Bio-fritki na wikach požadane byli
Koćina (SN/MWj). We wobłuku Krabatoweho tydźenja běchu sobotu w Koćinskim ratarskim zawodźe Krabatowy mlokowy swět Kulowskeho zawoda MKH znowa nazymske wiki. Te su něšto stow ludźi zbliska a daloka přiwabili. Jako prěnje dožiwichu wopytowarjo jara derje organizowane parkowanišćo. Tam so wjacory pomocnicy wo to starachu, zo kóždy spěšnje swoje městno dóstanje. Před zachodom do zawoda móžachu zajimcy wšelake ratarske mašiny wobdźiwać.
Něhdźe 60 přihladowarjow je wčera w Njebjelčicach pisany nazymski ...
Krótkopowěsće (12.10.26)
Nowy šulski słownik wušoł
Budyšin. Rěčny centrum WITAJ je w Ludowym nakładnistwje Domowina nowy „Němsko-hornjoserbski šulski słownik“ wudał. Přiručka, kotruž stej dr. Helmut Jenč a Horst Petrik zestajałoj, wopřijima něhdźe 23 000 hesłow a měri so na „wšitkich, kotřiž chcedźa sej serbsku rěč w šuli abo zwonkašulsce přiswojić“. Ju wudospołnja dodawk, kotryž so na kompendij „Gramatika. Tabulki a přehlady za wučbu serbšćiny“ złožuje.
Knježi dwór mjez počesćenymi
Dobruša. Knježi dwór w Dobruši je wospjet najwoblubowaniše přebywanišćo mjez hosćimi po cyłej Sakskej w kategoriji dowolowe bydlenje. Hižo w lěće 2024 běštaj sej Eva-Maria a Heiko Proske tute wuznamjenjenje zdobyłoj. Wo tym informuje Budyski wokrjes. Krajne zjednoćenstwo za turizm kóžde lěto najwoblubowaniše přebywanišća we wjacorych kategorijach počesći.
Krahl dale měšćanosta
Pjekarnja nětko na nowym městnje
Publikum smě wothłosować
Prěnje wubědźowanje wo najsłódnišu marmeladu po cyłej Łužicy
Lubow (SN/MiR). Tołčernja sadu Kekila w Lubowje (Lauba) njedaloko Lubija je mnohim Serbam znata adresa. Wšako je předewzaće jedne z mjeztym rědkich, kiž z płodow priwatnikow brěčku tłóči. Dale je zawod Kekila za to znaty, zo brěčki předawa. Lětsa pak skedźbnja jednaćelka Kathleen Kitsche na nowinku, kotraž ju mjeztym hižo wjacore měsacy přewodźa. „Pobych lětsa jako jurorka na wubědźowanju wo najsłódnišu marmeladu w susodnej Čěskej“, powěda wona wabjo za tajke wurisanje tež we Łužicy, „a mějach to za dobru ideju tež za našu kónčinu.“ Přichodny pjatk, 16. oktobra, wot 16 do 19 hodź. ma so tajke wubědźowanje we wobchodźe Kekila w Lubowje, Při zelenym haju 18 wotměć, a to „drje chětro krótkodobnje“, kaž wona z kuchinskej mišterku Carolu Arnold z Kumwałda připowědźi.
Swójby zhromadnje sportuja
Chrósćicy. Wot 13. oktobra změja swójby w Chrósćicach zaso składnosć zhromadnje sportować. Poskitk, kotryž nawjeduje socialny dźěłaćer Rěčneho centruma WITAJ Křesćan Lebza, je zaměrnje na potrjeby staršich a dźěći w starobje třoch hač do šěsć lět přiměrjeny. Při tym steji předewšěm zhromadny čas w srjedźišću. Dźěći so pohibuja a pokazaja hrajersce swoju wušiknosć. Tež starši so aktiwnje wobdźěla, ale wužija zdobom składnosć so wuměnjeć. Zakład koncepta je, zo su přirodne, wšědne poćahi za strowu towaršnosć přewšo wažne. Čim stabilniše tute zwiski, ćim mjenje profesionalneje podpěry je trěbne. To je zaměr, kotryž RCW z projektom sćěhuje. Poskitk so hač do 17. nowembra přewjedźe. Zajimcy móža so hišće pod přizjewić.
Domizniska stwa z jubilejom
Policija (09.10.26)
Padustwo zwrěšćiło
Wojerecy. Njeznaty muž je minjenu njedźelu we Wojerecach podarmo spytał, staršu žonu nadpadnyć. 85lětna bě z kolesom w měsće po puću, jako wona pytny, zo wotzady přijězdźowacy kolesowar spyta, jeje ručnu tobołku z koša spakosćić. To pak so jemu njeporadźi, dokelž bě tobołka přidatnje přiwjazana. Cuzy so na to zminy. Wuměnkarka pak přizjewi so na to pola policije, kotraž pad dale přepytuje.
Mnozy maja stare tepjenje
Radwor (SN/BŠe). Z komunalnym planowanjom ćopłoty w Radworskej gmejnje su so čłonojo gmejnskeje rady na swojim posedźenju zawčerawšim w rumnosćach Minakałskeje wohnjoweje wobory zaběrali. Tobias Kade z Drježdźanskeje syće za mobilitu, kotryž je za projekt zamołwity, přitomnym w přednošku swoje prěnje wuslědki předstaji. Jako prěnje je wón wobstejnosće w gmejnje analyzował. W gmejnje tepja ludźo 1 250 twarjenjow, kotrež předewšěm za bydlenje wužiwaja. Tuchwilu je w gmejnje hišće wjele wolijowych a płunowych tepjenjow zatwarjenych. Něhdźe 58 procentow připrawow za tepjenje je staršich hač 20 lět. Tuž změje so bórze tójšto wobsedźerjow domow z tym zaběrać, kak chcedźa swoju domjacnosć w přichodźe z ćopłotu zastarać. Załožene energijowe drustwo je na kóždy pad dobry zakład za přichod. Wone móže wobydlerjam směrodajnje pomhać a projekty hladajo na ćopłotne syće zeskutkownić. Tuchwilu dźěła drustwo zaměrnje na ćopłotnej syći w Minakale.
Tójšto ludźi sej tele dny na pola ratarjow dojědźe, zo bychu sej ...
Krótkopowěsće (09.10.26)
Přisaha bórze móžna?
Njebjelčicy. Spřećiwjenja nastupajo wólby wjesnjanosty w Njebjelčanskej gmejnje móža so hač do 14. oktobra pola wokrjesa zapodać. To zdźěli na naprašowanje SN hamt za komunalne naležnosće. Dołhož njeje proces zakónčeny, dyrbja hišće z přisahu Měrka Domaški dočakać. Přichodne posedźenje gmejnskeje rady budźe 27. oktobra. Potom móhł Domaška přisahu złožić.
Dale a wjac studentow z wukraja
Drježdźany. Telko požadarjow z wukraja wo studijne městna kaž lětsa nazymu njeje Techniska uniwersita Drježdźany ženje měła: Jich je 12 513. Mjez 6 226 nowačkami w 1. semestrje je 1 590 studowacych z dohromady 104 narodow. Zdobom so wjesela nad rosćacym zajimom za matematiku, přirodowědu a inženjerstwo: Dotal hižo 15 016 požadanjow přetrjechi ličbje lětow 2024 a 2025.
Češa na wulkowikach
