Ponowjenje rěčneje zawěry w Kwětanecach (Quizdorf) je so minjenu wutoru oficialnje zahajiło. Hač do kónca lěta 2028 chcedźa zamołwići připrawu za něhdźe 20 milionow eurow wobšěrnje saněrować. Za to dyrbja wodu dospołnje ze spjateho jězora wotpušćić.

Kwětanecy (SN). Po wjace hač 50 lětach trajneho wobhospodarjenja dyrbi so Kwětanečanski spjaty jězor nuznje ponowić. Za to je dospołne wotpušćenje wody trěbne. Suchoty minjenych měsacow dla je jězor­ tuchwilu jenož hač do połojcy pjel­njeny. Něhdźe 7,2 milionaj kubiknych metrow wody ma hišće pod dohladom do Čorneho Šepca wotběžeć. Wułójenje rybow w rěčnej zawěrje ma hač do nalěća 2027 zakónčene być. W lětomaj 2029/ 2030 chcedźa zamołwići w jězorje nowe ryby wusadźić. Tute postupowanje je z wotpowědnymi zarjadami za wodarstwo, wobswět a rybarstwo a z rybarskimi zawodami wothłosowane a přizwolene.

Při saněrowanju so wažne dźěle techniskeho wuhotowanja jězora wutwarja a wobnowja, k čemuž słušeja zepěranske murje, žłobiny a powody.

Pjeć milionow na dobro kultury

Halle nad Solawu. Program LOKAL spěchuje angažement za wuměłstwo a kulturu w gmejnach a městach z maksimalnje 90 000 wobydlerjemi. Wčera su dalšich 21 projektow wozjewili, kotrež přichodne štyri lěta z cyłkownje něhdźe pjeć milionami eurow podpěruja. Pje­njezy přewostaja mjez druhim kulturnym towarstwam w Nosynje (Nossen), Přiborju (Fürstenwalde) a Krummhörnje-Greetsielu kaž tež měšćanskej bibliotece w Lyksborgu (Glücksburg).

Zaswěća najwjetšu hwězdu swěta

Ochranow. Šěsć metrow wulka a poł tony ćežka hwězda ma so jutře wječor we 18.30 hodź. prěni raz w Ochranowje zaswěćić. Z tym budźe wona po cyłym swěće je­nička tuteje wulkosće a wahi. Hwězda je z pianom manufaktury Awgusta Förstera zwjazana a měnja wotpowědujo klawěrnej hudźbje swoju barbu. Wona ma ćěmne nazymske popołdnja wuswětleć.

Rejowanje jako lěkarstwo

Inwestowane pjenjezy zhubiła

Mužakow. Swoje pjenjezy je žona w Mužakowje inwestować chcyła, při tym pak wjace hač 2 000 eurow zhubi. Kaž policija informuje, bě 59lětna w awgusće na poskitk w Facebooku reagowała, kiž lubješe jej wjele dobytka z krypto-měnu. Naj­prjedy přepokaza wona něhdźe 2000 eurow.­ Te drje zaso wróćo dósta, runočasnje pak tež list, w kotrymž jej banka zdźěli, zo je kreditne zrěčenje wotzamknyła. Pozdźišo bu znowa 2 000 eurow wot jeje konta wotzběhnjenych. Cyłkownje nasta žonje 2 300 eurow škody. Policija tohodla znowa warnuje, zo měli ludźo při inwesticiskich poskitkach z wulkim dobytkom kedźbliwi być a je dokładnje pruwować.

Na B 96 mjez Rakecami a Kamjenej wobšěrne twarnišćo předwidźane

Rakecy (UM/SN). Na zwjazkowej dróze B 96 přihotuja dalšu wulku twarsku naprawu, mjenujcy wobšěrny wutwar dróhi mjez Rakecami a wjesnym dźělom Kamjenej.­ Něhdźe 1 350 metrow dołhi wotrězk njewotpowěduje hižo přiběra­cemu nadróžnemu wobchadej zašłych lět, posudźuje Krajny zarjad za dróho­twar a wobchad (Lasuv). Tuchwilny staw wutwara je njedosahacy, rěka w planowanskich podłožkach. Hłowna přičina toho je njedosahaca šěrokosć, kotraž wučinja jenož něšto wjace hač šěsć metrow. Dale su w asfalće wujězdźene městna. Tež kromy puća njejsu šěroke dosć, zdźěla tam scyła njewobsteja. Nimo toho steja­ štomy bjezposrědnje pódla jězdnje. Staw kolesowanskeje šćežki je tohorunja špatny. Tam je asfalt zdźěla rozpu­kany abo je so korjenjow štomow dla zběhnył.