Budyske Hłowne torhošćo je so tele dny na wjesołe zetkanišćo ...
Serbšćinu we wokrjesu spěchować
Krótkopowěsće (17.09.26)
Załožba směrnicy wobzamknyła
Budyšin. Na wurjadnym online-posedźenju je rada Załožby za serbski lud wčera nowej směrnicy za spěchowanje projektow a za spožčenje stipendijow wobzamknyła. Po wothłosowanju z krajnymaj ministerstwomaj za wědomosć a financy Sakskeje a ze sakskim zličbowanskim zarjadom narunaja z tym regule z lěta 2003. Detaile zhonja zajimcy w aktualnej zdźělence na internetnej stronje załožby.
Wo kulturnym herbstwje rěčeli
Choćebuz. Projekt „žiwe kulturne herbstwo w Delnjej Łužicy“ běše tema wčerawšeho wuradźowanja Domowiny ze społnomócnjenymi za serbske naležnosće w Braniborskej. Dwójce wob lěto so njezjawnje schadźuja. Regionalna rěčnica Heike Apeltowa na naprašowanje našeho wječornika zdźěli, zo prosy Stephanie Bierholdtec ze Serbskeho instituta ludźi, kotřiž maja wědu wo rjemjesle, wo pokiwy.
Zakłapnicy wuchowali
Katolscy młodostni zhromadnje sej wulećeli
Worklecy (SN/hn). Na swój tradicionalny wulět je so serbska dekanatna młodźina minjenu njedźelu podała. Dohromady 63 młodostnych a třo dorosćeni zastupichu na wšelakich stacijach do busow a jědźechu do směra Sprjowjow (Sprey). Prěnja stacija bě tam mała kładźita kapałka, w kotrejž swjećachu nyšpor. Kilian van Dorp skupinu na pišćelach přewodźeše. Po tym dźěše dale na wodu.
W šěsć hadźicowych čołmach padlowaše stajnje něhdźe dźesać do dwanaće młodostnych něhdźe połdra hodźiny po Sprjewi wot něhdyšeho Čelnoho hač k Ruhlac młynej blisko Trjebina. Při tym bu tež raz trochu dźiwišo: „Někotři hólcy su do wody skočili a z wodu wokoło pryskali“, powěda Wendelin Smoła, kotryž je so na wulěće wobdźělił.
Po padlowanskej turje běchu w cilu hižo kołbaski, steaki a twarožk z grila spřihotowane. „Kusk škoda wšak běše, zo je tak mało staršich młodostnych sobu jěło“, Wendelin měni. Přiwšěm je so wulět poradźił. „Mi je so wosebje zhromadnosć mjez wšitkimi wobdźělnikami lubiła a zo móžach nowych ludźi zeznać“, Beno Neter powěda.
Policija (16.09.26)
Njezbožo tragiski wukónc měło
Wojerecy. Ćežke wobchadne njezbožo je so wčera něhdźe w 19 hodź. na zwjazkowej dróze B 97 mjez Wojerecami a Njedźichowom stało. Z dotal njeznateje přičiny je tam wosobowe awto frontalnje do napřećo přijěduceho nakładneho awta zrazyło. 77lětny wodźer wosoboweho awta so při tym tak ćežko zrani, zo hišće na městnje njezboža wudycha.
Muzej z wosebitej přehladku wabił
Sobotu premjera w Haslowje
Budyšin (SN/DK). Band Němsko-Serbskeho ludoweho dźiwadła „Floppy Dolls“ poda so po dlěšej přestawce z nowym programom a hitami ze wšeho swěta na turneju po Łužicy. Při tym wuprudźa w serbskej rěči žiwjenske wjeselo. Štóž so tele dny aktualneho plakata abo flajera za předstajenje skupiny „Floppy Dolls“ dohlada, njech ze swojim šmóratkom tam podaty QR-kode wužiwa. Tón wjedźe direktnje k hudźbje a widejofilmej wo legendarnej skupinje „Floppy Dolls“.
Serb so na mišterstwo hotuje
Budyšin (SN/StŠ). Jako Markus Dej lětsa kónc junija swoje třilětne wukubłanje na pjekarja z cyłkownym přerězkom 2,0 wotzamkny, bě na swój wukon přewšo hordy. „Wědźach, zo směm so z tym na lětušim wubědźowanju młodych pjekarjow wobdźělić“, mi tróšku wučerpany młody muž powěda, jako so dopołdnja po jeho wosom hodźinow trajacej słužbnje na rozmołwu zetkamoj. „Zahe stanyć mi ničo njewučinja. Kóžde ranje, hdyž do ćěstarnje zastupju, mje tuta wosebita wóń pozbudźuje a pohonja so do dźěła dać a swoje mocy zasadźeć a swoju lubosć k tutomu rjemjesłu pokazać z tym zo napjeku čerstwe, rjane a wosebje słódne całty a chlěby. Hižo jako dźěćo sym rady z maćerju sobu k pjekarjej chodźił, wónje a wězo słódneho pječwa dla. Zo sym mjeztym sam tak daloko, zo móžu wšo to napjec, mje fascinuje, to je woprawdźe moje powołanje.“
K pjekarstwu wšak bě Markus Dej skerje připadnje přišoł. Dokelž bě jeho nan znateho Budyskeho pjekarja Dietera Marxa znał, je jako młodostny w Budyšinje praktikum přewjesć móhł. „Hižo po druhim praktikumje bě jasne, zo po šuli tule w zawodźe wukubłanje na pjekarja zahaju.“
Na slědach Měrćina Nowaka pućowali
Njechorń (LTh/SN). Druhi raz su so přećeljo Doma Měrćina Nowaka-Njechorńskeho minjenu njedźelu zetkali, zo bychu zhromadnje na slědach njeboh serbskeho molerja pućowali. Na spočatku sej jeho ležownosć a postup ponowjenja domskeho wobhladachu.
W srjedźišću pućowanja pak steješe tutón raz wokolina. Wuměłc sam je rjanu kónčinu wokoło Njechornja husto z krasnymi słowami wopisował. Při tym dźiwaše na serbske pomjenowanja polow, lěsow, hajow a hórkow kaž tež na serbske, němske a łaćonske mjena štomow a ptačkow. Předsyda kruha přećelow Florian Kießlich citowaše wurězki z jeho powědančkow a dźewjeć pućowacych poda so na puć, zo bychu po wopisowanjach sławneho serbskeho pisarja a molerja dalše šćežki zeznali. Mjez nimi běchu někotři wjesnjenjo, kotřiž so na zhromadne pućowanja z nim a na jeho mudre rozkładowanja w času swojeho dźěćatstwa dopominachu.
