Spěchowanje za hudźbu
Podstupim (SN/MiR). Braniborske ministerstwo za kulturu podpěruje lětsa ze 170 000 eurow projekty za nowu hudźbu a jazz. Mjez 13 dobyćerjemi je Elena Kolo, kotraž přewjeduje we Drjowku jazz-koncerty pod hesłom „Sound Of The Space Age“. Spěchowanski program je ministerstwo w kooperaciji z Braniborskej radu za hudźbu z.t. wuwiło. Kulturna ministerka Manja Schüle (SPD) praji: „Tradicija a awantgarda njejstej w Braniborskej napřećiwkaj, ale runohódnej faseće našeje šěrokeje kulturneje krajiny. Ze spěchowanskim programom za aktualnu hudźbu skićimy načasnemu zwukowemu wuměłstwu rum za swobodne a spušćomne dźěło wuměłcow połnje inspiracije. Wulka ličba projektow a sylne wobdźělenje pokazujetej, kak žiwa nowa hudźba a scena jazza je. A spěchowane projekty dopokazuja wusahowacu wuměłsku kwalitu.“
Srědki ze spěchowanskeho programa za aktualnu hudźbu su so z pomocu jury wuzwolili a přepodali. Braniborska rada za hudźbu z.t. spěchowanje małych projektow hač do 2 500 eurow financielnje podpěruje.
Radźeny festiwal z młodej poeziju
Krótkopowěsće (21.07.26)
Klumpaja wodu do Sprjewje
Łaz. Dokelž je w Sprjewi tuchwilu jara mało wody, ze składa we Łazu wodu do njeje klumpaja. Blisko Łaza su wulke wodowe składy, z kotrychž móža rěki w nuzowym padźe pjelnić. Hłownje je woda za Sprjewju předwidźana, zo njebychu Błóta wusknyli. Loni su tam wjac hač 44 milionow kubiknych metrow wody do rěkow klumpali.
Falowacy kabl ćahi zlemił
Zhorjelc. Na železniskej čarje mjez Zhorjelcom a Drježdźanami bu wčera dopołdnja koporowy kabl pokradnjeny. W bliskosći Rauschwalde su njeznaći kanal za kable wočinili a dźěl kabla z kopora spakosćili. Tohodla bě wotrězk skrótka zašlahany. Krótko pozdźišo rubiznu blisko lěsa zaso namakachu.
Namóc njedominowała
Budyšin. Z widejom w socialnych syćach je prawicarsko-ekstremistiska strona „Swobodni Saksojo“ zaćišć zbudźiła, zo je „namóc migrantow“ kónc tydźenja sprjewine město dominowała a zo medije wo tym mjelča. Kaž policija zdźěli, staj so jeničce Marokkočan a Ukrainjan mjez sobu ćělnje atakowałoj. Wobaj 22lětnaj so při tym lochce zraništaj.
Hrajne plany předleža
Na wjesnym swjedźenju hejsowali
Sad a zeleninu najlěpje wšědnje na taler
Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (6)
Němska towaršnosć za zežiwjenje (DGE) doporuča kóždemu wšědnje znajmjeńša pjeć porcijow wšelakeho sadu a zeleniny, a to wosebje čerstwe, domjace družiny. Ale čehodla? Sad a zelenina stej połnej wažnych witaminow, mineralnych maćiznow, balastowych maćiznow a wody. Wonej syćitej a nimatej wjele kalorijow. Tak je runowaha mjez trěbnej energiju a wažnymi wutkami. Kóždy, kiž sad a zeleninu plahuje, wě, zo je wuběr wot nalěća hač do nazymy wulki. Tohodla nětko wobšěrny poskitk rady wužiwajće. Hač wuzwoliće sej w prěnim rjedźe sad abo radšo zeleninu, njeje pola strowych ludźi tak rozsudźace. Wězo je w sadźe hustodosć wjac sadoweho cokora. Poručam tohodla dwě porciji sadu a tři porcije zeleniny. Wažniše pak je, a tu myslu wosebje na naše dźěći, zo scyła čerstwe produkty jěmy.
Policija (20.07.26)
Wuměnkarjej pjenjezy zhubiłoj
Kamjenc. Z woporom wobšudnikow běštaj pjatk wječor wuměnkarjej-mandźelskaj pola Kamjenca. Skućićeljo na njeju zazwonichu a jimaj napowědachu, zo bě jeju syn ćežke wobchadne njezbožo zawinił. Wobšudnicy žadachu sej pjenjezy za kawciju. Bjez podhlada na wobšudnistwo přepodaštaj mandźelskaj cuzemu čłowjekej před swojimi chěžnymi durjemi něhdźe 25 000 eurow. W tym zwisku policija wospjet namołwja, zo njech wšitcy při tajkich a podobnych telefonatach kedźbliwi su. Najlěpje je, zo telefonat nablaku skónčiš a policiju informuješ. Wšojedne kotru stawizničku něchtó při telefonje powěda, nichtó njeměł cuzym ludźom swoje pjenjezy přewostajić.
Wustajeńca wo drasće widźeć
Nowa kalkulacija wobzamknjena
Za wotwodźowanje wopłóčkow změja wobydlerjo w gmejnach při Klóšterskej wodźe wot klětušeho hłubšo do móšnje přimnyć. Za najwjetši dźěl su změny skerje snadne.
Kamjenc (AK/SN). Na terenje bywšeho zaměroweho zwjazka za wopłóčki Při Klóšterskej wodźe, potajkim w gmejnach Porchow, Chrósćicy, Pančicy-Kukow, Worklecy a Ralbicy-Róžant, płaća wot lěta 2027 nowe popłatki. Te je wjetšina čłonow zhromadźizny zaměroweho zwjazka za wodu a wopłóčki Łužica (WAZV) na swojim minjenym posedźenju wobzamknyła.
Atmosfera zahrody wobkuzłała
„Nóc tysac swěčkow“ w klóštrje Marijinej hwězdźe znowa wulki wuspěch
Pančicy-Kukow (SN/MWj). Wšitkich, kotřiž su sobotu wječor w zahrodźe klóštra Marijineje hwězdy w Pančicach-Kukowje „Nóc tysac swěčkow“ z wulkej prócu a wjele dźěłom organizowali a přihotowali, drje je dešć wčera dopołdnja hłuboke spokojił. Dwanaće hodźinow do toho knježeše najrjeńše lěćne wjedro z miłymi temperaturami. To je něhdźe 1 200 wopytowarjam wulkotne dožiwjenje wobradźiło.
Krótkopowěsće (20.07.26)
Pytaja statistow za jewišćo
Žitawa. Gerharta-Hauptmannowe-dźiwadło Žitawa/Zhorjelc pyta statistow za operu „Carmen“ komponista Georgesa Bizeta. Ludźo mjez 18 a 65 lětami, kotřiž chcedźa zhromadnje z dźiwadźelnikami na jewišću stać, njech so w dźiwadle přizjewja. Nimo toho witaja dźěći wot šěsć do dwanaće lět, kotrež bychu w operje Wozzeck małe róle přewzali.
Změna z perspektiwu
Janšojcy. Na ležownosći něhdyšeje milinarnje Janšojcy zahaja hišće lětsa twarske dźěła za najwjetši system za składowanišća baterijow po cyłej Němskej. Dale planuja twar připrawy za twar Power-to-Heat-připrawy, kotraž ma Choćebuz z wobswět njepoćežowacej dalnoćopłotu zastarać. Tuchwilu transformuja stejnišćo, za kotrež běchu před 50 lětami zakładny kamjeń połožili.
Ze spěchowanjemi ponowja
Budyšin. Z europskeho spěchowanja sakske powołanske šule sylnje wutwarjeja. Mjez druhim profituja tež Budyske powołanske šule. Z pjenjezami chcedźa tu w Budyšinje powołanske centrumy lěpje wuhotować a na třěše photowoltajkowu připrawu přitwarić (hlej 2. str).
