Budyšin. Pjatk, 12. junija, přewjedźe Rěčny centrum WITAJ za šulerjow 3. a 4. lětnika serbskich zakładnych šulow znowa čitanski dyrdomdej we wjacorych Budyskich wěžach. Nóžkujo po starym měsće wopytaja šulerjo z přewodnikami ně­kotre Budyske wěže, zhonja wo jich stawizniskich zajimawostkach a předčitaja sej na wěžach ze swojich serbskich knihow. Mały piknik, zabawne hry a kónčny kwis zhromadny wječor skulojća. Městna su wobmjezowane, přizjewjenja přiji­muja so hač do 30. meje w Rěčnym centrumje WITAJ.

Z wulkim předskokom dobył

Njeswačidło. Dalši škotowy turněr serbskich seniorow je so wčera w Njeswačidle wotměł. Z wulkim předskokom a z 3 463 dypkami dobył je Marko Kowar před Siegfriedom Höraufom (2 866) a Uwe Sieglerom (2 732). Cyłkowne hódnoćenje nawjeduje Herbert Krječmar.

Dźesać lět bjez dowolnosće jězdźił

Wojerecy. Dobry čuch mějachu policisća póndźelu připołdnju we Wojerecach, jako na Rosy Luxemburgowej Audi A6 zadźeržachu. Jeho 40lětny wodźer njemóžeše zastojnikam jězbnu dowolnosć předpołožić, dokelž hižo nimale dźesać lět žanu njewobsedźi. Nimo toho drogowy test pola muža pozitiwnje na amfetaminy a konop reagowaše. Muž dyrbješe krej wotedać a dale jěć wězo tež njesmědźeše.

Wandalojo zachadźeli

Kamjenc. Něhdźe 5 000 eurow škody su njeznaći na Kamjenskej Fichtowej načinili, jako tam kónc tydźenja fasadu domu pomórachu a wokna rozbichu.

Z wosebitej techniku Budyski Móst měra takrjec wotspody přepytowali

Budyšin (SN/MWj). Štóž je minjeny tydźeń po Budyskim Mosće měra jěł abo šoł, je so snano nad njewšědnej techniku dźiwał, kotraž bě na chódniku natwarjena. Z njej su wobšěrne přepruwowanje mosta přewjedli. Techniski nastroj je pruwowarjam zmóžnił, sej wobhladać wobłuki pod mostowej konstrukciju.

Zaměr pruwowanja bě, aktualny staw mosta dokładnje zwěsćić kaž tež nastate škody dokumentować a spóznać, w kotrej měrje je móst wottrjebany. Zasadźena technika za přepruwowanje mosta njebě při tym jenož swojeje wukonliwosće dla zajimawa, ale tež, přetož wona jara eficientnje dźěła. Dokelž hodźi so jeje dźěłowa platforma pohibować, móžachu sej pruwowarjo wšitke wobłuki spódnjeho dźěla mosta dokładnje wobhladać, bjez toho zo by běžny nadróžny wobchad horjeka poćeženy był.

Krótko do swjatkow bě gmejnska wohnjowa wobora Ralbicy-Róžant zhromadnje ze wšěmi pjeć wjesnymi woborami z Ralbic, Konjec/Šunowa, ze Smjerdźaceje, ze Sernjan a z Róžanta wobšěrnu wukubłansku słužbu w Šunowje přewjedła. Podpěrali su zasadźenske mocy při tym kameradaj ze susodneje gmejnskeje wohnjoweje wobory Rakecy, kiž běštaj z tak mjenowanym wjerćatym rěblom do Šunowa přijěłoj.

Jako objekt zwučowanja słužeše prózdny dom při Lěsnym puću, kotryž ma so w blišim přichodźe spotorhać. Tak so dobrowólnym wohnjowym wobornikam móžnosć skićeše, wšelake scenarije zasadźenja pod realistiskimi wuměnjenjemi trenować. Ćežišćo wukubłanja ležeše na hašenju wohenja we wuhenju. Pod fachowym nawodom zamołwiteho saznika za wobwod Kamjenc Franka Freudenberga su zasadźenske mocy wobchadźenje z tajkim scenarijom zasadźenja praktisce zwučowali. Po zapokazanju do techniki za hašenje so palaceho wuhenja přez Freudenberga dyrbjachu so kameradojo z Rakečanskim so wjer­ćacym rěblom k wjerškej wuhenja podać a tam hašenje zwučować.