Policija (28.07.25)
Płujadło znjezbožiło
Narć. Wo njewšědnym njezbožu rozprawja Zhorjelska policajska direkcija z Narća. Tam je pjatk po připołdnju płujadło na lětanišću znjezbožiło. Po wšěm zdaću je pilot kontrolu nad mašinu zhubił, jako přizemi. Při tym je so mašina rozłamała, kaž w rozprawje rěka. Wěcna škoda wučinja něhdźe 20 000 eurow. Zranił pak so na zbožo nichtó njeje.
Awto do štoma prasnyło
Kulow. Na statnej dróze S 95 mjez Kulowcom a Němcami je so pjatk popołdnju ćežke wobchadne njezbožo stało. 66lětny muž bě ze swojim Audijom do směra na Kulowc po puću. Z dotal njeznateje přičiny zhubi wón w lěwej křiwicy krótko před Kulowcom kontrolu nad swojim awtom, zajědźe předaloko na prawy bok jězdnje a prasny do štoma. Ćežko zranjeneho šofera dowjezechu do chorownje. Na awće nasta 11 000 eurow škody.
Trjebaja kupanskeho mištra
Hamor/Rychwałd (AK/SN). Lětuša kupanska sezona w Rychwałdskej kupjeli, kotruž tamniši wjesny klub organizuje, žněje dotal dobry wothłós. To rjekny wjesnjanosta Hendryk Balko (Hamorske wolerske zjednoćenstwo) na zašłym posedźenju gmejnskeje rady. „Wopytowarjo su z nowym kupanskim mištrom spokojom. Płuwanske kursy so poskićeja. Tež wječorne płuwanje seniorow je jara woblubowane“, wón rozłoži. Kupjel wopřijima 50 metrow dołhi basenk a wulke suwadło. Při rjanym wjedrje je kupjel hač do 31. awgusta wot póndźele do njedźele stajnje wot 14 do 19 hodź. wotewrjena. W času sakskich šulskich prózdnin je samo wot 10 do 20 hodź. přistupna.
Krótkopowěsće (28.07.25)
Nowa režijna dwójka
Budyšin. Program lětušeje hornjoserbskeje schadźowanki změjetaj Milena Wowčerjec a Maximilian Gruber jako režijna dwójka na starosći. Wonaj naslědujetaj Katku Pöpelec a Symana Hejdušku, kotrajž staj nadawk w zašłych lětach spjelnjałoj. 151. schadźowanka wotměje so 22. nowembra tradicionelnje w Budyskej Krónje. Nadrobnosće čitajće jutře w SN.
Wurywanja njemyla twarjenja
Budyšin. Wurywanki srjedźowěkowskeho sydlišća na Lawskim arealu njebudu po aktualnym stawje twar Serbskeho foruma wědy wobwliwować. To je Serbskim Nowinam zastupowaca direktorka Załožby za serbski lud Michaela Mošowa wobkrućiła. Dźěło archeologow potrjechi areal druheje twarskeje fazy při Lawskich hrjebjach. Najprjedy twarja na róžku Hošic hasy/Wonkowneje Lawskeje.
Spěchuje twarjenje z drjewom
Talenty na zahrodźe
Smjerdźaca. Na dalše zarjadowanje w rjedźe „Zahrodka talentow“ přeprošuja Smjerdźečanske kubłanske srjedźišćo LIPA, wjesna rada, wohnjowa wobora a wjesna młodźina njedźelu, 27. julija, do Smjerdźečanskeho kulturneho domu. Započatk budźe w 16 hodź. Awtorki a awtorojo čitaja z antologije „Serbstwo, quo vadis?“. K tomu poskićuja kofej, tykanc a čerstwe napoje.
Wuhotuja wjesny swjedźeń
Róžant. 1. a 2. awgusta wotměje so lětuši wjesny swjedźeń w Róžeńće. Wón započnje so pjatk we 18 hodź. z wubědźowanjom wohnjowych woborow a z wotewrjenjom piwoweho stana. Sobotu přeprošuja wot 15 hodź. na bičwolejbulowy turněr młodźinskich klubow a na dźěćacy swjedźeń z mnoho rjanymi zabawami. Mjez druhim připowědźa organizatorojo skakanski hród, hry z wodu, wušiknostne zaběry a molowanje. Wot 19 hodź. budźe diskoteka za dźěći. Wot 21 hodź. su trochu starši na reje z diskoteku Melodia přeprošeni. Wobaj dnjej poskićuja chłódne napoje a kulinariske chłóšćenki.
Pčołarić bjez medikamentow
Policija (25.07.25)
Policistow slepił a ćeknył
Wojerecy. Z jednoreho zasadźenja wobsadki policajskeho awta silwesterskich praskotakow dla je so srjedu we Wojerecach honjeńca za njeznatym mopedistom wuwiła. Tón je po wšěm zdaću zastojnikow z laserpointerom slepił a so na to zminył. Policisća smalachu za nim. Mopedist ćěkaše z wulkej spěšnosću po wjacorych dróhach a při tym zdźěla chódniki wužiwaše. Wšitke signale policajskeho awta, zo ma zastać, muž ignorowaše. Policisća dyrbjachu samo nahle zaborzdźić, zo njeby podhladny do nich zrazył. Skónčnje so njeznaty w parku na Starej Berlinskej dróze zhubi. Jako so zastojnicy na poprawne městno zasadźenja wróćichu, nańdźechu tam třoch młodostnych a w bliskosći wužiwany laserpointer.
Na wjeršku Čornoboha dale posłužuja
Wjeršk Čornoboha je jedyn z najwoblubowanišich wulětowych cilow hornjołužiskeje hórskeje krajiny. Po někotrych lětach přestawki tam wopytowarjow mjeztym zaso wot lěta 2016 pohosćeja. Nětko maja nowy team wobhospodarjerjow.
Kumwałd/Kubšicy/Budyšin (UM/SN). W hórskim hosćencu na Čornobohu maja wot spočatka měsaca noweho wobhospodarjerja. Tole zdźěli Kumwałdski wjesnjanosta Thomas Martolock w informaciskim łopjenu swojeje gmejny. Je to skupina, kotraž wobsteji z dotalneje nawodnicy hosćenca, šefkucharja kaž tež dalšich, wusko z hosćencom zwjazanych a tam dźěłacych wosobow. Tale skupina naslěduje Elmara Laduša, kotryž je hosćenc wot lěta 2016 wjedł. Do toho bě twarjenje wjacore lěta prózdne stało. Kaž dale rěka, chce dotalny wobhospodowar nowemu teamej poboku stać a jón podpěrać.
Model jězoriny sej wobhladać
Hórnikečanska energijowa fabrika wo zajimawosć bohatša
Hórnikecy (SN/MWj). Chceš-li so wobhonić, dokal móhł sej we łužiskej jězorinje z kolesom dojěć, kotry kanal kotre jězory zwjazuje abo kotry z jězorow hišće wopytał njejsy, maš na GoogleMaps drje najlěpši přehlad. Wšako jedna so dohromady wo něhdźe 7 000 hektarow wulku wódnu płoninu. Mjeztym móžeš sej ju tež na modelu wobhladać, kotryž su tele dny do Hórnikečanskeje energijoweje fabriki přiwjezli. 15 lět bě model na tak mjenowanych terasach IBA při Rańskim jězoru wustajeny. Industrijowy muzej je jón nětko wot města Rań (Großräschen) přewzał, kaž w nowinskej zdźělence informuja.
Hdyž su žitnišća wotžnjate, móžeš na někotrych městnach ...
Zjawne kupjele wohrožene?
Wo dźesać do pjatnaće procentow su ličby wopytowarjow kupjelow w poslednich třoch lětach spadowali. Nimo njewobstajneho wjedra zaleži tole tež na zdźeržliwosći mnohich hosći po pandemiji.
Budyšin (sp/jp/SN). Dešć, chłódne temperatury a dowolowy resp. prózdninski čas – tule kombinaciju sej tuchwilu nichtó njepřeje. Tola lětsa tomu tak je. W zašłych tydźenjach, w času lěćnych prózdnin, bě přewažnje chłódno a mokre, potajkim žane prawe wjedro za kupanje. Na kóncu šulskeho lěta pak, jako šulerjo a studenća při horcych temperaturach w připołdnišim času chwile njemějachu so kupać, běchu temperatury rjane a samo horce. Popołdnju po šuli běchu šulerjo wot wšědneho stresa w šuli wučerpani, tak zo často hižo dosć energije nimaja so z přećelemi zetkać a so zhromadnje kupać. Tuž wulki dźěl młodźiny hižo do kupjelow njechodźi. Krótše puće, mjenje ludźi a zo njetrjebaš zastup zapłaćić su dalša přičiny, zo so mnozy za hinaše kupanišća rozsudźa. Tole tež mnoho kupjelow pytnje. Ličba wopytowarjow woteběra a z tym steji eksistenca kupjelow na hračkach.
Krótkopowěsće (25.07.25)
Čitanska nóc w Drježdźanach
Drježdźany. We wobłuku Dołheje čitanskeje nocy w Nowym měsće je wčera wosom awtorkow a awtorow wurězki ze swójskich powědančkow a lyriku na łuce Drježdźanskeho Japanskeho pawiljona předstajiło. Mjez druhim recitowaštaj Lilly Vostry a René Seim basnje, Benedikt Dyrlich čitaše ze swojeje zběrki „Der Tiger im Pyjama – tiger w nócnej košli“.
Trójce a dosć
Praha. Senat, to je hornja komora čěskeho parlamenta, je wo přiwótřenju prawidłow za azyl a migraciju wothłosował. Mjez druhim su postajili, zo móže so wukrajnikej, kiž w běhu jednoho lěta tři přeńdźenja skući, dowolnosć přebywanja zběhnyć. Skućićel so tež hižo wo azyl požadać njemóže. Nowela, z kotrejž reaguje na migraciski pakt Europskeje unije, chcyła proces mjezynarodneho škita pospěšić a znjewužiwanju zadźěwać.
Narunaja zakuskowe wagony
