Znowa so paliło

Rakecy. W Rakecach je po wšěm zdaću zaso zapaler po puću. Póndźelu popoł­dnju je so tam 500 kwadratnych metrow lěsa při Nowowješćanskej dróze paliło. Minjene tydźenje policija wjacekróć rozprawješe, zo je něchtó woheń zamiškrił – mjez druhim tež w platowych by­dlenskich domach. Wjesnjanosta Swen Nowotny wobydlerjow tuž naležnje namołwja, zo tež najmjeńši pokiw policiji zdźěla. Pozdatne maličkosće móhli za přepytowanja wažne być. Dotal hišće ­žanoho podhladneho wuslědźili njejsu. Za Nowotneho je to „znjeměrnjowace“. Hižo wjacore lěta su w Rakecach stajnje zaso zapalerstwa Tak je so w zachodźe wjaceswójbneho domu hižo raz křesło paliło. Tute bě njeznaty z nowinami ­zapalił.

Budyšin (SN). Na zhromadźiznje zaměroweho zwjazka „Termalna kupjel Körse“ su čłonojo minjeny pjatk přepodaće wažnych planowanskich nadawkow schwalili. Z tym su zdobom nowu projektowu fazu zahajili. Nadawk planowanja objektow a wonkownych připrawow w Korzymskej kupjeli dóstanje Běrow za twarske planowanje Budyšin, kotryž přewozmje zdobom fachowe planowanje za tepjenje kaž tež za sanitarne a wentilaciske připrawy. Kóšty za planowanje objekta wučinjeja něhdźe 1,4 milionow, za planowanje mjenowanych připrawow něhdźe 485 000 eurow. Planowanje nošneje konstrukcije (Tragwerk) w cyłkownej hódnoće 160 000 eurow přewozmje firma Leonhardt, Andrä & Partner ze Stuttgarta.

Koncept za strukturu hospodarskeho plana jednohłósnje wobzamknyli

Njeswačidło (JK/SN). „To je jara zrědka, zo gmejnska rada tajki koncept za strukturu hospodarskeho plana jednohłósnje wobzamknje. Tu je to wuraz za to, zo su radźićelki a radźićeljo zrozumili, wo čo dźe a zo wužija šansu, gmejnu zaso na puć dobreho hospodarjenja wjesć.“ Tole rjekny wčera profesor Gerald Swarovsky na wurjadnym posedźenju Njeswačanskeje gmejnskeje rady. Wón bě w mi­njenych tydźenjach wobsah a ćežišća koncepta nastajił, kotrež su zakład za wyše dochody gmejny a zdobom mjenje wudawkow. Z wobzamknjenjom koncepta su skutkowanje Swarovskeho za gmejnu oficialnje skónčili. Tuž dźakowaše so wón wčera za dobre zhromadne dźěło z gmejnskim zarjadom, komornicu a wjesnjanostu Gerdom Schusterom (CDU). Dale přeješe gmejnskej radźe wjele wuspěcha při zwoprawdźenju kon­cepta za lěta 2025 do 2028, tež hdyž ­budźe to ćežki a bolostny puć.

Hórnikečanska energijowa fabrika chce swoju wobšěrnu zběrku kachlow a tepjenjow jako trajnu wustajeńcu wot lěta 2028 pokazać. Hižo lětsa w lěću móža sej wopytowarjo wosebitu wustajeńcu z titulom „MUTa(k)tion“ wobhladać.

Hórnikecy (AK/SN). Čłonaj muzejoweho teama energijoweje fabriki Kathrin Kruner a Andy Wagner tuchwilu wjace hač 800 objektow zběrki kachlow, pjecow a tepjenjow dokładnje předźěłatej. Wot kachlicy z lěta 1591 přez kachle z bywšeho jastwa hač k tajkim za kurjenje rybow – zběrka je jara wobšěrna. „Analyzujemy staw eksponatow a pohódnoćamy, kotre objekty dyrbimy wurjedźić a kotre restawrować“, powěda Kathrin Kruner. W lěće 2018 su w Hórnikecach eksponaty zběrać započinali. Mjez druhim je jim znata firma za tepjenjotwar Buderus w lěće 2005 swoju zběrku kachlow přewostajiła. Jako dočasny zaćišć wustajeńcy, kotruž chcedźa w lěće 2028 wotewrěć, ma energijowa fabrika hižo nětko dwaj objektaj w swojej trajnej wustajeńcy: transportabelne kachle z lěta 1925 a nastroj z mjenom „Athanor“ – kachle jako wuměłstwo.