Slepo (AK/SN). We wobłuku europskich dnjow wuměłskeho rjemjesła přeprošuja zajimcow w Slepom njedźelu, 12. apryla, wot 10 do 17 hodź. hnydom na pjeć ­wšelakich městnach na wopyt a jim swoje durje šěroko wotewru. Hosćo dóstanu dohlad do ateljejow, dźěłarnjow a wustajeńcow.

Mjez druhim informuje drjeworězbar Thomas Schwarz wo swojim wuměłskim dźěle. W jeho ateljeju na Grodkowskej dróze 45 wuhladaš wjele nowych skulpturow ze stareho drjewa, mjez druhim ­filigranu seriju „Łopjena“. Jednotliwe dźěła nastachu z wodoklona (Platane) a robinije. W hosćencu „Brauwerk“ při sportnišću na Šulskej dróze pokazuje Max Koitschka, kak piwo warja. Wězo móža sej wopytowarjo tež słódnu kapku popřeć. Nimo toho tam Jörg Tausch a Leon Wagner swoje wuměłske twórby předstajitaj.