Róžant (SN/MWj). Za lěto 2024 móže gmejna Ralbicy-Róžant hišće nahladny hospodarski plan nastajić, byrnjež jón jenož ze swojimi likwidnymi srědkami wurunać móhli. Za přichodne lěta budźe to wjele ćešo. „Potom budźemy jenož hišće to najnuzniše zwoprawdźić móc“, praji wjesnjanosta Hubertus Ryćer (njestronjan) na zašłym posedźenju gmejnskeje rady. Do toho bě komornica Franciska Čapikowa najwažniše ličby předstajiła a tohorunja k lutowanju namołwjała.
Mjez dochodami a wudawkami maja deficit 255 000 eurow. Te drje móža ze swójskimi srědkami wurunać. Pjenjezy pak na druhich městnach pobrachuja. Něhdźe 570 000 eurow dyrbi gmejna jako swójski podźěl za wobhospodarjenje Ralbičanskeje pěstowarnje wudać. To je 140 000 wjace hač loni. Na tamnym boku dyrbja lětsa z něhdźe 80 000 eurami mjenje přemysłoweho dawka ličić. Tež zarjadniskemu zwjazkej Při Klóšterskej wodźe dyrbja wjace pjenjez płaćić. Za wotpłaćowanje swojich běžnych kreditow wudadźa 30 000 eurow.
Budyšin (SN/MiP). Hižo loni w awgusće je krajny rada Udo Wićaz (CDU) hromadźe ze zastupjerjemi hospodarstwa kaž tež zarjadnistwa Budyskeho wokrjesa prowincu Changzhi w sewjeru Chiny wopytał, zo by partnerstwo a kooperaciju mjez woběmaj regionomaj pohłubšił. We widejowej konferency lětsa spočatk februara 2024 su so akterojo z turistiskeje branše wobeju stron nastupajo zhromadne dźěło wothłosowałoj.
Berlinala: SJ Chrósćicy w filmje
Berlin. W zwisku z lětušimi europskim mišterstwom w kopańcy su Mnichowscy studenća Wysokeje šule za telewiziju a film „Elf Mal Morgen: Berlinale Meets Fußball“ zhotowili. Zapřijaty do filma je tež krótkofilm wo serbskich koparjach Chróšćanskeje sportoweje jednotki. Film wobhladać móžeće sej srjedu, štwórtk a sobotu, hlejće prošu w interneće program www.berlinale.de.
Zaso w Budyšinje za čłowjeskosć
Budyšin. Z pisanej dujerskej hudźbu přećiwo prawicarskemu ekstremizmej, zhromadnje za čłowjeskosć a demokratiju – pod tutym hesłom chcedźa přichodnu njedźelu, 25. małeho róžka, wot 14 hodź. w Budyšinje demonstrować. Po informaciji rěčnicy „trägerverBUNT Budyšin“, Maren Düsberg, nawjazuja z tym na prěnju manifestaciju 27. wulkeho róžka z 1500 wobdźělnikami.
Přistawnišćo njebudźe
Ličba kurjakow w Němskej je dlěši čas konsekwentnje spadowała. Tuchwilu pak so zdawa, zo so trend zaso měnja. Předewšěm młodźi ludźo sahaja dźeń a husćišo za tobakowymi produktami.
2021 poda 8,7 proc. ludnosće Němskeje mjez 14 a 17 lětami, zo wšědnje kuri. 2022 bě jich 15,9 proc. Procentualny podźěl kurjakow w starobje 18 do 24 lět stupaše wot 36,1 (2021) na 40,8 (2022) proc. Přičiny za to móhli być koronapandemija, wójna w Ukrainje, kriza klimy dla a dalše negatiwne a młodźinu poćežowace zjawy našeho časa. Wězo so tobakowa industrija tež přiběrajcy słodej młodeje generacije přiměrja. Wo tym pozdźišo wjac.
Što je cigareta?
Paducha lepili
Wojerecy. Z pomocu sobudźěłaćerja nakupowanišća móžeše policija we Wojerecach srjedu paducha lepić. Njeznaty muž bě sej w kupnicy na Lipeckim naměsće wjacore twory wzał a chcyše z nimi nimo kasy hić. Jako jeho sobudźěłaćer kupnicy na to narěča, so muž wutorhny a ćekny. Sobudźěłaćer za nim do bydlenskeje štwórće spěchaše. Při jednym z bydlenskich domow muž sobudźěłaćerjej durje před nosom zaprasny, při čimž jeho snadnje zrani. Škodowany na to policiju informowaše. Zastojnicy zwěsćichu w bydlenskim domje 47lětneho muža. Wobydler swój njeskutk přizna a spakosćene twory w hódnoće 30 eurow wróći. Wón změje so nětko podhlada rubježneho padustwa dla zamołwić. Kriminalna słužba Wojerowskeho policajskeho rewěra pad dale přepytuje.
Budyšin. Wot 2. hač do do 24. měrca wotměwaja so na sobotach a njedźelach w Budyskim Serbskim muzeju dźěłarnički debjenja jutrownych jejkow. Tu wobsteji móžnosć bosěrowanje a wóskowanje pod wěcywustojnym nawodom nawuknyć. Dźěłarnički wotměwaja so w dwěmaj skupinomaj po stajnje dwěmaj hodźinomaj, a to wot 13 do 15 hodź. a wot 15 do 17 hodź. Muzej prosy wo zawjazowace přizjewjenje pod telefonowym čisłom 03591/270 87 00 abo e-mailnje pod .
Zhromadnje zawki zhotowja
Njebjelčicy. Kóždu 1. a 3. njedźelu měsaca wuhotuje towarstwo Sowuto w Njebjelčanskim gmejnskim zarjadnistwje kulturnu kofejownju. Zajutřišim, 12. februara, móža tam zajimcy zawk zhotowić a sobu domoj wzać. Nawod změje Petra Münch-Kubale ze Serbskeho muzeja w Drjowku. Započatk budźe w 14.30 hodź. W 17.30 hodź. přizamknje so přednošk Franka Ričela, kiž porěči wo swojim žiwjenju jako profijowy kopar.
Přednošuje wo nałožkach