Po přećahu chcedźa swjećić (12)

Mittwoch, 25. September 2019 geschrieben von:

Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W serialu Serbskich Nowin je předstajamy.

Swjedźeń serbskeje rěče na Slepjanskej Zakładnej šuli „Dr. Marja Grólmusec“ je kóžde druhe lěto wosebity šulski wjeršk. Regionalna rěčnica župy „Jakub Lorenc-Zalěski“ za Slepo Diana Maticowa je projekt z wuspěchom za wubědźowanje „Čiń sobu!“ přizjewiła. „Smy jara dźakowni, zo smy spěchowanje dóstali“, měni nawodnica šule Petra Rübesamowa. Dotal hišće jasne njeje, hdy swjedźeń serbskeje rěče přewjedu. „Chcemy jón woswjećić, po tym zo smy do noweho šulskeho centruma přećahnyli. Konkretny termin za přećah pak hišće nimamy.“ Klětu budźe tomu 20 lět, zo šula po koncepće 2plus dźěła. Swjedźeń je tuž zdobom tež jubilejej wěnowany. Wot šulskeho lěta 2001/2002 hač do dźensnišeho je ličba serbšćinu wuknjacych chětro přiběrała. Započeli běchu tehdy wosmjo. Dźensa 89 šulerjow serbšćinu wuknje, w prěnim lětniku samo wšitcy.

Serbske temy dale wobkedźbować

Mittwoch, 25. September 2019 geschrieben von:

Wojerecy maja dale přiradu za serbske naležnosće. K tomu bě so měšćanska rada na swojim wčerawšim zjawnym posedźenju jednohłósnje wuznała. Zestawa­ płaći nětko hač do lěta 2024.

Wojerecy (AK/SN). Přiradźe za serbske naležnosće města Wojercy přisłušeja měšćanscy radźićeljo Marcel Fröschl (AfD), Dirk Nasdala (Swobodni wolerjo město přichod), Jan Kregelin (SPD) a dr. Christoph Wowtscherk (CDU). Za wěcywustojnych powołani wobydlerjo su Karl-Heinz Schütze, Brigita Šramina, Evelin Grofina, Birgit Sarodnikowa a Gabriela Korchowa čłonojo přirady. Hdy so gremij konstituuje, hišće jasne njeje

Wojerecy nastaja za klětu znowa wobydlerski etat. Za njón je měšćanska rada wčera zestawu dawkoweje skupiny tohorunja jednohłósnje wobzamknyła. K njej słušeja třo přistajeni města, šěsć měšćanskich radźićelow a šěsć powołanych wobydlerjow. Hižo na swojim konstituowacym posedźenju 27. awgusta su měšćanscy radźićeljo wobzamknyli, z wobydlerskim etatom pokročować. Tak su wyšeho měšćanostu Stefana Skoru (CDU) społnomócnili, wšitke trěbne naprawy a prawniske kroki přewjesć.

Na teritoriju biosferoweho rezerwata Hornjołužiska hola a haty je minjenu sobotu wjac hač 20 dobrowólnych pomocnikow w Dubjanskim (Dauban) lěsu pola Dołheje Boršće (Förstgen) pod hesłom „Čista biosfera“ njerjad zběrało. Na něhdźe dźesać hektarach su nimo plastowych titow a blešow tež wjetše smjeće kaž awtowe wobruče, dźěćace sydła, stare horncy a samo wjacore začinjene bleše sekta kaž tež gumijowu kačku namakali. W běhu jeno třoch hodźin su dobrowólnicy tři kubikne metry wulki kontejner z namakanym njerjadom napjelnili. K akciji namołwjeli běchu biosferowy rezerwat, Němska zwjazkowa załožba za wobswět­ (DBU) a gmejna Mikow (Mücka). Foto: Statny zawod Sakski lěs/Susanne Bärisch

Dołh wobstajnje pomjeńšeli

Mittwoch, 25. September 2019 geschrieben von:

Kulowski měšćanosta pozitiwny facit k aktualnemu połoženju sćahnył

Kulow (AK/SN). Město Kulow je w prěnim połlěće 2019 swědomiće a z wulkej disciplinu hospodariło. Wobstajnje móžeše tak dołh pomjeńšeć. „W etaće zwěsćamy tuž porjadny wuslědk, kotryž je jasnje lěpši, hač bě w planje předwidźane“, podšmórny měšćanosta Markus Posch (CDU) na minjenym posedźenju měšćanskeje rady spočatk měsaca.

W Libonju kónc tydźenja swjećili

Mittwoch, 25. September 2019 geschrieben von:
Składnosć, sej Liboń po předani cyłeje wsy raz trochu dokładnišo wobhladać, mějachu zajimcy minjenu njedźelu. To swjećachu tam mjenujcy 1. kulturny dworowy swjedźeń. Nimo zaběry za małych a wulkich, słódnosćow z grilowanja, kofeja a tykanca poskićachu hosćom tohorunja drohoćinki z rjemjeslniskeho wuměłstwa. Wo dobru naladu starachu so mjez druhim hudźbnicy skupin kaž Mckinley Black, Heart of Blues abo DJ Cramér. Tež dowułójenje rybow z tamnišeho hata móžachu sej wopytowarjo wobhladać. Hižo minjeny pjatk běchu tam tójšto rybow wułójili a je kurili. Wosebje słódne běchu liny, kaž Budyšan Olaf Haase zwěsći (naprawo). Foto: Feliks Haza

Krótkopowěsće (25.09.19)

Mittwoch, 25. September 2019 geschrieben von:

Tilich w nowym zastojnstwje

Lipsk/Zeitz. Bywši sakski ministerski prezident Stanisław Tilich ma nowy nadawk. Wón steji wotnětka na čole dohladowanskeje rady Srjedźoněmskeje brunicoweje towaršnosće MIBRAG ze sydłom w saksko-anhaltskim Zeitzu. Kaž přede­wzaće zdźěli, je dohladowanska rada wčera w Lipsku na swojim posedźenju tomu přihłosowała, zo naslěduje Tilich jako předsyda gremija wjelelětneho mějićela zastojnstwa dr. Wilhelma Beermanna.

Sakska pyta wučerjow

Drježdźany. Wukubłani wučerjo, kotřiž chcyli wot 1. februara 2020 na šulach Sakskeje skutkować, móža so wotnětka přizjewić a maja wuhlad na njewobmjezowane přistajenje. Tež požadanje jako přidružnik je móžne. Wosebje wulki zajim ma kultusowe ministerstwo na zajimcach, kotřiž chcyli zwonka wulkoměstow Lipska a Drježdźan dźěłać. Doba požadanja skónči so 3. nowembra.

Drježdźanske ateljeje wustajeja

Policija (25.09.19)

Mittwoch, 25. September 2019 geschrieben von:

Ćežke wobchadne njezbožo

Haselbachtal. Na wokrjesnej dróze mjez Häslichom a Neukirchom, w Haselbachtalu, je póndźelu nawječor wodźer Opela Mokka w prawej křiwicy kontrolu nad wodźidłom zhubił a do štoma zrazył. 63lětny šofer bu w awće zatłusnjeny. Kameradojo dobrowólnych wohnjowych woborow z Häslicha, Neukircha a Sepic su sanitetetarjam a policistam pomhali ćežko zranjeneho wuchować, kotrehož z helikopterom do kliniki dowjezechu. Při njezbožu nastata wěcna škoda wučinja něhdźe na 25 000 eurow.

Čakaceho přebił

Wojerecy. Při Wojerowskim busowym zastanišću, na Łužiskim naměsće, je 30lětny njeznaty póndźelu popołdnju 35lětneho tam čakaceho přebił a ćeknył. Zawołani wuchowanscy sanitetarjo su so wo zra­njeneho, kiž na zemi ležeše, starali.

Hudźbnicy pytani

Mittwoch, 25. September 2019 geschrieben von:

Budyšin (SN). Kamjentny dom w Budyšinje pyta hudźbnikow a spěwarjow, kotřiž chcyli lětsa w hodownej bigband sobu skutkować. Piskać budźe band tři razy w adwenće na hudźbnym projekće „Swingin’ Santa“. Wšitcy w starobje dźesać do 18 lět, kotřiž rady spěwaja a hudźa, su namołwjeni so wobdźělić. Proby wotměja so w nazymskich prózdninach wot 14. do 20. oktobra wšědnje w Budyskim Kamjentnym domje. Přenocowanje je tohorunja zawěsćene. Štóž ma lóšt sobu činić, njech so pod 03591 / 531 99 72 abo e-mailnje pod . přizjewi.

Změny w chorowni

Kamjenc (SN). W Kamjenskej chorowni maltezow swj. Jana změja bórze wotrjad za geriatriju. To zdźěli nowinska rěčnica chorownje Ines Eifler. „Wotrjad ma na bywšej nutřkownej staciji chorownje nastać. Tak přichod Kamjenskeho lěkowanišća zawěsćamy a stejnišćo zdobom skrućamy“, rěka w medijowej zdźělence. Tuchwilnu staciju za krótkodobne hladanje kónc přichodneho měsaca zawru. Za tajke posłužby móža so zajimcy wot nowembra na wustawy maltezow w Kamjencu, Budyšinje abo Kulowje wobroćić, hdźež hladanje pacientow na wěsty čas poskićeja.

Na Radnej medali města Budyšina tež serbske hesło

Dienstag, 24. September 2019 geschrieben von:

Z radnej medalju nawjazuje Budyšin na staru tradiciju sprjewineho města. Měšćanska rada tworješe z wobzamknjenjom z 31. januara 2018 zakład to, zo móžachu minjenu srjedu, we wobłuku spožčenja čestneho wobydlerstwa Christianej Schrammej, absolwentkomaj Budyskeju gymnazijow prěnjej radnej medali přepodać.

Dobre postupy činili

Dienstag, 24. September 2019 geschrieben von:

Gmejnska rada Ralbicy-Róžant je na swojim zańdźenym posedźenju swoje dobre organizatoriske dźěło bilancowała.

Róžant (JK/SN). Dobre powěsće měješe wjesnjanosta gmejny Ralbicy-Róžant Hubertus Ryćer (CDU) swojim radźićelam na minjenym posedźenju prezentować.

Dypkownje k spočatkej noweho šulskeho lěta móžachu nowy lift we wyšej šuli přepodać. Tak kubłanišćo nětko inkluziskim žadanjam wotpowěduje. Za za­twar dósta gmejna pjenježny dar tysac eurow, kotrež budu wotpowědnje zasadźene.

Anzeige