Kulturnišćo w awgusće přepodadźa
Běła Woda (AK/SN). Kulturne dwórnišćo w Běłej Wodźe – wažny projekt we wobłuku strukturneje změny w měsće škleńčerjow – chcedźa w awgusće zjawnosći přepodać. Tole zdźěli wyša měšćanostka Katja Dietrich (SPD) na zašłym posedźenju měšćanskeje rady. Po wobšěrnym saněrowanju zaměstnja tam nimo pućowanskeho centruma a turistiskeje informacije tež měšćansku biblioteku, dźěćacu biblioteku, bistro a wjacezaměrowu rumnosć za wšelake zarjadowanja. Dotalnu biblioteku na Dróze měra 29. junija zawru. Po móžnosći chcyli nowe rumnosće tuž hižo w juliju wužiwać.
Poslednje dźěła po słowach wyšeje měšćanostki tuchwilu derje pokročuja. Třěcha nad zachodom a fasada stej mjeztym hotowej. Rostliny pak wosadźeja hakle nazymu. Přijimarnja wupožčenych knihow je tohorunja zarjadowana. Najwjetši dźěl meblow su hižo dóstali. Minjene dny su knižne polcy dotwarili. Zdobom hišće někotre poslednje dźěła w twarjenju dokónča.
Po tym zo bě so minjene dny wospjet dešćowało kwětki bujnje ...
Pad „Monika“ zakónčeny
Zhorjelc (SN/MiP). „Pad ‚Monika‘ je nimo – swoboda wuměłstwa je dobyła!“ Pod tutym hesłom zdźěli mějićel Zhorjelskeho modoweho labela LABA Gerhard Zschau, zo je sudniske rozestajenje w zwisku z wužiwanjom linolorězby „Monika“ serbskeje wuměłče Hanki Krawcec zakónčene. Nimale štyri lěta – dokładnje 1 505 dnjow piše Zschau na internetnej stronje labela – je so w 1960tych lětach zwobraznjena Monika juristisce přećiwo wužiwanju swojeho portreta wobarała.
Skoržaca strona je nětko swoje powołanje na Berlinskim komornym sudnistwje přećiwo lońšemu wusudej Berlinskeho krajneho sudnistwa wróćo sćahnyła, kotrež bě Zschauej wužiwanje grafiki dowoliło. Po informacijach mějićela labela běše zakład za tutón rozsud pismo komorneho sudnistwa, kotrež skóržbnicy na wjacorych stronach znazorni, čehodla powołanje wuspěšne być njemóže.
Gerhard Zschau chce swój wuspěch woswjećić a přeprošuje wšitkich zajimcow jutře, 19. junija, wot 16.30 hodź. do swojeho Zhorjelskeho wobchoda na Sohrskej 17.
Krótkopowěsće (18.06.26)
Rozestajenje traje
Budyšin. Wyše zarjadniske sudnistwo w Budyšinje dyrbi so z wobzamknjenjom wokrjesneho sejmika w naležnosći porodźernje w chorowni swj. Jana w Kamjencu zaběrać. Na zeńdźenju sejmika kónc meje radźićeljo rozsudźichu, porodźernju financielnje podpěrać. Wokrjesna radźićelka Drježdźanskemu zarjadniskemu sudnistwu skóržbu přećiwo tomu zapoda a zwrěšći. Nětko spyta wona to w Budyšinje. Hač k rozsudej njemóže so wobzamknjenje sejmika přesadźić.
Na wopory zběžka spominali
Budyšin. Na wopory ludoweho zběžka 17. junija 1953 su wčera sakska justicna ministerka prof. Constanze Geiert (CDU), zapósłanc sakskeho krajneho sejma Marko Šiman (CDU), Budyski měšćanosta za financy Robert Böhmer, přirjadnica Budyskeho krajneho rady dr. Romy Reinisch kaž tež Budyscy měšćanscy radźićeljo na Budyskim rownišću „Nuklaca hórka“ spominali. Tež w Budyšinje je tehdy něhdźe 600 ludźi za wjace demokratije a lěpše dźěłowe wuměnjenja demonstrowało.
Z Vietnama do Wojerec
Piknik z punkom, ludowymi spěwami a wokablemi
Přiwćicy (SN/bn). Pod hesłom „Słónčko nisko – swjatok blisko“ wuhotowaše Syć za serbsku rěč a regionalnu identitu Zari minjeny pjatk druhi raz „pik-nyg“ na Přiwćičanskim Knježim dworje. Za organizowanje zamołwity rěčny motiwator Lucian Kaulfürst njebě jenož hladajo na wulki zajim wopytowarjow přewšo spokojom: „Dobra nalada a stopnjowanje ličby hosći wo 1 900 procentow porno premjerje pokazatej, zo smy na dobrym puću.“ Faktor rozrosta publikuma drje cyle njetrjechi, dokelž ludźo wobstajnje při- a wotchadźachu. Znajmjeńša 20 zajimcow pak bě stajnje přitomnych, z čimž je podaće w přerězku korektne.
Swójby a towarstwa na swjedźenju
Kulow (AK/SN). Hižo wjacore lěta podpěruje w Kulowje Załožba Mrs. Nikovich socialne dźěło z dźěćimi, młodostnymi a swójbami. Składnostnje 100. narodnin Herty Nikovich (1923–1994) je so před třomi lětami wulki swjedźeń swójbow a towarstwow na šulskim dworje wotměł. Tajki ma so nětko na samsnym městnje wospjetować, a to sobotu, 20. junija, wot 11.30 hač do 17 hodź..
Wobšěrny program wopřijima mjez druhim rejwansku dźěłarničku a dalšu za nawuknjenje ukulele. Zdobom přihotuja sportowe wubědźowanja. W sportowni budźe koparski parcours natwarjeny. Třělcowske towarstwo přewjedźe třělenje na drjewjaneho worjoła a blidotenisowe towarstwo wuhotuje blidotenisowy turněr. Nimo toho zarjaduja po připołdnju dźěćace čaporowe wiki.
Program wopřijima tež serbske poskitki. W 13 hodź. předstaji Sulšečanska pěstowarnja serbske reje a pěsnje. Z dalšim programom wustupi Kulowska zakładna šula w 15 hodź. Wopytowarjo zbliska a zdaloka su wutrobnje witani.
W prózdninach do Połpicy
Połpica. W serbskim prózdninskim campje wot 9. hač do 14. awgusta 2026 w Połpicy nad Sprjewju su hišće wjacore swobodne městna, kaž regionalna rěčnica Domowiny Katja Liznarjec zdźěli. Prózdninske lěhwo je za dźěći w starobje wot wosom do dwanaće lět a płaći dohromady 349 eurow za přenocowanje, zastaranje a za wulěty. Zhromadnje chcedźa kupać jěć, šulski muzej w Stróži wopytać, za kulisy Serbskeho domu pohladać a plincy pjec. Wězo rěči so w campje serbsce. Lěhwo je za serbsce wuknjace a za maćernorěčne dźěći. Zajimcy njech přizjewja so pola zarjadowarja Schullandheime e. V. pod telefonowym čisłom 03591 22285 abo z mejlku na .
Samuel Koch přednošuje
Wutwar křižowanišća so dlije
Na kromje Rakec chcychu poprawom spočatk junija křižowanišćo před bywšej Munu wutwarić započeć. To pak njeje so poradźiło. Z gmejnskeho zarjadnistwa zhonichmy, kak ma nětko dale hić.
Rakecy (UM/SN). Hižo dołho připowědźeny wutwar křižowanišća při Rakečanskim přemysłownišću, bywšej Munu, měješe so poprawom spočatk junija zahajić. Termin pak njemóžachu dodźeržeć. „Přičina je, zo so planowanje dliješe a zo maja twarske firmy wobmjezowane kapacity. Tohodla so spočatk dróhotwarskich dźěłow do julija 2026 přestorči“, Budyski krajnoradny zarjad jako twarski knjez projekta na naprašowanje zdźěli. Wažne přihoty su porno tomu hižo wotzamknjene. Mjez druhim su někotre štomy podrězali a přepytowali, hač w zemi někajka stara municija njeleži. Tež někotre reptilije na druhe městna přenjesu, štož ma w juniju wotzamknjene być. Potom móža dróhotwarske dźěła zahajić.
Hač do 2027 bjez zadźěwkow
Wojerowske dwórnišćo za 21 milionow eurow wobšěrnje přetwarja
Wojerecy (KD/SN). Dospołnje přetwarjene a ponowjene ma so kónc přichodneho lěta Wojerowske dwórnišćo prezentować. Wot lěta 2024 je Němska železnica, Swobodny stat Sakska a wobchadny zaměrowy zwjazk wuchodna Sakska přetwarjeja. Zhromadnje inwestuja něhdźe 21 milionow eurow, zo bychu wšitke dotalne zadźěwki wotstronili. Tuž budu w přichodźe tež ludźo z handicapom dwórnišćo wužiwać móc.
Po dotwarje ma tunl za pěškow naměsto před dwórnišćom z nastupnišćemi 1/2 a 3/4 zwjazać. Z pomocu třoch liftow dóstanu so pućowacy z kóframi, dźěćacymi wozami, rolatorami abo z jězbnymi stołami k nastupnišćam. Te budu tak natwarjene, zo móžeš bjez dalšeho schodźenka do ćaha zastupić. Wodźenski system za slepych a špatnje widźacych, LED-wobswětlenje a digitalne pućowanske informacije maja serwis skulojćeć, rjekny Heiko Klaffenbach wot Němskeje železnicy wčera, jako nowinarjam aktualny staw twarskich dźěłow rozłožichu.
Krótkopowěsće (17.06.26)
Chorowni kooperujetej
Zhorjelc. Nawodnistwje Zhorjelskeje chorownje swj. Carolusa a tamnišeho klinikuma stej so wčera na krutu zhromadnu kooperaciju dojednałoj. Z njej chcetej předewzaći strowotniske zastaranje w měsće kaž tež w Zhorjelskim wokrjesu trajnje zawěsćić. Zaměr kooperacije mjez druhim je, poskitki wobeju stejnišćow zmysłapołnje mjez sobu wothłosować a na wysokim niwowje dale wjesć.
Ze situaciju njespokojom
Budyšin. Institut za wične slědźenje MAS z Lipska a firma Procesni psychologojo z Łužicy stej so w měrcu a aprylu něhdźe tysac wobydlerjow łužiskich wokrjesow we wobłuku Łužiskeho monitora woprašowałoj. Mjez druhim so wobhonichu, kak spokojom su ludźo ze swojej žiwjenskej situaciju. Wuslědki wotbłyšćuja negatiwne wuwiće: Jenož hišće 66 procentow woprašowanych je ze situaciju spokojom. Loni bě to 79 procentow.
Pancery na awtodróze
