Při statnej dróze S 100 w Zejicach přihotuja wot tohole tydźenja ...
Krótkopowěsće (30.09.26)
Ćahi wandalow dla njejěli
Budyšin. Wandalizma dla njejsu mjez Biskopicami a Zhorjelcom zawčerawšim ćahi jěli. Njeznaći su při Budyskej wuhibkarni na wjacorych městnach kable přerěznyli. Tuž njebě železniski wobchad hižo móžny, rěčnica Němskeje železnicy wčera popołdnju zdźěli. Předewzaće Trilex je nuzowy wobchad z busami zarjadowało. To je druhi pad wandalizma na železniskich čarach w běhu dweju tydźenjow.
Serbšćina na zjězdźe slawistiki
Jena. Friedricha Schillerowa uniwersita Jena je wot dźensnišeho do 3. oktobra z hosćićelku 15. němskeho dnja slawistiki. Mjez wobdźělnikami centralneho zjězda němskorěčneje slawistiki, kotryž so kóžde tři do štyri lěta wotměwa, je tež Serbski institut. Nimo třoch přednoškow wuhotuje pod napismom „Niedersobisch im Aufbruch: Chancen und Perspektiven für die Zukunft“ prěni raz swójski sociolinguistiski seminar.
Wětrnik nimale dotwarjeny
Na lětuše jubileje dopominali
Šćěpjenje (2): Jenički raz njedosaha
Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (12)
(Pokročowanje ze 17. awgusta 2026)
Dalše doporučene šćěpjenje za seniorow je přećiwo pasowej róži (Gürtelrose). Wowče jětra a pasowu róžu zawinuje identiski rozbudźak, tak mjenowany Varizella-zosterowy wirus. Prěnja infekcija wjedźe k wowčim jětram, zwjetša w dźěćacej starobje. Wirus wostanje po tym čas žiwjenja w ćěle a móže so přez słaby imunitny system jako pasowa róža reaktiwizować. Šćěpjenje, na přikład Shingrix®, zamóže pola seniorow častosć wudyrjenja herpesa zostera jasnje redukować a tak zdobom strašnym postherpetiskim čuwowym bolosćam zadźěwać.
Wuměłča w srjedźišću
Budyšin. „Za špihelom woprawdźitosće“ je hesło wječora z hudźbu, baletom, přednoškom, čitanjom a rozmołwu štwórtk, 1. oktobra, w 19.30 hodź. na žurli SLA w Budyšinje. W srjedźišću steji serbsko-pólska molerka, grafikarka a ilustratorka Božena Nawka-Kunysz a jeje wuměłske skutkowanje. Zarjadowanje rysuje jeje žiwjenski puć wot dźěćatstwa w Hornjej Łužicy přez studij w Pólskej hač k jeje skutkowanju jako mjezynarodnje připóznata wuměłča.
Radźićeljo wuradźuja
Nowa Wjeska. Přichodne posedźenje Worklečanskeje gmejnskeje rady wotměje so štwórtk, 1. oktobra, w 19 hodź. w towarstwowym domje w Nowej Wjesce. Hłownje póńdźe wo aktualny staw twarskich dźěłow na Worklečanskej wyšej šuli a wo přepodaće dalšich nadawkow, mjenujcy za kładźenje kachlicow a twar solarneje připrawy.
Čiłe žiwjenje na statokach
W Brětni syły ludźi wotewrjene dwory wobydlerjow wopytali
Brětnja (SN/MWj). Na dworowym swjedźenju w Brětni pola Wojerec je so sobotu 13 statokow wobdźěliło a syły wopytowarjow přiwabiło. Na dworach dožiwichu pisane wjesne žiwjenje z pokazkami ratarskeho dźěła, demonstracijemi wohnjowych wobornikow, kulturnymi poskićenjemi, starym rjemjesłom, wustajeńcu ratarskeho gratu a mnohostronskimi kulinariskimi słódnosćemi. Wobydlerjo a čłonojo wjesnych towarstwow su statoki z wjele lubosću wupyšili.
Na jednotliwych statokach su wopytowarjo mjez druhim widźeli, kak so drjewjane hrabje zhotowja, kak kowarjej železo wobdźěłataj a kak z wowčeje wołmy drasta nastanje. Nimo kofeja a tykanca poskićowachu chrěn z howjazym mjasom, plincy, sušenu rybu, twaroh z lanym wolijom, pjelnjenje a wjele dalšeje słódneje jědźe. Wopytowarjo wobdźiwachu, kak rjenje su sej wjesnjenjo bywše hródźe abo konjency wutwarili, w kotrychž ludźi pohosćichu.
Domowinska skupina z jubilejom
Wochozy (AK/SN). Na 80 lět skutkowanja wjesneje Domowinskeje skupiny su sobotu we Wochozach zhladowali. Z předsydku Ingu Nowakowej čłonojo, bywši čłonojo a dalši zajimcy tónle jubilej woswjećichu. Wo hudźbne wobrubjenje postara so dujerska kapała Horjany.
„Někotři starši ludźo hišće serbsce rozumja“, Inga Nowakowa powěda. „Na našich zarjadowanjach hosći serbsce witamy. Tež serbske ludowe pěsnje rady spěwamy.“ Wot lěta 1976 je wona předsydka. Tehdy je skupinje 35 čłonow přisłušało. Dźensa je jich 13. „Dorost nam jara pobrachuje“, 86lětna praji. Jedyn z wjerškow zašłych lětdźesatkow bě čitanje z Jurjom Brězanom w lěće 1997. Na wšěch wosom razow je Alfons Frencl we Wochozach přednošował. Dohromady trójce su něhdy serbsku kermušu z kapału Horjany organizowali a stajnje něhdźe 90 hosći witali. Dźensa wobmjezuje so skupinske dźěło na sobustawsku zhromadźiznu, na přednošk a na adwentničku.
Wohnjowa wobora w Radworju je loni nowe jězdźidło dóstała. Tole ...
Popojčan wospjet superkral
Krótkopowěsće (29.09.26)
Znowa haćenja na kolijach
Budyšin. Mjez Zhorjelcom a Biskopicami njejsu wčera nachwilnje ćahi předewzaća Trilex jězdźili. Přičina běše techniski defekt w zwisku ze signalemi. Sobujěducy dyrbjachu z tym ličić, zo so ćahi zapozdźa abo docyła njejědu. Hakle wječor wšitko zaso po planje fungowaše. Hižo před dwěmaj tydźenjomaj dyrbjachu sobujěducy na čarje Trilexa mjez Habrachćicami a Žitawu sćerpni być, dokelž běchu njeznaći koporowe kable pokradnyli.
Studentow z chlěbom a selu witali
Choćebuz. Na Braniborskej Techniskej uniwersiće Choćebuz-Zły Komorow su zamołwići wčera wjace hač 2 000 nowych studentow po serbskej tradiciji z chlěbom a selu do města witali. Z nowym lětnikom zwyši so ličba studentow na 7 700. Něhdźe połojca z nich pochadźa z wukraja.
Berthold naslěduje Handrika
