Hnězdo baćona we Wotrowje rozkoru zawinowało
Hdyž baćon přileći, so ludźo poprawom wjesela – ale nic přeco a wšitcy
Wotrow (dpa/SN). Corpus delicti je 8,40 metrow wysoki a steji na łuce we Wotrowje. Na swójskej zahrodźe je Škodźic swójba w nalěću 2023 sćežor z baćonjacym hnězdom nastajiła. Hižo krótko pozdźišo bě hnězdo wobsadźene. Škodźic swójba bě so wot njewotwisnych sobustawow Zwjazka za přirodoškit Němskeje (Nabu) poradźować dawa, kotřiž su w Hornjej Łužicy hižo tójšto baćonjacych hnězdow wuspěšnje nastajili.
„Smy hnězdo za wjes nastajili“
„Smy hnězdo za cyłu wjes nastajili. Wobydlerjo so wjesela, jenož někotři nic“, zwurazni mać Mónika Škodźina. „Hdyž sym tehdy přez wsy našeje kónčiny jěła a baćonjace hnězda widźała, mějach zaćišć, zo tež Wotrow hnězdo trjeba.“ Tři Škodźic dźěći darichu staršimaj baćonjace hnězdo. Konrad Škoda je knihu wo lehnidle baćonow wjedł. Z kuchinskeho wokna je so wšědnje nad žiwjenjom w hnězdźe wjeselił.
Sascha Lej wustupi
Kulow. Berlinski spěwytwórc Sascha Lej koncertuje jutře, pjatk, wot 19.30 hodź. při Kulowskim Jakubetzowym wustawje. Jeho spěwy powědaja wo małych wšědnych dźiwach, wo zwjazanosći mjez ludźimi a wo pospyće, w dźensnišim njelochkim času čłowjeskosć wobchować. Zastup płaći dźesać eurow.
Kamjenc póćmje zeznać
Kamjenc. Muzej zapadneje Łužicy poskićuje jutře a sobotu stajnje wot 21 hodź. wječorne wodźenje po Kamjenskim starym měsće. Wobdźělnicy słyša dawno zabyte stawiznički a zhonja wo znatych mjenach, potajnych městnosćach a njewšědnych podawkach. Zajimcy njech přizjewja so na knihowanskim portalu muzeja. Tam zhonja, hdźe so njewšědne wodźenje po měsće započnje.
Policija (02.07.26)
Wandalizm a padustwo
Lejno. Wodosportowy centrum při Lejnjanskim jězoru bě w nocy na wutoru cil njeznatych wandalow a paduchow. Po informaciji policije su so skućićeljo namócnje na areal zadobyli a tam wěcnu škodu načinili. Mjez druhim su njeznaći mosćik nad wodu wobškodźili. Nimo toho zhubi so z areala twarski płót, kotryž bě něhdźe 150 eurow hódny. Njeprošeni nócni wopytowarjo naparachu při tym něhdźe 500 eurow wěcneje škody. Padustwa a wobškodźenja wěcow dla Wojerowski policajski rewěr pad dale přepytuje.
Muzejej hrozy kónc
Město Wojerecy lětnu přiražku za wustajenišćo kompjuterow cofnje
Wojerecy (AK/SN). Swoju přiražku za kompjuterowy muzej Konrada Zuseho we wobjimje 25 000 eurow wob lěto město Wojerecy wot 1. julija 2027 hižo njepłaći. To je měšćanska rada tutón tydźeń ze snadnej wjetšinu wobzamknyła. „Muzej trjeba nuznje koncept za wobsahowe wusměrjenje a za dalše financowanje. Załožba a załožbowa rada muzeja matej so wo starać. Ručež konceptaj předležitej, móhło so město na financowanju zaso wobdźělić“, rjekny wyši měšćanosta Torsten Ruban-Zeh (SPD) wutoru na posedźenju Wojerowskich měšćanskich radźićelow.
Dotal je kompjuterowy muzej wob lěto 91 000 eurow wot Kulturneho ruma Hornja Łužica-Delnja Šleska dóstawał. Za to pak dyrbješe město swójski podźěl 80 000 eurow přidawać. Tón stej sej město (25 000 eurow) a bydlenjotwarska towaršnosć (55 000 eurow) dźěliłoj. Trěbne pak by wo wjele wjace pjenjez było. Ruban-Zeh rěčeše wo 250 000 eurach wob lěto. Tež bydlenjotwarska towaršnosć swój podźěl nětko hižo njepłaći.
Spěšna pomoc nětko spěšniša
Zdźěr (CS/SN). Nowu wuchowansku stražu su předwčerawšim w Zdźěri swjatočnje poswjećili. Z tym je w Budyskim wokrjesu hižo 18 tajkich nowonatwarjenych wuchowanskich stražow. Krajny rada Udo Witschas na přepodaću zwurazni, zo je to za wokrjes dobry dźeń. Wón chwaleše, zo su twar dypkownje wotzamknyli. Hakle před njecyłym lětom běchu zakładny kamjeń połožili. Wosebje wuzběhny Witschas wulkotnu podpěru Holanskeje farmy jako bjezposrědnjeho susoda při přizamknjenju medijow a kładźenju wopłóčkowych rołow.
Nowa wuchowanska straža stara so sobu wo to, zo dóstawaja ludźo spěšnu pomoc tam, hdźež je wona trěbna. Předewšěm wobydlerjo gmejnow Wulka Dubrawa, Radwor a Malešecy budu z toho profitować. Dalšej wuchowanskej straži nastanjetej klětu w Zejicach a 2028 we Wojerecach. Z tym wokrjes do wuchowanskeje słužby inwestuje kaž lědma druhi. Zdźěrjanska straža płaćeše 1,93 milionow eurow.
38. raz je so wčera wječorne spěwanje pod měrowym dubom w ...
Krótkopowěsće (02.07.26)
Myto za inowatiwne ideje
Němcy. Wjes Němcy je so wuspěšnje na zwjazkowym wubědźowanju „Naša wjes ma přichod“ wobdźěliła. Za swoje inowatiwne ideje dóstanu Němcy złotu plaketu a premiju we wobjimje 15 000 eurow. Z tym počesći zwjazkowe ministerstwo za ratarstwo, zežiwjenje a domiznu wosebity angažement wsy.
Za załožbowu radu kandidować
Budyšin. Domowina pyta namjety za kandidatow serbskich zastupjerjow Sakskeje w radźe Załožby za serbski lud. W Sakskej ma Zwjazkowe předsydstwo Domowiny po wothłosowanju ze serbskimi zjednoćenstwami nadawk, serbskich zastupjerjow za załožbowu radu wuzwolić. Tuž pyta Domowina wosoby, kiž móhli nadawk wot 2027 do 2031 přewzać. Namjety maja so z naprašnikom hač do 31. oktobra w zarjedźe Domowiny wotedać.
30 lět na dobro jězoriny
Šajatović a Krabat – stawizna a mytos
Biograf Hans-Jürgen Schröter z Kulowa swoje dźěło znowa wusměrja
Hižo nimale dwaj lětdźesatkaj Hans-Jürgen Schröter žiwjenje chorwatskeho połkownika Janka Šajatovića (1624–1704) – historiskeje wosoby, z kotrejež je powěsćowa figura Krabata wušła – přeslědźuje. Nětko Kulowski genealoga, publicist a biograf swoje dźěło znowa wusměrja. Jeho dotalny center genealogije naruna wot spočatka tohole lěta Łužiski legendarij (LausitzLegendarium). To je platforma za regionalne stawizny, mytiske slědźenje a kulturne posrědkowanje. Zwjazane je to z wiziju Załožby „Johann von Schadowitz“. Wo nowym wusměrjenju, zaměrach a wizijach přichoda je so Andreas Kirschke z nim rozmołwjał.
Knježe Schrötero, čehodla je z něhdyšeho centera genealogije Łužiski legendarij nastał?
Přećelow-partnerow w Jelenjej Górje wopytali
Hakle w meji, składnostnje lětušeho Budyskeho nalěća, je Budyske towarstwo měšćanskich partnerstwow hosći z Heidelberga witało, při čimž 35 lět wobstejace partnerske zrěčenje potwjerdźichu a wobnowichu. Njedawno pobychu někotři čłonojo Budyskeho towarstwa w Pólskej. Na přeprošenje přećelow z Jelenjeje Góry wobdźělichmy so na 25. jubileju „Lemberskeho spěwa“, kotryž woswjeći so w dźiwadle Zdrojowy Teatr Animacij w měšćanskim kurowym parku. Znata wuměłča Honorata Magdeczko-Capote prezentowaše wšelakich lawreatow zašłych lět a skićeše tak hosćom z wobeju krajow pisany a jara hnujacy program. Ze zhromadnym grilowanjom so wječor zakónči. Tola nic jenož kulinariske wokřewjenja nas wočakowachu. Z wulkotnym gitarowym přewodom Magdeczko-Capote a ze sepju spěwow našich pólskich přećelow njemóžachmy na tutym přećelskim wječoru cyle sobu dźeržeć!
Serwisowe stacije nastajili
Wojerecy. Nowe serwisowe stacije za jednoru reparaturu kolesow maja nětko we Wojerecach. Nastajili su je direktnje při kolesowych garažach při dwórnišću, na torhošću w starym měsće a při Łužiskim centeru. Stacije su z trěbnym gratom a powětrowej klumpu wuhotowane. Inwesticija we wobjimje nimale 7 700 eurow pochadźa ze spěchowanskeho programa zwjazkoweho wobchadneho ministerstwa. Dalša tajka stacija ma w Němcach blisko wětrnika nastać.
Pytaja hodowny štom
Budyšin. Wosrjedź lěća pyta Budyski krajnoradny zarjad hodowny štom, kotryž ma w adwenće krajnoradny zarjad pyšić. Jehlinowc měł něhdźe dźesać metrow wysoki być a nic dale hač dźesać kilometrow wot Budyšina zdaleny stać. Štóž tajki štom ma a chce jón přewostajić, njech so w krajnoradnym zarjedźe pod land přizjewi. Wobsedźerjam žane wudawki njenastanu. Wo podrězanje a transport stara so wokrjes.
Serbski lěkar informuje
