Na Póstowym naměsće prěni raz wosebite adwentne wiki

Budyšin (SN/MWj). Prěni raz přewjedu Budyske turistiske towarstwo, management nutřkowneho města a Serbska kulturna informacija (SKI) sobotu a njedźelu na Póstowym naměsće zhromadne dohodowne wiki. Wopytowarjow wočakuja 13. a 14. decembra nimo pisaneho programa tež najwšelakoriše poskitki. Tak móža na woběmaj dnjomaj serbske figury z hliny zhotowjeć a hodowne kule debić. Wjacori wuměłcy wustupja ze swojim programom. Mjez druhim čita Wotrowčanka Stephanie Domaškec swójske hodowne stawiznički a na jewišću před Serbskim domom zahudźa šulerjo Budyskeho Serbskeho gymnazija.

Jedna z wosebitosćow budu tyzy, kotrež móžeš pola jednotliwych wikowarjow z darikami pjelnić a rjenje zapakować dać. Na te wašnje hodźa so pakćiki indiwidualnje zestajić. Při wudebjenju pomhatej team SKI a Kerstin Roscher w swojej molowanskej kofejowni. Zarjadowarjo přihotuja zdobom kulinariske wosebitosće kaž plincy, poliwki, horce cocktaile, grilowane kołbaski a mjaso, samočinjene horce wino a wjele dalšeho.