Wot jutřišeho hač do 27. awgusta swjeći město Kamjenc zaso swój ...
Zhromadnje serbsce spěwać je to najrjeńše
Jako so w aprylu naš Domoj-kurs započina, mje Eva Matthie z přećelnym posměwkom wita. Pola nas je wona „Jěwa“. Wona hlada na mnje ze stražliwymaj a wćipnymaj wočomaj a začuwam, kak jara so wjeseli, wšitkich kursistow zeznać a serbsku rěč wuknyć. Spěšnje pytnu, kelko serbskich spěwow Jěwa znaje a kak wulki je přez to hižo jeje słowoskład. Wona praji: „Zhromadnje serbsce spěwać je to najrjeńše.“ Při tym čuje so žiwa a ze swojimi serbskimi korjenjemi zwjazana.
Spěwanje je ju cyłe žiwjenje přewodźało. W Bukecach, hdźež je wotrostła, bě něhdy wjele zarjadowanjow, na kotrychž so zhromadnje serbsce spěwaše. To je sylny zwisk k regionej a k serbskej rěči wutworiło. Přeco hišće je pola swojeje swójby a znatych jako sopranowa spěwarka za „Běži woda“ znata. To je tež jeje najlubši spěw. Melodije a harmonije spěwow su krasne a klinča najrjeńšo, hdyž so spěwy zhromadnje spěwaja.
Krótkopowěsće (20.08.26)
Bus do hrjebje zajěł
Lejno. Na dróze mjez Lejnom a Nuknicu je dźensa rano krótko do 7 hodź. bus wot puća do hrjebje zajěł. Přičina toho bě błóto na jězdni, zdźěli Zhorjelska policajska direkcija na naprašowanje. W busu sedźachu tři dźěći a šofer. Na zbožo so nichtó z nich zranił njeje. Ratar je mjeztym błóto z dróhi zrumował. Puć dyrbješe tak dołho zawrjeny wostać, doniž njejsu fachowcy bus z hrjebje wućahnyli.
Přetwar křižowanišća bórze zahaja
Budyšin. Srjedź septembra zahaji město Budyšin přetwar křižowanišća mjez Mostom měra a nakupowanišćom při Žitnych wikach. Nastać ma kružny wobchad. Jako prěnje wottorhaja róžkowy dom před twarjenjom Serbskeho ludoweho ansambla. Dźělnych zawrjenjow dla maja šoferojo z haćenym wobchadom ličić.
Nowy wodowód přepodali
Pisany program k jubilejej
Zejicy. Z rejowanskej skupinu, přednoškom k stawiznam wsy a dujerskej hudźbu woswjeća Zejicy sobotu, 22. awgusta, swoju 675. róčnicu prěnjeho naspomnjenja. Hižo popołdnja wot 15 hodź. přeproša na kofej a tykanc do swjedźenskeje bróžnje na Špitankec statoku. Přizamknjetej so w 16.30 hodź. pisany dźěćacy program a wustup Serbskeho folklorneho ansambla Wudwor. We 18 hodź. přednošuje Jurij Špitank wo wusahowacych podawkach w stawiznach wsy. Swjedźeń zakónči so z rejemi, ke kotrymž zahudźi dujerska kapała Horjany.
Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so jutře, štwórtk, w horće „K wódnemu mužej“. Započatk budźe w 19 hodź. Radźićeljo přepodadźa wjacore nadawki we wobłuku saněrowanja wyšeje šule „Michał Hórnik“. Mjez druhim potrjechi to kładźenje kachlicow, molerske dźěła, špundowanje a fotowoltaikowu připrawu.
Z krajnym radu so rozmołwjeć
Policija (19.08.26)
E-bike z awta pokradnyli
Wojerecy. Na swětłym dnju je so předwčerawšim po připołdnju na parkowanišću Wojerowskeje kupnicy Globus elektrokoleso zhubiło. Slěbrobarbny e-bike typa Gasgas w hódnoće něhdźe 2 600 eurow bě na wosobowym awće přizamknjene. Wobsedźer bě so jenož 15 mjeńšin wot awta wotsalił. Jako so nawróći, bě koleso fuk. Dokelž policija z toho wuchadźa, zo bě w 14 hodź. tójšto wobchada na parkowanišću, nětko za swědkami pyta. Štóž je něšto wobkedźbował, njech přizjewi so telefonisce pod čo. 03578 4650.
Wobornicy hotuja so na jubilej
Jedne z mnohich zarjadowanjow přichodny kónc tydźenja je jubilej dobrowólnych wohnjowych wobornikow w Bóšicach. Woni su we wsy dobra zhromadnosć, wjesela pak so tež na to, zo wobornicy z wokoliny k nim přijědu.
Bóšicy. W lěće 1826 je Budyski hejtman buromaj w Bóšicach kazał grat kupić, z kotrymž hodźał so tež woheń hašeć. Jeli so něhdźe pali, měł so grat wot wšěch w gmejny wužiwać móc. Tak podobnje je to do chroniki zapisane. Čehodla pak swjeći Bóščanska wohnjowa wobora potom zajutřišim, pjatk, a dźeń na to hakle swoje 150. narodniny? Dokelž su ju w lěće 1876 do Łužiskeho zwjazka wohnjowych woborow přiwzali. Hakle z tutym podawkom je so wohnjowa wobora w Bóšicach załožiła, lětsa před 150 lětami.
Dnjowy porjad přikrótšili
Njeswačidło (JK/SN). Prěnje posedźenje Njeswačanskeje gmejnskeje rady po lěćnej přestawce bě wčera wječor spěšnje nimo. Zaležeše to na tym, zo su wjacori radźićeljo próstwu zapodali, štyri dypki dnjoweho porjada do njezjawneho dźěla posedźenja přepołožić, štož rada tež z wjetšinu hłosow wobzamkny. Ale runje tutych dypkow dla bě tójšto wobydlerjow přichwatało, dokelž chcychu dožiwić diskusiju a wuradźowanje wo nich. Mjez druhim dźěše wo popłatk za wužiwanje žarowanskeje hale, wo nowe jězdźidło za wohnjowu woboru w Zarěču a wo staršiski přinošk w pěstowarni.
Ze swjedźenjom na hrodźišću woswjeći Łahow sobotu, 22. awgusta, ...
Krótkopowěsće (19.08.26)
Jězby dale wupadnu
Klětno. Kołojězby z łódźu Seelust na Bjerwałdskim jězoru nachwilnje dale móžne njejsu. Kaž mějićelka ŠmitecSchwarzec wozydłownistwa Diana Šmitowa na naprašowanje SN zdźěli, njejsu skóncowane dźěle kolesyny hišće z reparatury z nižozemskeho Rotterdama wróćo. Tohodla su hač do 26. awgusta wšitke planowane jězby wotprajili.
Ćopłotu z centruma wužiwać
Lubnjow. Přichodny kompjuterowy centrum digitalneho wobłuka předewzaća Schwarz w Lubnjowje ma twarjenja w Błótach z ćopłotu zastarać. Wotpowědne dojednanje stej město Lubnjow a předewzaće wobzamknyłoj. Ličenski centrum ma klětu kónc decembra hotowy być, dodawanje dalnoćopłoty zaběži po planje w januarje 2028.
Sněhakowanje wosrjedź lěća
Serbske blido so zetka
Budyšin. Domowinska skupina Budyšin přeprošuje na 2. serbske blido. Zajimcy zetkaja so jutře, srjedu, w 17 hodź. w Serbskim domje, w schadźowanskej rumnosći na 3. poschodźe. Přeprosyli su sej wučerku serbšćiny Serbskeho gymnazija a basnicu Silwiju Šěnowu. Wona čita wudźěłki ze swojeje noweje twórby „Mosty přez morjo“. Serbske blido zmóžni z tym zajimcam, so z njej wo prěničce lyriskich basnjow a jeje nazhonjenjach w serbskej wučbje, kaž tež w dźěle ze serbskimi młodostnymi rozmołwjeć. Organizatorojo nadźijeja so bohateho wobdźělenja a rjanych rozmołwow při čaju a šmałcowych pomazkach.
„Serbskej nocy“
