Woswjeća jubilej kluba
Wulka show lětanja
Budyšin. 22. lětarske dny wotměja so wot 7. hač do 9. awgusta 2026 na Lětońskim lětanišću njedaloko Budyšina. To budźe najwjetša lětarska show Sakskeje z historiskimi lětadłami, wuměłskim lětanjom a wulkim programom, zarjadowar připowědźi. Zarjadowanje započnje so pjatk w 12 hodź., hdyž wobdźělene lětadła přileća. Runočasnje wotewru antikne a čaporowe wiki. Sobotu a njedźelu dožiwja wopytowarjo stajnje wot 8 hodź. pokazki pilotow a móža sej wustajeńcu modelowych lětadłow wobhladać. Zajimcy smědźa so na kołolěty wjeselić. Nimo toho poskića jězdźenje z tankami a zabawu za dźěći.
Wječor mjetele wobkedźbować
Na Hanza Njepilu spominali
Rowno (JoS/SN). Před 260 lětami, 1. awgusta 1766, je so serbski ludowy spisaćel Hanzo Njepila narodźił. Składnostnje tohole jubileja je spěchowanske towarstwo Rownjanskeho Njepilic statoka swojich čłonow póndźelu na mału swjatočnosć přeprosyło. W Slepjanskej serbšćinje Manfred Hermaš skutkowanje Hanza Njepile hódnoćeše. Mjez druhim wón rjekny: „Luby Hanzo, štož Slepjansku serbšćinu nastupa, smy wšitcy twoji potomnicy.“ Z tym Hermaš zwurazni, zo su dźakowano mnohim prócowanjam dźensa narěč w zjawnosći wozrodźili. Dale so wón na to dopominaše, zo běchu něhdy najradšo wšitko zničić chcyli, štož bě Njepila napisał. Dźakowano fararjej Wjelanej so dźěl pisomneho zawostajenstwa wuchowa a bu pozdźišo wozjewjeny.
Rownjenjo njejsu na zawostajenstwo Hanza Njepile zabyli. Woni zachowuja dom, kotryž bě wón před 220 lětami natwarił, a ležownosć kołowokoło njeho. To samsne płaći za nałožki, ratarske dźěło a narodnu drastu.
Bjezposrědnje při Ralbičanskej zakładnej šuli nastawa nowy hort. ...
Narodniny Carla Blechena woswjećili
Prózdninske wjeselo w LND
Wjac digitalnych poskitkow
Budyšin (SN/MiR). Rěčny centrum WITAJ (RCW) je za bližace so šulske lěto 2026/2027 znowa wulku ličbu wučbnicow a wuknjenskeho materiala spřihotował, kotrež Ludowe nakładnistwo Domowina (LND) wudawa. „W cyłku je jich lětsa 29 titulow w hornjo- abo delnjoserbskej rěči“, wotrjadnica wotrjada RCW za wuwiwanje rěče a pedagogiku Annett Dźědźikowa rozprawja.
Krótkopowěsće (05.08.26)
Milina wupadnyła
Dźensa rano krótko po wosmich běchu wjacore wsy zarjadniskeho zwjazka Při Klóšterskej wodźe nachwilnje bjez miliny. Po informacijach SachsenEnergie traješe wupad jenož dźesać mjeńšinow. Dohromady bě wjace hač 2000 domjacnosćow potrjechenych. Přičina běše zmylk w přepinarni (Umspannwerk) w Kamjencu.
Nowy wobsedźer fabriki
Hnašecy. Čěske předewzaće Czechoslovak Group (CSG) je w Hnašecach fabriku za rozbuchliny wot firmy Maxam přewzało. CSG chce tam spočatnje nitroglycerin produkować, perspektiwisce tež municiju. Za to inwestuja sto milionow eurow a zarjaduja něhdźe 125 dźěłowych městnow. CSG je čěski brónjenski koncern ze sydłom w Praze.
Bórze kmańša mobilna syć
Njebjelčicy. Po dźewjeć lětach je Telekom w Njebjelčicach městnosć našła, hdźež hodźi so antena za mobilnu telefonowu syć nastajić. Kaž Telekom zdźěli, chcedźa na ležownosći kormjernje rancow techniku za 4G a 5G instalować. Z tym ma so špatna syć w Njebjelčicach a wokolinje polěpšić. Hdy so twar zahaji, njeje hišće jasne. Aktualnje so wo wšitke dowolnosće prócuja.
Hudźba wopytowarjow do přirody wjedła
Budyšin (SC/SN). Cyle w znamjenju lěsneho róžka steješe njedźelu wječor w Budyskej cyrkwi swjateho Pětra koncert w rjedźe „Duchowna hudźba“. K tomu přeprosył je kwartet lěsnych róžkow „Hornvi(e)rus“. Hudźbnikow zesylniła je skupina na hońtwjerskich róžkach „Lausitzer Hörnergroß“. Bě to njewšědne hudźbne dožiwjenje, kotrež mnohich připosłucharjow do simultaneho Božeho domu wabješe. Zastup bě darmotny. Katolski dźěl, hdźež koncertowachu, kaž tež ewangelski dźěl běštej połnje wobsadźenej.
Zanjesena hudźba wjedźeše wopytowarjow do přirody, a to na instrumentach, na kotrychž so lochko njehraje. Nimo tradicionalneje hońtwjerskeje hudźby zaklinčachu ludowe pěsnje runje tak kaž klasiske kruchi, mjez druhim Felixa Mendelssohna-Bartholdyja. Spokojne wobliča publikuma po koncerće swědčachu wo tym, zo je hudźba ludźom dušu zhrěła.
Kórki wot nowych rostlinow
Nowe kórkowe rostliny su tele dny w Hamorskim zahrodnistwje Frederika Ringa (na wobrazu) zwosadźeli. Přiběraceho mnóstwa škódnikow dla běchu stare rostliny jenož hišće mało płodow njesli. Z nowych budu přichodne dny prěnje kórki žnjeć móc, kotrež potom zaso w hornjołužiskich předawanišćach poskićuja.
Foto: Joachim Rjela
