Chrósćicy (lmc/SN). Što činiš na šěrym, dešćojtym njedźelnišim popołdnju? Za Chróšćanow běše wotmołwa jasna: Wopyt předstajenja Němsko-Serbskeho ludoweho dźiwadła (NSLDź) „Won do swěta“. Po wuspěšnej prapremjerje w Radworju běše wčera tež wjacezaměrowa hala w Chrósćicach hač na poslednje městno pjelnjena. Za něhdźe 200 přihladowarjow su stólčki přistajić dyrbjeli.

Wosebje jónkrótne na inscenaciji re­žiserki Esther Undisz běše direktne za­přijeće přihladowarjow do stawizny wupućowanja stow łužiskich Serbow do ameriskeho Texasa. Tak předčitachu wopytowarjo na přikład lisćiny wupućowarjow za tydźenje trajacu mórsku jězbu na płachtaku Ben Nevis w lěće 1854. Z tym nasta jara realne začuće, jako by sam dźěl tuteje stawizny był.