Intensiwnje serbsce wuknyli
Krótkopowěsće (11.09.26)
Zeibina 70 lět
Bóšicy. Předewzaće Zeibina kumštne maćizny a technika w Bóšicach swjeći tele dny swoje 70lětne wobstaće. Hižo w třećej generaciji swójba předewzaće nawjeduje. Zeibina ma stejnišća w Bóšicach, Pólskej a Słowakskej. Tam zhotowjeja precizne dźěle z kumštnych maćiznow. W Hornjej Łužicy je předewzaće wot lěta 1965 zasydlene.
Wola wosadne předsydstwa
Drježdźany. W sakskich ewangelskich wosadach maja so nowe předsydstwa wolić. Wólby wotměja so 20. septembra, zdźěli zarjad krajneje cyrkwje. W přichodnej legislaturje so ličba předsydstwow jasnje pomjeńši. Přičina je zjednoćenje wosadow. Jich ličba je so wot 549 w lěće 2020 na 272 wosadow a wosadnych zwjazkow w lěće 2026 redukowała.
Přezmjezne lěkowanje zmóžnić
Hdźež je biskop Beno něhdy skutkował
Wosada swjateju Pětra a Pawoła w Hodźiju zhladuje na 950. wobstaće cyrkwje
Ze sympozijom a dwurěčnymi kemšemi chce ewangelsko-lutherska cyrkwinska wosada swjateju Pětra a Pawoła w Hodźiju sobotu a njedźelu, 12. a 13. septembra 950. wobstaće cyrkwje woswjećić. „Chcemy na stawizny dopominać. Zdobom chcemy impulsy za přichod wusyłać. Chcemy našich křesćanow sensibilizować, so sylnišo zasadźować a za čiłu cyrkej wojować, njewotwisnje wot wyšnostnych strukturow. Maja hódnotu swojeje cyrkwje za cyłu wosadu a za towaršnosć spóznać“, podšmórnje sobuorganizator Gerat Krawc, kotryž bě wot lětsa 1978 hač do 2002 w cyrkwinskim předstejićerstwje aktiwny.
Zwotkel je woda něhdy běžała
Budyšin (KD/SN). Lětuši cyłoněmski dźeń wotewrjeneho pomnika steji pod hesłom „NetzWERKE: pomniki a infrastruktura – historiske twarjenja, kotrež nas jimaja a zwjazuja“. W Budyšinje zaběraja so wuhotowarjo tohole podawka njedźelu, 13. septembra, z prašenjom, kak je so woda něhdy do Budyšina dóstała.
Kóždu hodźinu móža sej wopytowarjo z přewodźerjom na wodowu wěžu w zapadnym dźělu mnišeje runiny dóńć. Runočasnje wotměja so wodźenja po terenje bywšeho klóštra. Při tym zhonja wopytowarjo powědki wo rjedźe franciskanskich mnichow, kotřiž su něhdy na dobro měšćanow w dźensa historiskich murjach skutkowali. Dale budźe wobrazowa galerija z akwarelemi Budyskeje wuměłče Elke Burkhardt přistupna. Nowa wodarnja, hrodowa wodowa wěža kaž tež historiske připrawy studnjow wo tym powědaja, kak su swój čas ludźi w měsće z wodu zastarali. Historiske twarjenja swědča wo rjemjeslniskej zamóžnosći, techniskim postupje a widźe komuny do přichoda. Dźeń wotewrjeneho pomnika přeprošuje k tomu, sej znate městnosće z nowymaj wočomaj wotkryć.
Koncert a čitanje
Stróža. Na předwječoru lětušich nazymskich wikow w Stróži wotměje so jutře, pjatk, w 19.30 hodź. w tamnišej starej wowčerni literarno-hudźbny koncert. Axel Thielmann a Marka Cyžowa, potomnikaj serbskeje wučerki a spisowaćelki Marje Kubašec, čitataj w serbskej a němskej rěči z jeje twórbow a rozprawjataj wo wosobinskich dožiwjenjach. Jeju přewodźa jazzowe trio „Sotry wjesela“ z Lipska. Zastup na čitanje a koncert je darmotny.
950 lět cyrkej w Hodźiju
Hodźij. W Hodźijskej cyrkwi wuhotuja sobotu 12. septembra w 13.30 hodź. sympozij a přednoški wo stawiznach a perspektiwje wosady, wo twarskich stawiznach cyrkwje a wuwiću Serbow. Přednošuja dr. Jens Buliš, Trudla Malinkowa, Krystof Rummel a Gerat Krawc. Tomu přizamknje so bjesada w kantoraće. Njedźelu, 13. septembra, woswjeća w 9.30 hodź. w cyrkwi dwurěčne swjedźenske kemše z krajnym biskopom Tobiasom Bilzom. Chóry wosady je sobu wuhotuja. Serbowki ze wšelakich kónčin přińdu w narodnej drasće.
Afriski šlink w šulskim terariju
Wosebje na wsach drje je lědma domjacnosće, w kotrejž njeje domjaceho zwěrjeća. Mjeztym zo so psyk a kóčka poměrnje husto jewitej, su bóle eksotiske zwěrjata skerje rědke. Wo nich a jich plahowarjach na wšelakich městnach Łužicy rozprawjamy w lětnjej seriji Serbskich Nowin. (10 /kónc)
Přihotuja so na zymu
Sokoł Ralbicy/Hórki ponowja swoje twjerde hrajnišćo
Ralbicy (SN/StŠ). Hdźež w zymje koparjo Sokoła trenuja a swoje dypkowe hry přewjeduja, so tuchwilu z wulkimi a ćežkimi twarskimi mašinami jenož tak mjerwi. „Po nimale třiceći lětach bě tute tak mjenowane twjerde hrajnišćo woprawdźe dodźeržane a bě čas, je ponowić a zaso do porjadka stajić“, jednaćel Sokoła Tomaš Langa twarske dźěła wobkedźbujo powěda. Prjedy hač pak su z poprawnymi dźěłami započinać móhli, dyrbjachu so čłonojo towarstwa najprjedy raz sami gratu přimać. „Smy našich ludźi kónc awgusta na zhromadnu akciju prosyli. Na wšěch 60 ludźi bě přišło, tak zo smy w běhu někotrych hodźin na cyłym hrajnišću njerodź wuplěć a płoninu jónu kompletnje překopać móhli“, předsyda towarstwa Dierk Šewc rozprawja.
Šulscy sanitetarjo so wubědźowali
Halle nad Solawu. Na „Olympiadźe wumóžnikow“ su so zašły kónc tydźenja w Halle nad Solawu tež šulscy sanitetarjo z Budyšina wobdźělili. Na krajnym wubědźowanju Johanitow běchu młodźi Budyšenjo dosć wuspěšni.
Mjez wobdźělnikami krajneho wubědźowanja njeběchu jeničce mustwa ze Sakskeje, ale tež ze Saksko-Anhaltskeje a z Durinskeje. Tež šulscy sanitetarjo Budyskeho Serbskeho gymnazija běchu sej tam dojěli, zo bychu so z druhimi cyłkami měrili. Wobdźělnicy mějachu w napodobnjenych, ale realistisce skutkowacych scenerijach dopokazać, što wědźa a zamóža. To běchu na př. wobchadne njezbožo, ćeže z krejnym wobtokom abo zranjenje dla spalenja.
Rozšěrjenje wotpokazali
Radwor (SN/BŠe). Budyski wokrjes chce přirodoškitne pasmo wokoło Łučinskeho hata rozšěrić. W zwisku z naprawu maja so tež ći, kotrychž wona potrjechi, k tomu wuprajić. Wčera su so radźićeljo Radworskeje gmejny z rozšěrjenjom pasma zaběrali a wo tym wotwažowali. Wokrjes ma wotpohlad, tež tamniši Nowy hat a płoniny kołowokoło njeho do pasma zapřijeć. Z rozšěrjenjom pak so wužiwanje płoninow změni. Tak njeje potom hižo bjeze wšeho móžno, puće abo městnosće ponowić. Wšitko ma so ze zamołwitymi přirodoškita wothłosować. Dale njemóža so płoniny hižo za łahodny turizm kaž kolesowanje wužiwać. W naćisku postajenjow krajnoradneho zarjada Budyskeho wokrjesa za přirodoškitne pasmo Łučinskeho hata je w paragrafje 4 dypku 15 mjenujcy podate, zo njeje dowolene, zwonka zjawnych dróhow a pućow z awtami abo e-kolesami jězdźić. Jěchanje abo wodźenje konjow je tam tohorunja zakazane. Dale njeměli ludźo po lěsach a łukach chodźić abo so bjez lajny ze swojim psom wuchodźować. Zdobom je zakazane, taflički abo markěrowanske znački nastajić.
Krótkopowěsće (10.09.26)
Staršiske přinoški zniža
Radwor. Radworska gmejna klětu staršiske přinoški za žłobik, pěstowarnju a hort w swojich kubłanišćach zniži. To je gmejnska rada na swojim wčerawšim posedźenju wobzamknyła. Radźićeljo su sej toho wědomi, zo z tym kóšty za gmejnu stupaja. Přiwšěm je jim wažne, staršich wolóžić a jim signalizować, zo su dźěći w gmejnje witane. Klětu ma so pruwować, kak so tole na etat wuskutkuje.
Prezidij deleguje chór a brigadu
Chrósćicy. Prezidij Domowiny je wčera wobzamknył, chór Budyšin na 30. spěwanje sakskich chórow 12. decembra w Lipšćanskej sukelnicy delegować. 1. serbska kulturna brigada so klětu wot 16. do 20. junija na 30. festiwalu Alta Pusteria w Južnym Tirolu wobdźěli. Přichodne posedźenje zwjazkoweho předsydstwa budźe 25. septembra w Chrósćicach.
Tři filmy z Hornjeje Łužicy online
