Nowe nahłowniki a tepjenje za wohnjowych wobornikow

Róžant (JK/SN). Hižo na swojim posedźenju w oktobrje je delanska gmejnska rada wo tym wuradźowała, kak móže swojich wohnjowych wobornikow podpěrać. Woni trjebaja nowe nahłowniki, cyłkownje 45. Gmejna pak lětsa žane spěchowanje wot Budyskeho krajnoradneho zarjada za tajke naprawy njedóstanje. Tak ma komuna kóšty za to we wobjimje 18 000 eurow sama njesć. Po wuradźowanju nawodow wjesnych woborow je so wjednistwo gmejnskeje wobory rozsudźiło, najprjedy raz jenož 25 nahłownikow skazać. Dokelž pak po dochadźacych poskitkach hišće pjenjezy zbywachu, powyšichu mnóstwo na 33 nahłownikow. Tute maja w prěnim rjedźe wobornicy wužiwać, kotřiž dychanski nastroj noša a kiž su prěni, kotřiž při wohenju pomhaja. Wudawki je gmejna na tři losy rozdźěliła a tak nimale cyłu zaplanowanu sumu pjenjez wudała.

Budyšin. Zwjazk serbskich wuměłcow wuhotuje jutře, štwórtk, swoju lětušu ­adwentničku a zdobom swoju hłownu zhromadźiznu w Budyskej Röhrscheidtowej bašće. Přeprošeni su čłonki a čłonojo runje tak kaž přećeljo, podpěraćeljo a zajimcy zwonka towarstwa. Kulturne přinoški posrědkuja wot 16.30 hodź. mjez druhim literatka Lenka, hudźbnik Syman Hejduška a tworjacy wuměłc Thomas Schwarz.

Zymske chłóšćenki a wokable

Radwor. Syć za serbsku rěč a regionalnu identitu ZARI přeproša jutře, štwórtk, ­na kreatiwny kurs „Serbska kuchnja za swójby – zymske recepty z jabłukom“. Při přihotowanju a woptanju chłóšćenkow změja wobdźělnicy składnosć, nowe wokable nawuknyć a hnydom nałožować. Zarjadowanje započnje so w 16 hodź., popłatk wučinja 5 eurow na wosobu. ­Za­jimcy njech přizjewja so z mejlku na ­ raphaela­.

Předstaja komediju z Grodka

Hamor (AK/SN). Za 45 000 eurow předa Hamorska gmejna 1 500 kwadratnych metrow wulku ležownosć při Delnjo­wujězdźanskim pobrjohu Bjerwałdskeho jězora lěsnistwowemu zawodej Eichhorst z Rózborka. To su gmejnscy radźićeljo na swojim zašłym posedźenju wobzamknyli. Hižo wjele lět wobhospodarja lěsnistwowe předewzaće safarijowy dźiwiznowy rewěr při jězoru. Tam móža ­zajimcy wšelake dźiwje zwěrjata zbliska wobkedźbować. Nětko chcedźa swój turistiski poskitk rozšěrić. Nastać ma nowa dźiwiznowa stacija za wólnočasnu za­běru a z nakupowanskimi móžnosćemi. W zašłosći su hižo tři dowolowe domčki natwarili. Bórze chce Rózborske přede­wzaće gmejnskim radźićelam swój cyłkowny projekt předstajić. Potrjechena ­ležownosć je mjeztym wuměrjena. Za dalšu ležownosć, kotruž chce gmejna tohorunja předać, so dotal kmany kupc ­namakał njeje. Nětko płoninu znowa wupisaja.

Budyšin. Na wšěch štyrjoch adwentnych njedźelach poskićuje Tachantska wosada swj. Pětra w Budyšinje stajnje w 15 hodź. „Pišćelowu hudźbu k non“, to rěka (hudźbne) modlenje popołdnju w třoch. Lětuše ćežišćo je hudźba serbskich komponistow, kotruž su serbscy organisća podali. Minjenu prěnju adwentnu njedźelu je młody ewangelski Serb Johannes Kral nowy hudźbny rjad zahajił. Z Hodźijskeje wosady pochadźacy je so spěšnje elitarnemu kruhej najlěpšich dorostowych organistow přidružił. W programowym łopjenje rěka, zo je wón mjez druhim hižo w Pětrowej cyrkwi w Romje kaž tež na Silbermannowych pišćelach w Drježdźanskej katedrali hrał. W swojim ródnym měsće zahra w tachantskej cyrkwi swj. Pětra nětko tohorunja na Kohlowym instrumenće, po tym zo bě to wo­spjet na wulkich Eulowych byrglach zady w ewangelskim dźělu cyrkwje činił.