Změja milion eurow mjenje dawkow
Łaz (AK/SN). Hospodarske połoženje Łazowskeje gmejny je dale přewšo napjate. „Prěni raz so nam njeje poradźiło, swoje kredity kaž předwidźane wotpłaćić. Tuchwilu mamy mjenje dochodow hač wudawkow“, rozłoži komornica Mandy Liepert na zašłym posedźenju gmejnskeje rady. Radźićeljo wobzamknychu hospodarski plan 2026. Deficit wučinja cyłkownje 425 000 eurow. Tuchwilu liča z 1,12 milionomaj eurow mjenje přemysłoweho dawka hač hišće loni.
Łazowska gmejna dóstanje lětsa 1,6 milionow eurow klučowych připokazanjow wo Sakskeje. To je 287 000 eurow mjenje hač loni. „Dyrbimy so tuž na swoje winowatostne nadawki koncentrować“, praji wjesnjanosta Thomas Leberecht. Sobu najwjetše poćežowanje je wokrjesny wotedawk, kiž wučinja lětsa 2,013 miliony eurow. Loni bě to hišće 1,973 miliony eurow. Tež kredit, z kotrymž su 1994 a 1995 komunalne bydlenja saněrowali, gmejnu dale poćežuje.
W dnjowej hladarni Carity „Při Krabatowym puću“ we Worklecach je ...
Přichod Linusa: Policist abo redaktor
Zo je hakle 15lětny, sej njemysliš, hdyž 1,94 m wulki šuler Serbskeho gymnazija Budyšin před tobu steji. Wón je nas wšěch w redakciji dwě njedźeli dołho přesahował – dźensa swoje prózdninske dźěło zakónči. Najwušo kooperowaše Róžeńčan ze 17lětnym Milanom Jurkom z Hórkow, z kotrymž tež hromadźe kopańcu hraješe, w mustwje U 17 Budissy Budyšin. Milan, kiž hižo wospjet w redakciji dźěłaše a so po prózdninach do 12. lětnika poda, woteńdźe do U 19, mjeztym zo Linus jako wrotar dale swojemu dotalnemu mustwu słuži. Za 10. lětnik je sej hižo temu za fachowe dźěło wupytał: komercializacija w kopańcy Němskeje na přikładźe RB Lipsk.
Skónčnje zaso do „Seife“!
Krótkopowěsće (17.07.26)
Pomoc při hašenju wohenja
Budyšin. Wokrjesaj Budyšin a Sakska Šwica-Wuchodne Rudne horiny podpěrujetej zhromadnje wohnjowych wobornikow w Mecklenburgsko-Předpomorskej při hašenju wohenja we wokrjesu Mecklenburgska jězorina. Pomocny paket wopřija dešćowaki a hadźicy, kotrež je techniska pomocna słužba Pirna wčera tam dowjezła.
Posledni raz na Highfield festiwal
Lipsk. Festiwal Highfield při Störmthalskim jězorje pola Lipska so lětsa drje posledni raz přewjedźe. Tole zarjadowarjo wčera wozjewichu a wopodstatnichu rozsud z masiwnje zwyšenymi kóštami za produkciju. Pod hesłom „One Last Dance“ wuhotuja festiwal wot 13. do 16. awgusta.
Wuslědki naprašowanja wozjewili
Nowy zazběh we hwězdarni
Andreas Throniker ma tež cyle jednore dźěła na starosći
Budyšin (UM/SN). Do Budyskeje hwězdarnje je zaso wobstajne žiwjenje zaćahnyło. Andreas Throniker je wot 1. junija najprjedy raz hač do kónca lěta w towarstwje Ad Astra přistajeny. Hižo do toho bě so wón wjele lět čestnohamtsce w spěchowanskim towarstwje hwězdarnje angažował. Jeho nadawk je, „hwězdarnju zaso widźenjahódnu činić, ju do zjawnosće přinjesć, spěchowanske srědki wobstarać a z tym projekty nastorčić“, kaž to sam formuluje. Zmóžniła je to iniciatiwa frakcije Wobydlerskeho zwjazka Budyšin tudyšeje měšćanskeje rady z podpěru radźićelow tamnych frakcijow. To je na posedźenju w oktobru 2025 k wažnemu rozsudej wjedło. Z nim je město Budyšin swoju kóždolětnu přiražku wobdźělenskej a wobhospodarjenskej towaršnosći wot 20 000 na 60 000 eurow wob lěto zwyšiło. Z tym bě móžno, krute dźěłowe městno za dalewuwiće hwězdarnje wobsadźić.
Policija (16.07.26)
Na zapławjenej dróze znjezbožił
Trjebjeńca. Sylny dešćik njeje so předwčerawšim jenož wo někotre zapławjene pincy postarał, ale takrjec tež wobchadne njezbožo zawinił. Krótko do 17 hodź. bě na zwjazkowej dróze B 6 do směra na Trjebjeńcu (Steindörfel) 54lětny wodźer Škody po puću. Dokelž bě dróha połna wody, zajědźe muž z jězdnje, zrazy do dweju štomow a so přewali. Alarmowana wohnjowa wobora dyrbješe znjezboženeho z jeho awta wuswobodźić. Jězdźidło wuchowanskeje słužby dowjeze muža do chorownje. Wěcnu škodu trochuje policija na něhdźe 50 000 eurow. Zastojnicy policije njezbožo wobdźěłachu.
Zwěrjata wšědny dźeń porjeńšeja
Wosebje na wsach drje je lědma domjacnosće, w kotrejž njeje domjaceho zwěrjeća. Mjeztym zo so psyk a kóčka poměrnje husto jewitej, su bóle eksotiske zwěrjata skerje rědke. Wo nich a jich plahowarjach na wšelakich městnach Łužicy rozprawjamy w lětnjej seriji Serbskich Nowin. (2)
Po měnjenju mnohich je kolesowanje jedna z najrjeńšich ...
Krótkopowěsće (16.07.26)
Wjesnjanosta rozsud cofnył
Malešecy. Wjesnjanosta Matthias Seidel (CDU) je po poroku AfD a kritice zarjada za prawniski dohlad nad komunami w Budyskim wokrjesu swoju próstwu wo srědki za financowanje twara zakładneje šule zaso cofnył. Gmejnscy radźićeljo AfD Malešanskemu wjesnjanosće wumjetowachu, zo bě w tutej naležnosći samowólnje bjez wothłosowanja z gmejnskej radu jednał.
Na zarjedźe wšitko digitalne
Choćebuz. Na Choćebuskim twarskim zarjedźe njewobdźěłuja sobudźěłaćerjo twarske próstwy wotnětka hižo w papjerjanej formje. Tajke zapodaća so jenož hišće digitalnje přiwozmu, kaž z měšćanskeho zarjadnistwa rěka. Tež wšitke dalše kročele su – inkluziwnje wotmołwow próstwystajerjam – ryzy digitalne.
Sta metrow kabla pokradnyli
