu swjedźenišćo w Nowym Měsće nad Sprjewju, jako tam tamniše domizniske towarstwo kóždolětne walkowanje jutrownych jejkow přewjedowaše. Hinak hač druhdy w zašłych lětach wjedro tónraz derje měnješe. Tuž bě tójšto dźěći swoje jutrowne jejka sobu přinjesło a so we walkowanju pospytało. Nowoměšćanske žony w serbskej drasće na to dźiwachu, zo by wšitko swój porjad měło. K tomu poskićachu wjesne žony kofej a tykanc. Za wobydlerjow je to w nalěću prěnja składnosć, z druhimi wjesnjanami zaso raz pobjesadować a zhromadnje zabawne popołdnjo dožiwić. Foto: Jost Schmidtchen

Tež hdyž měješe ­jutry kóždy doma ­wjele dźěła, wosebje tam, hdźež su křižerjo, su sej mnozy čitarjo chwile brali, našu jutrownu křižowku wuhódać a nam prawu wotmołwu „Pój witaj nalěćo“ do redakcije pósłać. Nad tym abo tamnym přidatnym postrowom smy so wosebje zwjeselili. Při­wšěm njebě za redakcisku fortunu jednore, dobyćerjow zwěsćić. Nad stajnje dwěmaj zastupnymaj lisćikomaj za Krabatowu sagu njedźelu, 29. junija w Čornym Chołmcu smětaj so wjeselić Hańža Bjeńšowa z Róžanta a Měrćin Wagner z Radworja. Jimaj přejemy hižo nětko wjele wjesela. Wšitcy dalši pak ­njech přichodny raz zaso našu křižowku z mytami wuhódaja.

We Wojerecach matej wodźenski system za pěškow a dožiwjenska ławka nastać

Wojerecy (AK/SN). Stare a nowe město we Wojerecach chcedźa do zhromadneho žiweho měšćanskeho centruma zjednoćić. Za to chce město srědki ze zwjazkoweho programa „Přichoda kmane nutřkowne města a centrumy“ zasadźić. Tole wuzběhny wyši měšćanosta Torsten Ruban-Zeh (SPD) na zašłym posedźenju měšćanskeje rady. Wjetšina radźićelow přihłosowaše, srědki we wobłuku hospodarskeho plana města znowa rjadować. „Mamy 1,3 miliony eurow wot Zwjazka a 147 000 eurow swójskich pjenjez k dispoziciji“, rozłožuje wyši měšćanosta. W januaru 2022 bě měšćanska rada wobzamknyła, so na zwjazkowym programje wobdźělić. Nětko móža tole zwoprawdźić. We wobłuku programa chcedźa konkretne naprawy wuwiwać a planować. Při tym měli so wobydlerjo aktiwnje sobu zapřijeć.

Hórnikecy. Składnostnje 80. róčnicy wuswobodźenja wot nacionalsocializma chcedźa jutře, sobotu, w Hórnikečanskej energijowej fabrice měrowu lipu sadźić. K tomu su wšitcy wutrobnje přeprošeni. Zajimcy zetkaja so w 10.30 hodź. Tomu přizamknje so w 11 hodź. wodźenje po trajnej wustajeńcy. W 12 hodź. předstaja film „Kak klinči domizna?“ Felixa Räubera. Do njeho su tež wobrazy ze serbskich wsow sobu zapřijate.

Požohnuja motorske

Ralbicy. Lubowarjo motorskich a mopedow njech přijědu njedźelu, 4. meje, do Ralbic. W tamnišej cyrkwi započnje so w 14 hodź. wosebity nyšpor. Po nim motorske a mopedy požohnuja. Přizamknje so zhromadny wulět.

Porěči wo astrofyzice

Wojerecy. Wojerowska župa „Handrij Zejler“ a Domowinski projekt ZARI přeprošujetej na dalše zarjadowanje we wobłuku rjada „Rěčna swětłownja“ wutoru, 6. meje, we 18 hodź. do Wojerowskeho Domowinskeho domu na Drježdźanskej. Doktorand w Instituće za jadrowu a dźělčkowu fyziku na Drježdźanskej Techniskej uniwersiće Jan Wünscha přednošuje wo astrofyzice. Zajimcy su wutrobnje přeprošeni.

Z kolesom wěsće po puću