Policija (19.05.26)
Woheń wudyrił
Družkecy. Njedźelu rano dyrbješe wohnjowa wobora w Družkecach, wjesnym dźělu Dobruše-Huskeje, woheń hašeć. Na dróze K wódnemu hrodej běše napoł dźewjećich woheń wudyrił. Z dotal njeznateje přičiny stej so wotpadkowej tonje zapaliłoj. Płomjenja přeskočichu na bliski carport. Tam stejacy bydlenski připowěšak bu wobškodźeny. Zranił so nichtó njeje. Wěcna škoda wučinja něhdźe 13 000 eurow.
Moped přećiwo kolesu
Dobrošecy. Njedźelu připołdnju staj 15lětny šofer mopeda a 61lětna kolesowarka na Horsta Zährowej šćežce w Dobrošecach pola Malešec hromadu zrazyłoj. Młodźenc bě po zdaću w křiwicy kontrolu nad swojim jězdźidłom zhubił a zajědźe do kolesowarki na druhim boku puća. Wobaj padnyštaj. Kolesowarka so zlochka zrani. Młodźenc, kiž njeměješe ani jězbnu dowolnosć ani zawěsćenje, wosta njezranjeny. Wěcna škoda na jězdźidłomaj wučinja nimale 500 eurow.
Napity kolesowar
Ze zapřahami sej wujěli
Pčołarska rozmołwa
Mały Wjelkow. Serbska pčólnica přeprošuje jutře, srjedu, 21. meje, na swětowym dnju pčołkow we 18 hodź. na serbske wodźenje z dr. Lubinu Malinkowej po Małym Wjelkowje. Zajimcy zetkaja so na Zinzendorfowym naměsće. Zarjadowanje wotměje so w rjedźe Serbskeho instituta „Sorabistika po puću“. Tomu přizamknje so pčołarska rozmołwa. Zajimcy njech přizjewja so na .
Interaktiwne figurowe dźiwadło
Budyšin. Němsko-Serbske ludowe dźiwadło přeprošuje štwórtk, 21. meje, na němskorěčnu inscenaciju „Jězba k srjedźišću ruma“. Mała žurla Budyskeho Dźiwadła na hrodźe přeměni so do klinčaceje rumnosće dožiwjenja, wuměłstwa a dźiwadła. Połdrahodźinska inscenacija předstaja stawizny wuměłskeho stila Bauhaus, jeho wuměłcow a wuměłče. Interaktiwna jězba skići publikumej wot dźesać lět móžnosć za swójske kreatiwne eksperimenty.
Wodowód dyrbja ponowić
Budyski wokrjes a Łazowska gmejna naprawy wothłosujetej
Łaz (AK/SN). W Bjedrichecach we Łazowskej gmejnje dyrbja nuznje wjace hač 70 lět stary wodowód za pitnu wodu ponowić. Nimo toho ma so dróha sporjedźeć, kotraž přez wjes wjedźe, a gmejna chce dwě busowej zastanišći bjez barjerow natwarić. Tež nadróžne wobswětlenje ma so ponowić. Łazowska gmejna a Budyski wokrjes chcetej naprawy w mjezsobnym wothłosowanju zwoprawdźić. Tomu je Łazowska gmejnska rada zašły tydźeń wotpowědnje dojednanjam wo wjesnych přejězdach z wokrjesom Budyšin přihłosowała. „Gmejna je winowata, so wo zakładne zastaranje ludnosće starać. K tomu słuša tež zastaranje z pitnej wodu“, rjekny Budyski krajny rada Udo Witschas (CDU), kiž Renéja Sickerta, nawodu wěcneho wobłuka za wudźeržowanje dróhow Budyskeho wokrjesa, přewodźeše.
Lyrikarka rěče zwjazuje
Wuznamna basnica Róža Domašcyna je z ćěłom a dušu Łužičanka. Hornjoserbska maćeršćina je jej z duchownej domiznu. Jako dźěćo bě tež z němskej rěču wotrostła, a ze šleskimi słownymi šlipkami.
Wojerecy (KD/SN). 1951 w Sernjanach rodźena wona spěšnje wotkry: Swójba ćěkancow ze Šleskeje ze susodstwa rěči trochu hinak hač wona sama. W basni „Wortkindheit“ powěda serbska basnica wo zetkanju z holcu tuteje swójby a dopomina so na nowe słowa, kotrež je wot njeje domoj sobu přinjesła. W šlešćinje rěka habla chójny šiške, w maćernej rěči šiška, čita Róža Domašcyna we Wojerowskim hrodźe ze swojeje aktualneje němskeje zběrki „Unterm weißleinenen tuch“. W zhromadnym słowje wowka so holcy kóžda w swojeje rěči namakatej. Róža Domašcyna tež rady připosłucha, hdyž jej wowka bajki a stawiznički ze stareho časa powěda. W šuli holca potom wysokoněmsce wuknje. Najpozdźišo wot toho wokomika hač do dźensnišeho pohibuje so wona w pletwje tutych rěčow.
Při najrjeńšim wjedrje je so zašłu njedźelu popołdnju w ...
Wjesnjanosta zastojnstwo złoži
Njebjelčicy (SN/hn/MiP). Wjesnjanosta Njebjelčanskeje gmejny André Bulank złoži kónc julija swoje zastojnstwo. Wotpowědnu powěsć je wčera wječor na internetnej stronje gmejny wozjewił. Swoje čestnohamtske zastojnstwo běše wón w septembrje lěta 2022 nastupił.
Ćežki rozsud je „konsekwenca wuwića w gmejnje, kotrehož dla je wěcowne a konstruktiwne dźěło njemóžne“, piše Bulank w swojej zdźělence wobydlerjam gmejny. Město na wuslědk orientowanych diskusijow dožiwja wón husto wosobinske nadběhi, škaranje a wědomu prowokaciju, štož gmejnske dźěło a rozsudy poćežuje a haći.
Krótkopowěsće (19.05.26)
Žadaja sej wurjadne posedźenje
Budyšin/Kamjenc. Iniciatiwa wjacorych frakcijow Budyskeho wokrjesneho sejmika žada sej wurjadne posedźenje gremija. Radźićeljo su sej přezjedni, zo njeměło so zawrjenje stacijow porodneje pomocy a gynekologije Kamjenskeje chorownje swj. Jana akceptować. Hišće w meji chcedźa zastupjerjo iniciatiwy, ke kotrymž słušeja Cordula Gneuss (AfD), Roland Dantz (Swobodni wolerjo), Kathleen Liebschner (BSW) a Alex Theile (Lěwica), posedźenje wotměć.
Harald Metzkes zemrěł
Altlandsberg. Rodźeny Budyšan Harald Metzkes je njeboh. Wuznamny wuměłc, kotremuž běchu mjez druhim „Cézannista z Prenzlauskeje hory“ rěkali, wumrě minjeny štwórtk 97lětny w braniborskim Wegendorfje, kaž jeho swójba zdźěli. Skutkował bě předewšěm w Berlinje, hdźež kulturnopolitiskim žadanjam socialistiskeho realizma so njepodwoliwši swójsku, wot impresionizma wobwliwowanu tworićelsku rěč wuwi.
Delnjołužisku turneju zakónčili
Wo ležownostnych mjenach zhonili
Symbol skótneho lěkarja
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (80)
Před skótnolěkarskej praksu abo na zapakowanskim materialu lěkow za zwěrjata je drje kóždy hižo raz symbol skótneho lěkarja wuhladał. Na čerwjenym pozadku pokazujetej so wulke běłe „V“ a had, kotryž so wokoło kija wije. „V“ poćahuje so jasnje na weterinarny wobłuk.
Pola hada jedna so wo eskulapoweho wuža (Äskulapnatter). Njeje jědojta a jewi so mjeztym dale a rědšo w Europje a w Aziji, hdźež je doma. Wuž so w ćopłej włóžnej wokolinje derje čuje, hdźež ma dosć móžnosćow so schować, kaž na př.: w rozpadankach chěžow abo w rědkej kerčinje. Zo by so wohrožena družina hadow škitała a znowa rozrosć móhła, je trjeba městnosće z wjele słóncom, wotpowědne lehnišća a městnosće k přetraću zymy wutworić.
