Wojerecy. Deniz Yücel, němsko-turkowski žurnalist, publicist a bywši předsyda PEN-kluba Němskeje, je pjatk, 10. oktobra, z hosćom rjadu „Grit mit ...“. W 19 hodź. chce so we Wojerowskej Kulturnej fabrice z filmowču a wědomostnicu dr. Grit Lemkowej mjez druhim wo swojim zhladowanju „na najnowše stawizny Němskeje“ rozmołwjeć. Při tym budźe wosebje wo rasizmje rěčeć. Zarjadowanje móža zajimcy bjezpłatnje wopytać, pjenježne dary pak njewotpokazuja.

Na oktoberski swjedźeń

Koslow. Koslowske wjesne towarstwo „K Žorawej“ přeprošuje na swój lětuši oktoberski swjedźeń sobotu, 11. oktobra. Wot 18 hodź. zaklinči hudźba z diskoteku Pristolis a wjesna młodźina wita hosći z pisanym programom poskitkow na jewišću w swjedźenskim stanje. Nimo toho chcedźa zwěsćić, štó ma při tomboli najwjetše zbožo. Štóž hač do 19 hodź přińdźe, zapłaći tři eura za zastup. Po tym płaći zastup pjeć eurow.

Wotewru wustajeńcu

Koči hajzl wina był

Wojerecy. Dokelž je w bydlenskim domje na Wojerowskej Schweitzerowej wutoru chětro smjerdźało, zawołachu wobydlerjo policiju. Zastojnicy zwěsćichu, zo bě zanjerodźeny koči hajzl wina. Wobsedźerka dyrbješe nuznik wurjedźić.

Kulow. Dźěćaca uniwersita je so wutoru prěni raz w Kulowskim Jakubetzowym wustawje wotměła. Tema zarjadowanja bě „Kak wulka je njeskónčnosć? Njeskónčnosć w matematice a druhdźe“. Prof. dr. Andrea Hoffkamp z fakulty za matematiku Drježdźanskeje techniskeje uniwersity bě sej do Kulowa dojěła, zo by dźěćom runje tak nazorne kaž zajimawe „čitanje“ poskićiła. Něhdźe 20 přitomnych mjez druhim zhoni, kak daloko je čłowjek něhdy ličić zamóhł, hdźe njeskónčnosć rólu hraje a čehodla ju trje­bamy. W interaktiwnym přednošku sej přitomni wotkrychu, što „rozumne“ a „njerozumne“ ličby su a zeznachu njeskónčne sumy kaž tež njeskónčnosć w geometriji. Skónčnje móžachu dźěći tež wosebitu app wuspytać. Prof. dr. Hoffkamp skedźbni w tym zwisku na „do­žiwjenski kraj matematika“ w Drjež­dźanach, hdźež móža dźěći tute a dalše zajimawostki kołowokoło matematiki zeznać. Lubina Popjelina

We Łazu a Wulkich Zdźarach kładu škleńčnonićowy kabl

Łaz (AK/SN). Wobydlerjo Łaza a Wulkich Zdźarow maja so přichodne měsacy škleńčnonićowej syći přizamknyć. W nimale 900 domjacnosćach chce firma Glasfaser Plus w nadawku Telekom přizamk za spěšny internet instalować. „Hač do oktobra 2026 ma wšo hotowe być. Na Kobličanskej dróze we Wulkich Zdźarach su twarske dźěła hižo zahajene. W aprylu/meji 2026 měli so prěnje přizamki wužiwać móc“, Kai Gärtner wot Telekom na zašłym posedźenju Łazowskeje gmejnskeje rady rozłoži.

Škleńčnonićowe kable kładu para­lelnje k wobstejacej syći koporowych ­kablow. Nichtó pak njebudźe nuzowany, wot koporoweho kabla na škleńčnoni­ćowy změnić. Kaž Kai Gärtner wob­krući, njeje dotal postajene, hdy so syć kopo­rowych kablow hasnje. Po jeho słowach hodźa so na ležownosćach prózdne roły za kładźenje nowych kablow wu­žiwać.