Třeću sobotu smažnika smy so z někotrymi dorosćenymi, kotřiž w Budyskim Serbskim domje čěsce wuknu, hižo sedmy raz na wulět do bliskeje Čěskeje po­dali. Tónraz smy sej jako cil město Nový Bor a mjez turistami jara woblubowanu wjes Sloup njedaloko Čěskeje Lípy wu­zwolili.

Město Nový Bor (němsce něhdy Haida) je jenož něhdźe 60 kilometrow wot Budyšina zdalene a ma 11 000 wobydlerjow. Muzej škleńčerstwa bě prěnja sta­cija našeho wulěta. W lěće 1893 załoženy je wón druhi najstarši po cyłym swěće. Wobhladachmy sej eksponaty a zho­nichmy tójšto wo stawiznach muzeja, ale runje tak wo wuwiću stilow a techno­logijow škleńčerstwa w tamnišej wo­kolinje wot 18. lětstotka hač do dźens­nišeho.

Wot muzeja na Naměsće měra njebě daloko hač k našej přichodnej staciji. Bě to originalny hosćenc Huť (wuškrěwarnja). Tam móžeš při wobjedźe přez wulke wokna do dźěłarnje hladać a škleńčerjam při dźěle přihladować. Mjeztym zo maja škleńčerjo w 15 hodź. swjatok, je hosćenc wězo dlěje wočinjeny.