Policija (03.11.26)
Wobšudnicy pjenjezy wotzběhnyli
Łaz. Žona z Łaza bě minjeny kónc tydźenja z woporom wobšudnikow. Woni přewzachu najprjedy kontrolu nad jeje ličakom a bórze na to tež nad jeje kontom. Žona sedźeše před swojim laptopom, jako bě tón nadobo blokěrowany. Jeničce telefonowe čisło je na wobrazowce widźała a namołwu, zo ma na tute zwonić. To wona tež činješe a njeznaći jej při telefonje rozkładźechu, što ma činić. Jako pozdźišo wo tym ze swojim synom porěča, bě hižo přepozdźe. Na konće pobrachowaše 6 000 eurow. Žona přizjewi tónle pad jako wobšudnistwo pola policije, kotraž nětko za skućićelemi pyta.
Wabjenske tafle pokradnyli
Kamjenc. Njedźelu dopołdnja informowachu wobydlerjo w Kamjencu policiju wo tym, zo su njeznaći na Sydlenskim puću wjacore wabjenske tafle za piwo pokradnyli. Te namakachu zasadźeni zastojnicy w bliskej garaži. Dohromady bě jich sydom wabjenskich taflow. Nimo toho lepichu tam štyrjoch podhladnych skućićelow w starobje 16 a 17 lět. Po tym zo běchu jich daty zwěsćili, wzachu policisća tafle zaso sobu a přepodachu je wobsedźerjam.
Hosćencar so za serbšćinu zajimuje
Na šibałstwa so dopominali
Rjadowniske zetkanje 60 lět po wuchodźenju šule
Chrósćicy (SN/BeW). Poměrnje prawidłownje, mjenujcy kóžde pjate lěto, zetkawaja so něhdyši šulerjo Chróšćanskeje serbskeje šule „Jurij Chěžka“, kotraž bě tehdy hišće Ludowa šula, kotřiž su 1958 do prěnjeho lětnika zastupili. 1966 woni šulu po wosom lětach wopušćichu. Tehdy bě jich 25 dźěći, mjez druhim z Łusča, Časec, Nuknicy a Lejna. Sydom něhdyšich sobušulerjow je mjeztym na prawdu Božu wotešło, powěda Angela Domšowa ze Serbskich Pazlic. Před sobu ma nowinski wurězk z lěta 1991. Hižo tehdy, jako bě so rjadownja po 25 lětach zetkała, rěkaše w napismje „Domiznje su wšitcy swĕrni wostali“. A tomu je tak wostało, tak Lucija Rubinowa z Njeswačidła. Najdale bě lěkar Michał Lajder přišoł – do Drježdźan, wona šibale přeradźi. Chrysta Johnowa pak je we Wuskidźi žiwa. Wšitcy druzy su w domiznje wostali – wšojedne hač jako kowar, blidar abo wodźer kranow we Łužicy.
Smědźa z prawom hordźi być
Malešecy (at/SN). Poprawom móža Domowinjenjo w Malešecach tróšku hordźi być. Lětsa su z dwěmaj podawkomaj kulturne wjesne žiwjenje přewšo wobohaćili. Zo je so to stajnje we wuskim zhromadnym dźěle z tamnišej wosadu stało, wuspěch njepomjeńši. W meji bě Chór Židźino připosłucharjow nalětnjeho koncerta w cyrkwi zawjeselił, a před něšto dnjemi wuhotowaše tam Budyski młodźinski dujerski orchester wulce chwaleny nazymski koncert. Do radosće pak změša so kapka njespokojnosće. Wo tym zhonichu wobdźělnicy z rozprawy předsydki Maritty Schneideroweje na hłownej zhromadźiznje Domowinskeje skupiny njedawno w sportowym hosćencu.
Podpěruja wutwar šćežki
Lejno (SN/MWj). Gmejna Pančicy-Kukow chce wutwar a kwalifikowanje kolesowanskeje šćežki „Serbske impresije“ po cyłej Łužicy podpěrać. Wo tym běchu sej čłonojo tamnišeje gmejnskeje rady na swojim zašłym posedźenju w Lejnje přezjedni. Tam je jim předsyda towarstwa Serbski kulturny turizm (SKT) Pětr Brězan projekt wutwara šćežki předstajił.
Dotal hižo wobstejacu šćežku chce SKT na cyłu Łužicu, potajkim hač do Braniborskeje, rozšěrić. Wona ma dohromady něhdźe 500 kilometrow dołha a na wosom dnjowych etapow rozdźělena być. Planuja čaru tak, zo kolesowarjow stajnje we wotstawku 20 do 30 kilometrow k dožiwjenskim dypkam wjedźe. Tam zhonja potom něšto zajimaweho wo Serbach a Łužicy. Jedna z tajkich stacijow móhła nowa komunikaciska arena w Pančicach-Kukowje być. Tu maja wšak tež nabiwansku staciju za elektrokolesa. Dale hodźałoj so klóšter Marijina hwězda a Muzej Ćišinskeho jako staciji zapřijeć. Přidatnje móhli tež na bliske Wotrowske hrodźišćo pokazać.
Młoda serbska literatura w klubje
Chrósćicy. Něhdźe 20 ludźi dožiwi minjeny pjatk w měrnej atmosferje Chróšćanskeho młodźinskeho kluba druhe čitanje z njedawno wušłeje antologije „LitMiks“ z tekstami, kotrež zajimy młodych ludźi tematizuja. „LitMiks“ – hač do dźesateho wudaća w lěće 2024 hišće pod mjenom „Paternoster“ znaty – je literarny knižny rjad za młode serbske awtorki a młodych serbskich awtorow z Łužicy. Zběrku wudawa Ludowe nakładnistwo Domowina w dwulětnym rytmusu.
Projekt funguje jako platforma za młodostnych a młodych dorosćenych w starobje něhdźe 15 do 29 lět. Tu móža woni swójske basnje, krótkoprozu abo dramatiske teksty hornjo- a delnjoserbsce wozjewić. Mnoho přinoškow pochadźa z literarneho wubědźowanja LND. Wudaće wudospołnjeja pak tež dalše twórby. Kónc žnjenca wuńdźe najnowše wudaće „LitMiks 26“, kotrež zjednoća 23 twórbow 14 wšelakich awtorkow a awtorow. Wobsah wjerći so kołowokoło wosobinskich žiwjenskich swětow, dwělow, sonow a žortnych wobkedźbowanjow wšědneho dnja.
Krótkopowěsće (03.11.26)
Załožba ma nowe směrnicy
Budyšin. Załožba za serbski lud je wčera nowej směrnicy a wotpowědnej koncepciji na swojej internetnej stronje wozjewiła, kiž wot dźensnišeho płaća. W něhdźe tři lěta trajacym procesu je zarjad postajenja spěchowanja we wuměnje z wěcywustojnymi fachowcami kaž tež z přisłušnymi ministerstwami předźěłał. Prašenja nastupajo směrnicy sobudźěłaćerjo zarjada załožby rady wotmołwjeja a tež nadrobniše informacije zajimcy tam dóstanu.
Dźěła běža po planje
Ralbicy-Róžant. Twarske dźěła za nowy hort w Ralbicach su w ramiku financneho plana. Tole zdźěli na naprašowanje wjesnjanosta delanskeje gmejny, Hubertus Ryćer (njestronjan). Kónc přichodneho tydźenja ma třěcha dospołnje zakryta być, tež wokna maja so hišće tutón měsac zatwarić. Planowane je, nowy hort za něhdźe 1,8 milionow eurow klětu hač do lěćnych prózdnin dotwarić.
W serbskich institucijach wuknyć
Wo dowolu w Aziji přednošował
Hodowne wiki traja prěni raz štyri tydźenje
Wojerecy (KD/SN). Štož staj Wojerowski měšćanosta Měrko Pink a hermankar Joe Probst z Jessena hižo dlěje planowałoj, nětko skónčnje zwoprawdźa. Na Łužiskim naměsće změja prěni raz wot 23. nowembra hač do 21. decembra wulke a wosebje bajkojte hodowne wiki. Wobydlerjo a hosćo móža wšědnje wjace hač 30 zabawow wužiwać a najwšelakoriše budki wopytać. Přistupne budu wiki wšědnje wot 11.30 hač do 20.30 hodź, pjatk a sobotu wot 11 do 21.30 hodź. Zastup nichtó płaćić njetrjeba. Při woběmaj zachodomaj na z płotom wobdaty teren witaja rumpodichojo wopytowarjow, je Joe Probst tele dny nowinarjam rozłožił.
Tak planuja šlagrowu party, klankodźiwadło, wjacore wohnjostroje kaž tež laserowu show. Jedna z atrakcijow budźe lodowa čara. Jón smědźa pěstowarske skupiny a šulske rjadownje wot póndźele hač do štwórtka někotre hodźiny darmotnje wužiwać. Za to pak dyrbja so přizjewić.
Wotewru wustajeńcu
Budyšin. „Wuměłstwo k zběranju a darowanju“ rěka nowa wustajeńca, kotruž wustaja wot 6. nowembra w galeriji Budyskeho wuměłskeho zwjazka na Hrodowskej 19. Na wotewrjenje w 19 hodź. su zajimcy wutrobnje witani. Wo hudźbne wobrubjenje postara so Uta Šwejdźic. Serbska spěwytwórča spěwa a hraje swójske kompozicije a ludowe pěsnje. Dale porěči Tanja Böhme. W přehladce zastupjeni budu mjez druhim Iris Brankačkowa, Isa Bryccyna, Maja Nagelowa a Borbora Wisnarjec.
Silwester w kubłanišću
Smochćicy. Kubłanišćo swjateho Bena w Smochćicach přeprošuje 31. decembra na silwesterski swjedźeń do tamnišeje bróžnje. W zabawnej atmosferje móža so hosćo ze starym lětom rozžohnować a nowe witać. Zastup płaći 69 eurow a za hosći, kiž přenocuja, 59 eurow. W płaćiznje zapřijate su napoj na spočatku, rustikalna wječer, nócny zakusk a škleńca sekta w połnocy. Přizjewjenja a skazanki za stwy přijimuja hač do 15. nowembra.
Čita wo Israelu
