Cyrkej ma nowe pišćele dóstać
Wobydlerjo hižo wjace hač 142 000 eurow nazběrali
Slepo (AK/SN). Ewangelska cyrkej w Slepom ma bórze nowe pišćele dóstać. Tole wuzběhny kantor a cyrkwinski hudźbnik Björn Sobota w aktualnym wudaću gmejnskeje nowiny Slepjanskeho zarjadniskeho zjednoćenstwa.
Tuchwilne pišćele pochadźeja z lěta 1949. „Jako su tehdy instrument přetwarili, su material za jednotliwe pišćele přewažnje z wobstatka dźěłarnjow pišćeletwarskeje firmy Eule z Budyšina hromadźe zestajili“, kantor rozłoži. „Wjele pišćelow ma špatnu kwalitu. Po wšěm zdaću su wjacore registry z rozdźělnych registrow zestajene. Tomu přidruži so dalši problem: W horcych a suchich lěćach so stajnje zaso drjewjane dźěle tak mjenowaneje wětrownicy (Windlade) torhnu. „Po Druhej swětowej wójnje wužiwane materialije, mjez druhim kumštne maćizny, kaž tež techniske přesadźenje w powójnskim času dźensnišim žadanjam a klimatiskim wuměnjenjam hižo njewotpowěduja“, kantor Sobota zdźěli.
Policija (30.06.26)
Zahrodowej chěžce so paliłoj
Běła Woda. Po njewšědnje horcej nocy su minjenu njedźelu rano wohnjowych wobornikow w Běłej Wodźe k hašenju wołali. W zahrodkownišću při Zhorjelskej dróze so z dotal njeznateje přičiny zahrodowej chěžce paleštej. Wobornicy płomjenja spěšnje podusychu. Do toho bě je 39lětny muž sam hašeć spytał, ale so při tym snadnje zranił. Wěcnu škodu trochuje policija na něhdźe 40 000 eurow. Dróha bě dwě hodźinje zawrjena.
Jurorojo na wopyće w Němcach
Němcy (KD/SN). We wobłuku 28. cyłoněmskeho wubědźowanja „Naša wjes ma přichod“ je jury minjeny pjatk Němcy wopytała. W běhu třoch hodźin prezentowaše něhdźe sto wobydlerjow swoje towarstwa, zarjadnišća a wjacore firmy, kotrež wjesne žiwjenje cyłe lěto sobu wobohaćeja. Hornjołužiska wjes bě so z druhim městnom w sakskim krajnym wubědźowanju za zwjazkowe finale kwalifikowała a so nětko ze swojeje najlěpšeje strony předstaji.
Při wětrniku dźěći Witaj-pěstowarnje „Pumpot“ čłonow jury w serbskej drasće z chlěbom a selu witachu. Program holcow a hólcow znazornješe, zo jim w pěstowarni serbsku rěč a tradicije dale sposrědkuja. Mónika Neubertowa porěča wo dźěle towarstwa seniorow. Jeho čłonojo mjez druhim pomhaja, holcy za ptači kwas abo mejemjetanje serbsku drastu woblěkać. Za tónle nadawk chce Denise Schreiber z młodźinskeho kluba rady tež swójskich čłonow zdobyć. Runje na dnju wopyta jury je Němčanska młodźina tohorunja wječorne wjesne reje wuhotowała. Při tym pomhaše nimo wohnjoweje wobory tež wjesny klub, kaž Daniel Kummer rozprawješe.
Planuja nowu gratownju
Hižo wjele lět přeja sej dobrowólni wohnjowi wobornicy w Chrósćicach lěpše wuměnjenja za swoje čestnohamtske skutkowanje. Nětko so čas čakanja po wšěm zdaću nachila. Na swojim zašłym posedźenju su so gmejnscy radźićeljo znowa z nowej wohnjowobornej gratownju zaběrali.
Chrósćicy (SN/MWj). Mjeztym něhdźe wosom lět zaběra so Chróšćanska gmejnska rada stajnje zaso z prašenjom, kak móhli wohnjowym wobornikam nowu gratownju natwarić. „Je wočiwidne, zo tuchwilna gratownja dźensnišim wuměnjenjam hižo njewotpowěduje“, praji wjesnjanosta Marko Kliman (CDU). Na zašłym posedźenju radźićeljo wobzamknychu, zo ma architekt Marko Dźisławk nowu gratownju planować. Prěni hruby naćisk bě wón hižo zhotowił, z kotrymž je so gmejna wuspěšnje wo spěchowanske srědki požadała. Dalši nadawk přepodachu radźićeljo Lipičec inženjerskemu běrowej z Jaseńcy, kiž ma elektriku za gratownju planować.
Swoje 120lětne wobstaće je minjenu sobotu dobrowólna wohnjowa ...
Krótkopowěsće (30.06.26)
Festiwal šulerskeho dźiwadła
Budyšin. Na hłownym jewišću Němsko-Serbskeho ludoweho dźiwadła bu wčera 11. zetkanje šulerskich dźiwadłow Sakskeje zahajene. Hač do jutřišeho předstaji dohromady šěsć wuzwolenych cyłkow z Lipska, Drježdźan, Šwikawy, Budyšina kaž tež z Pančic-Kukowa zjawnje a zdarma swoje aktualne produkcije. Program wopřijima nimo toho rozmołwy, dźěłarnički a rejowansku performance pod hołym njebjom.
Weber nowa prezidentka kluba
Budyšin. Po angažowanym lěće je dotalny prezident serwisoweho kluba Rotary Bautzen/Budyšin Günter Beschel swoje zastojnstwo wčera Birgit Weber přepodał. Pod hesłom „Wuměłstwo pohnuwa – Rotary zwjazuje“ chce nowa předsydka „kulturu, zetkawanje a towaršnostny angažement zwjazać“, wona we wobłuku ceremonije na Čornoboze wuzběhny.
Ministra wuhwizdali
Komuž horcota hišće njedosaha
Twarnišćo a wotpadki staraja so wo konflikt z gmejnu
Lejno (AK/SN). Při Lejnjanskim jězoru so móhłrjec wari – ale nic horcoty dla. „Štwórte lěto zasobu dyrbimy z twarnišćemi žiwi być. Kóždy raz su poćežowanja, wužadanja a rozdźělne wobmjezowanja. To wšo je zwjazane z mjenje dochodami“, praji Alfred Tempel, mějićel pobrjóžneje bary „Ostufer“ mjez wuchowanskej stražu a policajskim běrowom.
Wón měni, zo jeho přepozdźe a w njedosahacej měrje informuja. Wjacore razy je to na posedźenjach gmejnskeje rady Halštrowskeje Hole narěčał. „K barje so dóstać je tuchwilu ćežko. Pobrachuje prawe wupisanje, štož myli“, wón praji. „Čehodla so wosrjedź sezony twari? Gmejna je w tym nastupanju mało sensibelna.“ Dokelž je puć špatnje wupisany, druhdy tež wotpadkowe awto puć hač k barje namakało njeje. Nimo toho su wandalojo někotre pokazowaki a informaciske taflički skóncowali. Dale so Alfred Tempel hněwa, zo kupanski wobłuk w jězoru woznamjenjeny njeje. To móhło ke konfliktam mjez kupacymi a wodźerjemi čołmikow wjesć.
Seniorojo škotuja
Mały Wosyk. Přichodny škotowy turněr serbskich seniorow wotměje so jutře, wutoru, w sportowym domje w Małym Wosyku (Kleinhähnchen). Započatk je w 14 hodź. Nowačkojo su kaž přeco wutrobnje witani. Dalši turněr budźe 28. julija w Radworskim „Słodeńku“.
Kak so něhdy kupachu
Budyšin. Historiske romany a filmy pokazuja často drastiski wobraz wo hygieniskich poměrach w srjedźowěku. We woprawdźitosći pak běchu runje tehdy zjawne kupjele jara woblubowane. W Budyšinje bě w srjedźowěku samo wjacorych tajkich městnow. Wone a tehdyša hygiena ćěła steja w srjedźišću přednoška Rica Heyla jutře, wutoru, w Budyskej měšćanskej bibliotece. Započatk je w 19 hodź., zastup je darmotny. Přizjewjenje njeje trěbne.
Radźićeljo wuradźuja
Premjera najebać horcotu wuspěšna
Wiki rjemjesła je towarstwo Dwórnišćo inkluzije Radwor sobotu prěni raz na arealu bywšeho Radworskeho dwórnišća zarjadowało. Wopytowarjo móžachu sej rjemjeslniske wudźěłki kupić abo sej sami něštožkuli zhotowić. Wiki nimaja jónkrótne wostać.
Radwor (SN/BŠe). Něhdźe 15 rjemjeslnikow wobdźěli so zawčerawšim, sobotu, najebać horcotu na prěnich rjemjeslniskich wikach na ležownosći bywšeho Radworskeho dwórnišća. Prěni raz bě tamniše towarstwo na wosebitu přehladku přeprosyło. Pozadk toho je Leaderowy projekt, kotryž so 30. junija skónči. We wobłuku projekta je towarstwo prawidłownje dźěłarnički přewjedowało, na kotrychž zaběrachu so wobdźělnicy ze starym rjemjesłom. „Z wikami chcemy projekt zakónčić“, praji předsydka towarstwa Raphaela Wićazowa. Tuž spřistupnichu organizatorojo wobdźělene rjemjesła hišće raz wjetšemu publikumej. W běchu projekta je sobudźěłaćerka towarstwa Sylwia Weße styki z regionalnymi rjemjeslnikami nawjazała. Za přihot wikow tule syć rady wužiwaše.
