Wustajeńcu pod hesłom „Via Sorabica HoyWoj – na slědach Serbow ...
Zhromadnje za strowe wodźizny w Radworskej gmejnje
Minakał/Radwor (SN/CeK). Něhdźe 25 sobudźěłaćerjow wjacorych regionalnych twarskich zawodow gmejnow je zašłu srjedu a štwórtk na 9. twarskim seminarje Zwjazka za wobswět a přirodoškit Němskeje (BUND) zhromadnje hrjebje rěkow ekologisce polěpšiło. W srjedźišću steješe hrjebja za Minakałom. Zaměr projekta je, małe wodźizny zaso do přirodźe bliskeho stawa zwjesć a jich ekologisku funkciju za organizmy a insekty we wodźe skrućić. Wobdźělnicy seminara postupowachu na inženjersko-biologiske wašnje: Do wody zapołožene hałuzy a drjewo tomu dopomhaja, zo woda pomałšo ćeče. Zdobom tónle material dno rěki stabilizuje a wutworjenje přirodneje pletwy korjenjow spěchuje. Zo njebychu hałuzy wotpławili, buchu z kolikami skrućene. Tež sadźenje rostlinow hraje wulku rólu. Zapozdźeneho transporta dla pak móža dźěłaćerjo drjewinu kaž wólše a duby hakle pozdźišo sadźeć. Štomy maja so w přichodźe wo chłódk postarać a žiwochi w rěce z tym dołhodobnje před horcotu škitać.
Krótkopowěsće (30.03.26)
Zwjazkoweho prezidenta wopytali
Berlin. Zwjazkowy prezident Frank-Walter Steinmeier (SPD) je pjatk w Berlinje zastupjerjow mjeńšinoweje rady pod nawodom Dawida Statnika, předsydy Domowiny, přijał. Statnik chwaleše po tym wotewrjenu a dowěrliwu rozmołwu, w kotrejž hosćo swoje žadanje wobkrućichu, zo matej so škit a spěchowanje domoródnych narodnych mjeńšin w zakładnym zakonju zakótwić.
Wjace hač tysac přihladowarjow
Budyšin. Wjace hač 1 000 wopytowarjow bě sej lětušu hornjoserbsku inscenaciju „Skazany pryzlak“ na cyłkownje šěsć předstajenjach Němsko-Serbskeho ludoweho dźiwadła wobhladało. Předwčerawšim su komediju Larsa Albauma w přełožku Měrany Cušcyneje posledni raz na hłownym jewišću pokazali. W přichodnej hrajnej dobje chce ju NSLDź w němskej wersiji předstajić.
Worklečanski šuler najlěpši čitar
Přeprošuja na dźeń swójbow
Wulke Ždźary. Na dźeń swójbow su wobydlerjo a wopytowarjo jutře, sobotu, na Krabatowy wudwór we Wulkich Zdźarach přeprošeni. Wot 15 do 18 hodź. chcedźa tam jutrowne jejka debić. Zajimcy měli sej wudute jejka sobu přinjesć.
Na jutry so přihotować
Njebjelčicy. „Hodźinku před Bohom“ wuhotuje Njebjelčanski chór swjateje Cecilije sobotu, 28. měrca, w 20 hodź. pod hesłom „Ja sym puć a prawda a žiwjenje“ (Jan 14,6) w tamnišim Božim domje. Na pěsnje, psalmy a modlitwy słuchajo, kotrež młodostni přednjesu, su wšitcy přeprošeni, so duchownje na jutry přihotować. Kóždy měł sej swěčku sobu přinjesć.
Powěda industrijowe stawizny
Hórnikecy. 150 fotografiskich portretow najwšelakorišich ludźi je wot tohole kónca tydźenja w Hórnikečanskej energijowej fabrice wustajenych. Na fotach su ludźo zwobraznjeni, kiž su něhdy w sakskich industrijowych zawodach dźěłali, w přewrótowym času swoje dźěło zhubili a so pozdźišo na hinaše wašnje do powołanskeho žiwjenja nawróćili.
Nowe hrajkanišćo za Łazk
W Delanach dóstanu wjacore twarske předewzaća spěchowanje
Róžant (JK/SN). Nastupajo naćisk lětušeho hospodarskeho plana gmejny Ralbicy-Róžant, kiž bě nimale cyły februar zjawnje wupołoženy, njebě ani dodawka ani spřećiwjenja dóšło. Tak móžeše gmejnska rada na swojim wčerawšim posedźenju z wjetšinu hłosow lětuši etat wobzamknyć. Tele lěto je hospodarski plan hišće wurunany, znazdala pak so na gmejnskim njebju hižo ćěmne mróčele přichoda bliža.
Policija (27.03.26)
Žonam tobołku pokradnyli
Wojerecy. Hnydom třom žonam su njeznaći srjedu we Wojerecach jich ručnu tobołku pokradnyli, jako běchu wone nakupować. Tak su skućićeljo připołdnju na Šulskej tobołku 64lětneje žony spakosćili. W njej bě něhdźe 70 eurow. Dalši pad sta so pozdźišo w kupnicy na industrijnišću, hdźež 88lětna žona nakupowaše. Wokomik, jako wona swoju tobołku skrótka z wočow pušći, paduši wužichu a ju hrabnychu. Škoda wučinja w tymle padźe 250 eurow. A skónčnje so 70lětna na Łužiskim naměsće z woporom paduchow stała, jako so jeje tobołka z něhdźe 60 eurami zhubi.
Jězor jako žórło ćopłoty?
Hamor (AK/SN). Drježdźanska techniska uniwersita přepytuje tuchwilu Bjerwałdski jězor na móžne termiske wužiwanje w přichodźe. We wobłuku slědźerskeho projekta THETA (Termiske wužiwanje bywšich brunicowych jamow) wědomostnicy wot nalěća 2026 hač do lěća 2027 přeslědźa, kak so termiske wužiwanje jězora na lokalne prudźenja, temperaturu wody a na dalše wobłuki wuskutkuje. „Za to nastanje na sewjernym pobrjohu pospytna připrawa. Nimo toho wodu jězora wobstajnje kontrolujemy“, rozłoži dr. Johannes Feldbauer z Drježdźanskeho instituta za hydrobiologiju na zašłym posedźenju Hamorskeje gmejnskeje rady. Projekt financuja ze srědkow Swobodneho stata Sakskeje a Europskeje unije.
Aktualne wudaće němskeho časopisa SuperIllu wěnuje so serbskej ...
Krótkopowěsće (27.03.26)
Tarifowy konflikt rozrisałoj
Drježdźany. Tarifowy konflikt w sakskim zjawnym bliskowobchadźe je rozrisany. Dźěłarnistwo Verdi je so z komunalnym zwjazkom dźěłodawarjow na nowe tarifowe zrěčenje dojednało. Mjez druhim su přistajeni štyri lěta před wupowědźenjom škitani a dóstanu wo 20 proc. wyšu lětnu přiražku. Tež přiražki za nócne dźěło maja stupać. Ze swojim žadanjom 35hodźinskeho dźěłoweho tydźenja z połnej mzdu so dźěłarnistwo přesadźiło njeje.
Pasionska hra online přistupna
Chrósćicy/Budyšin. Nahrawanje loni předstajeneje pasionskeje hry „Sćěhuj mje!“ je wot dźensnišeho na platformje YouTube přistupne, a to na kanalu studija Lucija, kotryž je produkciju zwoprawdźił. Zajimcam bjez znajomosćow serbšćiny poskićeja podtitule w sydom rěčach, mjez druhim w pólšćinje, jendźelšćinje, italšćinje a francošćinje.
Nowa wěža po 120 lětach
