Nowotwar NSLDź před 50 lětami w srjedźišću literarneho dopołdnja

Budyšin (CS/SN). Wo nastaću noweho dźiwadła na Budyskej Seminarskej so wjele legendow powěda. Mjeztym je tomu 50 lět, zo w twarjenju dźiwadło hraja. We wobłuku zarjadowanja „Literatura dopołdnja“ su minjenu njedźelu podawki wokoło wottorhanja stareho domu na Žitnych wikach a natwara noweho domu hišće raz wobswětlili. Šefdramaturgowka Eveline Günther citowaše wotpowědne wurězki z lěta 2013 wušłeje knihi Michała Lorenca wo stawiznach dźiwadła a dźiwadźelnik Marian Bulank pohnuwaše publikum ze žiwjenskimi dopomnjenkami Jana Kindermanna k smějkotanju.