Nawróćace so lěćo wabi w Miłorazu do kupjele

Nowy Miłoraz (JoS/SN). Najwjetše přeće wobydlerjow Noweho Miłoraza za lěćo je so srjedu tola hišće spjelniło. Měnjene njeje lětnje wjedro, kotrež je so tón dźeń po wjele dešću předrěło, ale nowa kupjel, kotruž móža wobydlerjo a wopytowarjo nětko wužiwać. Prózdniny drje su w Sakskej nimo, ale hdyž změja dźěći wot přichodneho tydźenja domjace nadawki hotowe, smědźa so po šuli w nowej kupjeli zabawjeć.

Slepjanska gmejna je so krótkodobnje rozsudźiła, kupjel nětko zjawnosći přepodać. Wina na komdźenju běchu poslednje zarjadniske předpisy a skerje nazymske hač lětnje wjedro zašłych tydźenjow. Wulki swjedźenski akt drje organizowali njejsu. To pak njeje Laureen a Leni wottrašiło, zahoriće do 21,3 stopnje ćopłeje wody skočić. Z tym drje wonej jako prěnjej wužiwarce noweje kupjele w Nowym Miłorazu do stawiznow wsy zańdźetej. Do toho běštej wonej z Friedhelmom symboliski banćik přetřihałoj. Nimo někotrych staršich bě tež wjesnjanosta Jörg Funda přitomny.