Kamjenc (MH/SN). Lětuša Kamjenska nóc cyrkwjow a muzejow je so zašłu sobotu w pózdnich hodźinach dnja skónčiła. Mnozy běchu składnosć wužili, sej při najrjeńšim wjedrje a w njezwučenym času muzeje a dalše zarjadnišća Lessingoweho města wotkrywać. Wšudźe knježeše dobra nalada.

Přespěšny był

Dobruša-Hućina. Ze spěšnosću 119 km/h je zašły pjatk šofer VW-busa z Budyskej značku po Běłych Nowoslicach smalił. Z tym bě wón 69 km/h přespěšny. Jeho wočakuja dypkaj w Flensburgu, 700 eurow pokutneho pjenjeza a tři měsacy jězbny zakaz. Pjeć hodźinow je měrjenski team na tamnišej Wjazońčanskej dróze spěšnosć jězdźidłow měrił. W cyłku bě tam w tym času 505 jězdźidłow po puću. Z nich je 109 dowolenu spěšnosć překročiło. 68 šoferow přija warnowanje, 41 pak ma pokutny pjenjez płaćić.

Woheń w bydlenskim domje

Kamjenc. W Kamjencu na Fichtowej dróze je njedźelu popołdnju w njewobydlenym wjaceswójbnym domskim woheń wudyrił. Přičina wohenja w bydlenju ­njeje dotal znata. Wěcna škoda wučinja ně­hdźe tysac eurow.

Dźěle jězdźidłow pokradnyli

Wojerecy. Zańdźeny kónc tydźenja su njeznaći w Ćisku na Dróze E dźěle jězdźidłow pokradnyli. Zastojnicy policije zwěsćichu, zo pobrachuja mj. dr. elementy za wobswětlenje nakładneju awtow. Škoda wučinja něhdźe 400 eurow, pokradnjene dźěle su 8 200 eurow hódne.

Dlěšodobne planowanje připrawy chce gmejna nětko přesadźić

Dźěwin (AK/SN). Na 39 hektarow wulkej płoninje južnje Dźěwina ma fotowoltaikowa připrawa z modulemi za składo­wanje miliny a přepinarnju nastać. Přewzaće ToRA Łužica tzwr z Mužakowa chce připrawu zhromadnje ze šwicarskim předewzaćom MET-Group natwarić. Zasadne wobzamknjenje k wuwjedźenskemu zrěčenju bě gmejnska rada Dźěwina w měrcu jednohłósnje schwaliła. Nětko su předewzaće do cyłkowneho plana wo wužiwanju ležownosćow zarjadniskeho zjednoćenstwa Slepo při­wzali. To je wuslědk třoch posedźenjow gmejnskich radźićelow minjeny tydźeń. Slepjanska gmejnska rada je projektej wutoru z wjetšinu přihłosowała a srjedu a štwórtk přihłosowachu Trjebinscy a Dźěwinscy radźićeljo jednohłósnje, plan wo wužiwanju ležownosćow wotpowědnje předewzaću změnić.

Tójšto wjesnjanow a wopytowarjow wokolnych wsow je so minjeny kónc tydźenja na 40. mejemjetanje w Koslowje zešło.

Koslow (AR/SN). Čłonojo wjesneho towarstwa „K žorawej“ w Koslowje su zhromadnje z dalšimi podpěraćelemi tradicionalny a lětsa jubilejny serbski swjedźeń přihotowali a woswjećili a z tym wotměnjawy kónc tydźenja dožiwili. Sobotu wječor su zhromadnje hudźbne bingo hrali. W towaršliwym kole su swjedźenscy hosćo hódali, sobu spěwali a so tójšto smjeli. Na zarjadowanju knježeše rozwólna nalada, z čimž bě to poradźeny zazběh swjedźenskeho kónca tydźenja.