Wjesela so na Barowy Festiwal
Radwor (SN/ VaŽ). Kołowokoło Radworskeho młodźinskeho kluba knježi tučasnje wulki hołk a tołk. Hižo minjeny kónc tydźenja je tamniša młodźina swój lětuši „Barowy Festiwal“ přihotować započała. Swjedźenski stan steji, jewišćo je natwarjene – předwjeselo je wulke! Tež wčera młodostni pilnje městnosće dekorěrowachu, techniku twarjachu a poslednje detaile wobrěčachu. Wot 8. do 10. awgusta 2025 smědźa so wopytowarjo na wotměnjawy program młodych a starych wjeselić – organizowany z wjele lubosću wot Radworskeje młodźiny. Tute zarjadowanje mjeztym hižo štwórty raz přewjedu.
Jutře, pjatk, w 19 hodź. festiwalny kónc tydźenja z tradicionalnym natočenjom piwa zahaja. Poł hodźiny pozdźišo, w 19.30 hodź., startuje woblubowany korčmowy kwis, při kotrymž njejsu jenož mudre hłójčki požadane, ale tež ludźo, kiž su kmani w teamje dźěłać. Wot 22.30 hodź. prosy DJ Systhemfehler na rejwanišćo.
Gmejna woswjeći jubilej
Před 30 lětami so do noweje komuny Halštrowska Hola zjednoćili
Hory (AK/SN). „Smy sylna zhromadnosć, w kotrejž wobchowamy tradiciju, w kotrejž pak smy tež nowemu wuwiću wotewrjeni.“ Tole praji wjesnjanostka Antje Gasterstädt (CDU) wo gmejnje Halštrowska Hola z jeje dźewjeć wjesnymi dźělemi a něhdźe 3 200 wobydlerjemi. Lětsa wobsteji komuna 30 lět. Z pisanym swjedźenskim programom tónle jubilej wot 4. do 7. septembra woswjeća.
„1. julija 1995 su so gmejny Nowa Łuka/Hory, Zabrod, Narć, Bjezdowy, Židźino, Ptačecy, Bluń a Lejno, kotrež běchu do toho samostatne, w gmejnje Halštrowska Hola zjednoćili“, pisa wjesnjanostka w aktualnej gmejnskej nowinje, zhladujo na minjene tři lětdźesatki. „W tymle času je wuwiće Halštrowskeje Hole wjele wjerškow dožiwiło. K tomu słušeja nowe bydlenske domy, gratownje dobrowólneje wohnjoweje wobory a pěstowarnje. Naspomnić so tohorunja ma, zo bu přemysłownišćo Nowa Łuka/Hory powjetšene, zo bu industrijowa přestrjeń Bluń/ Zabrod wutworjena a zo je so při našich łužiskich jězorach turizm wuwił.“
Zaběraja so z powětrom
Stróža. Na kóncu lětnich prózdnin přeprošuje zarjadnistwo biosferoweho rezerwata Hornjołužiska hola a haty w Stróži pola Hućiny jutře, pjatk, wot 15 do 18 hodź. na slědźersku dźěłarničku, w kotrejž steji powětr w srjedźišću. Předewšěm dźěći móža z eksperimentami nazhonić, z čeho powětr wobsteji, čehodla je wón za čłowjeka a přirodu wažny a kak móžemy jón zwužitkować. Wobdźěleni budu sokołarstwo Winde, Budyski młodźinski dujerski orchester, předewzaće Sakski lěs a zarjadnistwo biosferoweho rezerwata. Wosebje swójby z dźěćimi a šulerjo su wutrobnje witani.
Hotuja so na swjedźeń
Policija (07.08.25)
Kolesowarka znjezbožiła
Brětnja. Ćežke wobchadne njezbožo stało je so wutoru popołdnju pola Brětnje. Kaž policija rozprawja, bě tam 42lětna žona na lěsnym pućiku z kolesom po puću a spytaše spłóšiwe konje popadnyć. Při tym wona najskerje přez korjeń štoma zajědźe, njezbožownje padny a so ćežko zrani. Žonu dyrbjachu z helikopterom do chorownje lećeć. Policija pad dale přepytuje.
Nowa gratownja wažny měznik była
Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (12)
Hižo jako 16lětny je so Daniel Rychtar rozsudźił, stać so z wohnjowym wobornikom w Pančicach-Kukowje. To bě w lěće 1987. Wote wšeho spočatka bě młodemu wobornikej wažne, sej teoretisku wědu runje tak kaž praktiske kmanosće přiswojić. Tutej zasadźe je wšě lěta swěrny wostał. Tuž njezadźiwa, zo su jeho kameradojo před jědnaće lětami za nawodu wobory wuzwolili.
Wjele lět je towarstwo United clubs of Kulow při tamnišim ...
Zakónča prózdniny z pisanym poskitkom
Radwor/Smjerdźaca (SN/mj). Tež w tutym poslednim prózdninskim tydźenju maja dźěći hišće tu a tam składnosć, so zhromadnje zabawjeć a zaběrać. W Smjerdźacej a w Radworju móža šulerjo wot 1. do 4. lětnika tójšto noweho nazhonić a dožiwić. Na sportowym a medijowym campje w Smjerdźacej wobdźěli so dohromady 32 dźěći. „Zmysł tutoho tydźenja je, dźěćom městnosć dać, hdźež móža činić, štož chcedźa, ale je při tym tež nowe wěcy nawučić“, praji Michaela Rabowa, kotraž je za poskitk w kubłanskim srjedźišću LIPA hłownje zamołwita. Wo wuknjenski podźěl stara so Michał Cyž ze swojimi pomocnikami. Wón chce dźěćom swět medijow zbližić a jim pokazać, kak móža je zmysłapołnje wužiwać. Tak podachu so póndźelu na Wotrowske hrodźišćo, zo bychu rostliny a žiwochi z pomocu digitalnych mikroskopow lěpje zeznali. Wutoru nawuknychu na kreatiwne wašnje, kak maja ze škričkowadłami wobchadźeć. Tež geocaching z pomocu GPS su přewjedli. „Znajomosće škričkowadła a techniki GPS budu dźěći w dalšim žiwjenju přeco zaso trjebać“, měni Michał Cyž. Na třećim dnju dźěše hłownje wo robotiku.
Krótkopowěsće (07.08.25)
Serbska přirada so zetkała
Slepo. Čłonojo serbskeje přirady Zhorjelskeho wokrjesa su so wčera, srjedu, w Serbskim kulturnym centrumje w Slepom schadźowali. Jedyn z ćežišćow zetkanja běše naprašnik, z kotrehož pomocu chce přirada zwěsćić, hač wobydlerjo serbskeho sydlenskeho ruma we wokrjesu serbske nałožki pěstuja a do kotreje měry maja serbske korjenje.
Šejcowa nawjeduje redakciju
Choćebuz. Diana-Susanne Šejcowa je nowa nawodnica delnjoserbskeje redakcije sćelaka rbb. Wo tym informuje wjednica Choćebuskeho regionalneho studija Sandra Fritsch. Šejcowa dźěła wot lěta 2022 za serbski program a naslěduje Marion Stenselowu, kotraž bě so spočatk lěta na wuměnk rozžohnowała. Najwažniši nadawk Šejcoweje budźe zdobyće noweho personala za serbsku redakciju.
Zarjadniske słužby w serbšćinje
W bróžni sej zhromadnje zaspěwali
Orchidejowu łuku posykli a trawu zrumowali
Ćisow (HS/SN). Kóžde lěto spočatk awgusta přewjedźe Kulowska přirodoškitna skupina NABU wosebitu akciju w přirodoškitnej kónčinje Dubrjenske bahno. Jónu wob lěto mjenujcy syku a rumuja orchidejowu łuku pola Ćisowa, kotraž je we wobsydstwje mjenowaneje skupiny. Wjele dešća w minjenych tydźenjach dla bě łuka jara włóžna, tak zo trjebachu wobdźělnicy nimo kmaneho gratu tež gumijowe škórnje.
Byrnjež 1,2 hektarow wulku łuku z mašinu za syčenje a z motorskej kosu syc napinace ćělne dźěło było, je něhdźe 20 čestnohamtskich pomocnikow, čłonow towarstwa a dalšich dobrowólnikow při rumowanju łuki pomhało. Ze synowymi hrabjemi woni trawu hromadźe hrabachu, na stabilne folije nasypachu, je z ruku hač ke kromje łuki ćehnjechu a tam składowachu. Někotre awtowe připowěšaki połne trawy jako picu za skót wotwjezechu.
