Wiki rjemjesła je towarstwo Dwórnišćo inkluzije Radwor sobotu prěni raz na arealu bywšeho Radworskeho dwórnišća zarjadowało. Wopytowarjo móžachu sej rjemjeslniske wudźěłki kupić abo sej sami něštožkuli zhotowić. Wiki nimaja jónkrótne wostać.

Radwor (SN/BŠe). Něhdźe 15 rjemjeslnikow wobdźěli so zawčerawšim, sobotu, najebać horcotu na prěnich rjemjeslniskich wikach na ležownosći bywšeho Radworskeho dwórnišća. Prěni raz bě tamniše towarstwo na wosebitu přehladku přeprosyło. Pozadk toho je Leaderowy projekt, kotryž so 30. junija skónči. We wobłuku projekta je towarstwo prawidłownje dźěłarnički přewjedowało, na kotrychž zaběrachu so wobdźělnicy ze starym rjemjesłom. „Z wikami chcemy projekt zakónčić“, praji předsydka towarstwa Raphaela Wićazowa. Tuž spřistupnichu organizatorojo wobdźělene rjemjesła hišće raz wjetšemu publikumej. W běchu projekta je sobudźěłaćerka towarstwa Sylwia Weße styki z regionalnymi rjemjeslnikami nawjazała. Za přihot wikow tule syć rady wužiwaše.