Šulu za kamjenjećesarjow w Zemicach-Tumicach wobšěrnje ponowja

Zemicy-Tumicy (SN/MWj). Sakska šula za kamjenjećesarjow zhladuje na dołhu tradiciju. Generacije kamjenjećesarjow a rězbarjow su tule swoje rjemjesło nawuknyli. Tež mnozy Serbja tu swoje powołanske žiwjenje zahajichu. Dźensa wukubłacy z cyłeje wuchodneje Němskeje sem přichadźeja a sej tule zakłady swojeho powołanja přiswojeja.

Nětko so kubłanišćo na rozsudny krok do přichoda hotuje. Kaž z nowinskeje informacije Budyskeho wokrjesa wuchadźa, maja so z inwesticiju 5,83 milionow eurow wuměnjenja wukubłanja zasadnje modernizować. Přizwolenje spěchowanja z programa Just Transition Fund (JTF) we wobjimje 5,25 milionow eurow je jim sakski kultusowy minister Conrad Clemens (CDU) minjene dny přepodał. Budyski wokrjes přida 580 000 eurow ­jako swójski podźěl.