Podawki wokoło Šołćic kapałki blisko Ralbic zjawnosći přistupne

Šunow (SN/MWj). Štóž je z kolesom abo pěši po delanskich wsach po puću, je zawěsće raz při Šołćic kapałce mjez Ralbicami a Róžantom pobył. Wona steji na městnje, hdźež je so lěta 1851 tragiske njezbožo stało. W zešiwku, kotryž je Alfons Ryćer zestajił a wudał, móžeš so nětko dokładnje wo tym wobhonić.

Započało je so wšo spočatk 1990tych lět, jako bě Šunowčan wjesnjanosta tehdyšeje Ralbičanskeje gmejny. „Jako gmejna smy w tym času někotre nabožne pomniki na markantnych městnach ponowili, wo kotrež so hižo nichtó starał njeje. Zo to smy hač do sto procentow spěchowanja dóstali. Jedyn z objektow bě Šołćic kapałka pola Ralbic“, so Alfons Ryćer dopomina. W tym zwisku je wón w archiwach za pozadkami slědźił, čehodla bu kapałka natwarjena. 1992 je gmejna kapałku ponowić dała a w njej taflu z krótkimi informacijemi připrawiła.