Šulerjo 9. lětnika Budyskeho Serbskeho gymnazija su sej tele dny we ...
Krótkopowěsće (12.06.25)
Zhromadny signal za załožbu
Berlin. Ze zjawnym listom zasadźujetaj so ministerskaj prezidentaj Sakskeje a Braniborskeje Michael Kretschmer (CDU) a Dietmar Woidke (SPD) za dosahace financowanje Załožby za serbski lud. List zwjazkowemu kanclerej Friedrichej Merzej podpisataj jutře w Berlinje. Jednanja wo pjatym finančnym zrěčenju tuchwilu dale traja.
Thespis-centrum nachwilnje wěsty
Halle nad Solawu. „LOKAL – program za kulturu a angažement“ je iniciatiwa, z kotrejž spěchuja Kulturna załožba Zwjazka, Zwjazkowa centrala za politiske kubłanje a Europska kulturna załožba kulturnych akterow „předewšěm w mjeńšich městach a wjesnych kónčinach Němskeje“. Mjez prěnimi 13 institucijemi a zjednoćenstwami je Budyski Thespis-centrum w nošerstwje Němsko-Serbskeho ludoweho dźiwadła. Jemu, kaž tež tamnym 12 kandidatam přilubja přichodne štyri lěta stajnje 240 000 eurow.
Čěscy wojacy do Kenije
Nowe hrajkanišćo přepodali
W Domje swjateho Jana rjany nałožk swjećili
Tak kaž wšudźe druhdźe na serbskich wsach su tež w Smječkečanskim Domje swjateho Jana nałožk mejemjetanja pěstowali. Hižo někotre dny do toho pytachu za to poriki. Wone so na zwučowanjach zetkachu, zo bychu zdźěla hižo znate serbske reje skrućili abo tak derje kaž móžno nazwučowali. Skónčnje tak daloko bě a wšitcy wobydlerjo so při najrjeńšim słónčnym wjedrje w parku zetkachu. Swjedźensce zdrasćeni wobydlerjo a sobudźěłaćerjo k „Wjesele dźensa“ zaćahnychu. Znata reja „Takle wjerćimy“ tež přihladowarjow do rejowanja pohnu. Mejskeho krala zwěsćichu w Smječkecach na trochu hinaše wašnje, hač smy to hewak zwučeni. Wobydlerjo wulke kóstki po trawniku mjetachu a najwyša ličba doby. Wočiwidnje zbožowny kral Klaus sej z kralownu Heike walčik zarejowa a po tym cyłu hosćinu na wječer prošeše. Wulki dźak wuprajamy sobudźěłaćerjam, kotřiž z přidatnymi słužbami tajke a podobne zarjadowanja sobu zmóžnjeja. Wězo tež kuchni dźak za dobre pohosćenje!
Policija (11.06.25)
Młodostni z awtom jězdźili
Kulow. Po wšěm zdaću mało Ducha swjateho je skutkowało swjatkowničku mjez někotrymi młodymi ludźimi w Kulowje. Swědkojo tam njedźelu krótko do 20 hodź. policiju informowachu, zo su po zdaću młodostni z VW Touranom po puću. Widźeli njeběchu jich jenož w Kulowje, ale tež w Skaskowje. Zastojnicy lepichu jězdźidło na pólnym puću blisko Koćinskeje dróhi w Kulowje. VW njebě zawěsćeny. Policisća kluč jězdźidła sćazachu a awto zazyglowachu. Přećiwo hólcomaj w starobje 14 a 15 lět kaž tež přećiwo holcy w starobje 13 lět přepytuja nětko jězdźenja bjez jězbneje dowolnosće dla. Dalši delikt je, zo wužiwachu awto, kotrež njebě zawěsćene. Wšěch třoch přepodachu jich staršim.
Předstaja nowu knihu
Pokazaja „Cuzeho ptaka“ z klawěrnym přewodom
Kulow. Wosebity wječor dožiwja zajimcy serbskeho filma pjatk, 13. junija, w 19.30 hodź. w Kulowskim Jakubecowym wustawje. Tam pokazaja němy film „Cuzy ptak“ z lěta 1911. K tomu hraje Paul Bernewitz na křidle. Medijowy wědomostnik a znajer serbskeho filma Daniel Kubik přednošuje na spočatku wo stawiznach serbskeho filma a nastaću filma „Cuzy ptak“. Paul Bernewitz je baletny repetitor w Serbskim ludowym ansamblu a so ze serbskimi němymi filmami a z wotpowědnej klawěrnej interpretaciju rozestaja. W filmje „Cuzy ptak“ jewja so prěnje filmowe wobrazy, kotrež pokazuja žiwjenje, kulturu a wšědny dźeń Serbow.
Lubosćinska tragedija w třoch aktach je so wokoło stareho hosćenca „Wotschofska“ w Błótach ze serbskimi lajskimi dźiwadźelnikami natočiła. Asta Nielsen hraje młodu Jendźelčanku May. Wona a jeje nan dojědźetaj sej z ćahom do Błótow. Tam zalubuje so wona do serbskeho bura a čołmikarja Pawoła. W tragiskej stawiznje so May zesamostatni, emancipuje a so tak k „cuzemu ptakej“ Delnjeje Łužicy wuwije. Błóta njejsu jenož kulisa, ale tež wažne stejnišćo za socialne róle hłownych figurow.
Turizm při jězoru rozšěrja
Łazowska gmejna wupołoži zjawnje plan za nowe twarske naprawy
Łaz (AK/SN). Naćisk twarskeho plana za turistisku kónčinu při Slěbornym jězoru je wjetšina Łazowskeje gmejnskeje rady wčera wobzamknyła a jón nětko zjawne wupołoži. Po słowach Andreje Schlungbaum z gmejnskeho zarjadnistwa wobzamknu proces planowanja hišće lětsa. Klětu chcedźa potom při Slěbornym jězoru z twarom započeć.
Hižo dlěši čas so Łazowska gmejna z twarskimi móžnosćemi při jězoru zaběra. Nětko wobzamknjeny plan wobsahuje campingowanišćo, přibrjóh a sydlišćo bungalowow. Porno tomu njejsu sydlišćo tak mjenowanych kónctydźenskich domčkow při Bjedrichečanskim pobrjohu w planje zapřijeli. Tele sydlišćo chcedźa w jeho charakteru a z jeho typiskim twarskim wašnjom zachować.
Hrodowska wječor bjez awtow?
Budyšin (UM/SN). Hdyž bywaja wječory skónčnje trochu miliše, ćehnje Budyšanow a jich hosći na Hrodowsku hasu. Hdźež nadeńdźeš jedyn hosćenc při druhim, je sčasami tež wjele awtow po puću. Ći jedni pytaja měr a wočerstwjenje, tamni parkowanske městno za swoje jězdźidło. Wšitkim zajimam wotpowědować njeje stajnje jednore.
Měšćanska rada je nětko na namjet frakcije CDU wobzamknyła, „wot meje hač do septembra 2025 časowje a rumnostnje wobmjezowane zawrjenje Hrodowskeje za awtowy wobchad planować a zwoprawdźić“. Kaž w předłoze měšćanskeje rady rěka, njeje tale naprawa jenož na dobro pěškow. Tež gastronomiske zawody na Hrodowskej z wonkownym posłužowanjom z toho profituja. Namjet CDU z toho wuchadźa, zo móhli hosćencarjo dźěle jězdnje bóle hač do toho za swoje poskitki wužiwać, hdyž tam hižo žane awta njejězdźa.
