Samozrozumliwje serbsce rěča
Oberlichtenau (SN/MiR). Barokny hród w Oberlichtenauwje stawa so dźeń a bóle zetkanišćo za kreatiwnych młodych ludźi. Na to pokazowaše tež prěni lětni digitalny camp na hrodźe. Poskitk towarstwa Fabmobil je na wšě 30 młodostnych na areal přiwabił. Wot zašłeje srjedy hač do pjatka su zajimcy w starobje 15 do 18 lět přez tři dny kreatiwni byli. Wjetšina młodostnych pochadźa z města a wokoliny, dalši su sej mjez druhim z Plauena, Drježdźan a z Łužicy dojěli. Mjez nimi běchu tež serbscy hólcy a serbske holcy z delanskich kónčin. „Pola nas je samozrozumliwje, zo serbsce rěčimy, ručež so na poskitkach Serbja wobdźěla“, rozłožuje załožer designoweho a slědźenskeho stu-dija The Constitute a nawoda projekta Fabmobil Bosćij Pjaca, kiž je sej zhromadnje z Christianom Zöllnerom imobiliju a ležownosć loni kupił.
Krótkopowěsće (15.07.26)
Serbska rada wusud připóznawa
Podstupim. Braniborska rada za serbske naležnosće je so dźensa z wusudom wyšeho zarjadniskeho sudnistwa w Berlinje rozestajiła, w kotrymž běše skóržbje wjacorych komunow přećiwo přirjadowanju k serbskemu sydlenskemu rumej přizwoliło. Ze zjawneho stejnišća wuchadźa, zo nochce, byrnjež z wšelakimi argumentami procesa přezjedna njebyła, dale přećiwo wusudej prawnisce postupować.
Za wučbnicy wjac płaćić
Berlin. Za nakup wučbnicow dyrbjachu kupcy lětsa w juniju wjace pjenjez nałožić hač w smažniku loni. Statistiski zwjazkowy zarjad (Destatis) zdźěla, zo su so płaćizny za wučbnicy wo 2,3 procenty zwyšili. Zešiwki a rysowanske bloki płaćachu porno tomu 0,3 procenty mjenje.
Bencin w Čěskej zaso dróši
Kak dale z wětrnikom nadal njejasne
Wjace čerwjenych milanow w Budyskim wokrjesu
Njeswačidło (dpa/SN). Čerwjeny milan so w Budyskim wokrjesu dźeń a dale rozmnožuje. Z přepytowanjom zwěsćichu lětsa 78 lehnjenskich porikow – wjace hač hdy do toho. To Njeswačanska ptakoškitna stacija zdźěli. Wjace hač połojca porikow je jejka wulahnyła – cyłkownje wuhladachu fachowcy 99 młodych ptačkow: „W hnězdach widźiš zwjetša jednoho abo dwaj młodej ptačkaj, tři skerje zrědka.“
W juniju su pazoraki wopjeršćenjeli. Procedere njeje ničo za słabe čuwy a sej žada, zo nimaš strach před wulkimi wysokosćemi. Zo by so k młodym milanam dóšoł, dyrbiš z wosebitym železom k jich hnězdu 13 do 24 metrow wysoko krosnować. Młode ptački so potom w měšku dele k zemi pušća. Tam je wuměrja, waža a jim rynku přityknu. Po tym wróća je do hnězda, hdźež stare ptački swój dorost bjez problemow zaso přiwozmu.
Policija (14.07.26)
Kedźbu před wysokej danju
Połčnica. Štóž chce swoje zamóženje rozmnožić, dyrbi so před wobšudnikami na kedźbu brać. Tole je nětko žona w Połčnicy bolostnje nazhoniła. Kaž policija zdźěli, je wona hižo spočatk junija na po wšěm zdaću seriozny poskitk reagowała, při kotrymž slubichu jej wysoku dań. Wona inwestowaše něhdźe 60 000 eurow. Jako chcyše sej minjeny kónc tydźenja pjenjezy wupłaćić dać, so wšitko jako wobšudnistwo wopokaza a žona přizjewi so pola policije. Při tym so wukopa, zo bě wona wobšudnikam tajne daty wo swojim konće přeradźiła. Kriminalna policija pad přepytuje.
Skónčnje nadźija na nowy puć
W Swinjarni klětu wot wulkeje wody wobškodźenu dróhu ponowja
Swinjarnja (SN/MWj). Hižo wjele lět sej wobydlerjo Swinjarnje přeja a žadaja, zo ma so skónčnje puć ponowić, kotryž je před lětami wulka woda hnydom dwójce dospołnje wobškodźiła. Mjez druhim je njewjedro w meji lěta 2016 w třiróžku Pančicy-Kukow, Chrósćicy a Wotrow tak sylnje zachadźało, zo je woda wšón plestrowany puć rozdrěła a plesternaki do delnjeho hata wotnošała. Po dźesać lětach so nětko nadźijeja, zo tehdy prowizorisce wuporjedźany puć prawje znowa natwarja. Kaž wjesnjanosta Pančic-Kukowa Markus Kreuz (CDU) na zašłym posedźenju gmejnskeje rady zdźěli, chcedźa lětsa z planowarjom Peterom Linku wšitko tak daloko přihotować. Tak móhli klětu prěni twarski wotrězk natwarić.
Za płotom zahrody so zbožo chowa
Kerstin Bischoff wobhospodarja wot kónca měrca we Wawicach „Mału zahrodowu kofejownju“. Za nju je to wjace hač jenož wobchod, přetož z tym je sej žiwjenski són spjelniła.
Wawicy (UM/SN). Štóž tute durje překroči, zastupi do druheho swěta. Rustikalne drjewjane durje, kotrež njewjedu do twarjenja, ale do „Małeje zahrodoweje kofejownje“ w Bukečanskim wjesnym dźělu Wawicy. „To běchu prěnjotnje zachodne durje Bartskeho dwórnišća“, wuswětla Kerstin Bischoff. „Mój bratr je durje restawrował a tu zatwarił.“ Z tym staj najwažnišej protagonistaj Wawičanskeje zahrodneje kofejownje pomjenowanaj – wobhospodarka Kerstin Bischoff a jeje bratr Roland. Muž ze złotymaj rukomaj, kotryž swójski rjemjeslniski serwis wjedźe, je mały paradiz bytostnje sobu wuhotował.
Pobrjóh Budyskeho spjateho jězora skići tuchwilu wšo druhe hač ...
Kolesuja hač do Hünfelda
Dale a wjac zatepjenych
Budyšin (MiJ/LiH/SN). W němskich wodźiznach zemrěchu minjeny měsac telko ludźi, kaž hižo 20 lět dołho nic. Horce temperatury skićachu dobre wuměnjenja za wočerstwjenje při jězorach, rěkach abo w kupjelach. Runje ćopłe wjedro je pak tež sobu z přičinu, zo mnozy we wodźe swoje žiwjenje přisadźuja. Znajmjeńša 99 kuparjow so w juniju zatepi, zdźěla Němska towaršnosć za wuchowanje žiwjenja (DLRG). Najwjac woporow při kupanju zličichu w juniju 2003, jako 107 so kupacych zemrě.
Lětsa w juniju zatepichu so w Sakskej tři wosoby, dwě wjace hač loni w smažniku. Hakle minjenu sobotu zemrě 38lětny w jězorje njedaloko Lipska. Policija tuka na njezbožo abo mediciniski nuzowy pad. Po statistice wosebje mužojo při kupanju zemrěja. Prezidentka DLRG Ute Vogt na to skedźbni, zo běchu w juniju 90 procentow woporow mužojo. Tohorunja su zwjetša młodźi ludźo potrjecheni. 40 wot 99 zemrětych běchu młódši hač 30 lět. K smjertnym njezbožam dóńdźe wosebje na jězorach a rěkach, hdźež njejsu hustodosć wuchowanscy pomocnicy na městnje.
