Budyšin. We wobłuku adwentneho rjadu „Pišćelowa hudźba k non“ poskići druhu adwentnu njedźelu z Baćonja pochadźacy a čas swojeho powołanskeho žiwjenja na wuznamnym městnje, mjenujcy w Berlinskej katedrali swj. Jadwigi skutkowacy cyrkwinski hudźbnik Tomaš Žur kedźbyhódny program. Tónraz wotmě so 45 mjeńšin trajacy koncert z ćežišćom pišćeloweje hudźby Serbow a realizo­wany wot wuběrnych serbskich inter­pretow, w cyrkwi Našeje lubeje knjenje. Duchowne słowo k tomu poda kapłan Pětr Mróz.

Kaž hižo tydźeń do toho młody Serb Johannes Kral přednjese tež Tomaš Žur k twórbam swětosławneho mištra ba­roka Johanna Sebastiana Bacha moderne kompozicije serbskich hudźbnikow a tworješe tak wospjet zajimawy kontrast. Wot Jana Cyža běše koncertny organist hižo někotružkuli kompoziciju w Serbach kaž tež druhdźe interpretował. Tónraz měješe won jako prěni z jeho titulow „… er sa(h) tie(f)“, wot Friedemanna Böhme za pišćele wobdźěłany, w programje. Nimo toho zaklinča jeho wobdźěłanje němskeho chorala „In Gottes Namen fahren wir“ kaž tež načasny ­pišćelowy responsorij „Dona nobis“.