Na casting za nowu inscenaciju
Čorny Chołmc (SN/MWj). „Mła samotnosće“ rěka titul lětušeje lěćneje produkcije stawizny wo Krabaće, kaž jednaćel Anton Fuchs zdźěli. Njedźelu, 12. apryla, wot 11 hodź. přewjedu na terenje Čornochołmčanskeho Krabatoweho młyna za to wulki casting za statistow a komparsow. To je mjeztym třeći dźěl wuspěšneje dźiwadłoweje produkcije w režiji Krabatoweho młyna. „Byrnjež so stawizna w tymle lěće tematisce ze samotnosću a ćmu zaběrała, je inscenacija tole žiwa wot mnohostronskosće a energije angažowaneho ludoweho ansambla“, praji Anton Fuchs.
Po tym zo bě jutrowničku wjele wopytowarjow w Pančicach-Kukowje ...
Krótkopowěsće (09.04.26)
2 000 ludźi w Serbskim muzeju
Budyšin. Wjace hač 2 000 hosći z tu- a wukraja je lětsa wot ćicheho pjatka do jutrowneje póndźele Serbski muzej w Budyšinje wopytało. Wo tym informuje wjednica muzeja Christina Boguszowa. Nimo wustajeńcow su zajimcow wosebje ludowi wuměłcy do muzeja wabili, kotřiž tam wšě dny jutrowne jejka we wšelkich technikach debjachu.
Wupisaja Myto za pomnikoškit
Drježdźany. Sakscy rjemjeslnicy, kotřiž su w minjenych třoch lětach na pomnikoškitnych projektach dźěłali, móža so wo lětuše „Myto za pomnikoškit sakskeho rjemjesła“ požadać. Čestne wuznamjenjenje wupisaja tři rjemjeslniske komory Sakskeje w kooperaciji ze sakskim ministerstwom za infrastrukturu a wuwiće kraja. Swjatočne mytowanje budźe 6. nowembra w Lipsku. Dalše informacije su online pod www.sachsendenkmal.de/denkmalpflegepreis-sachsen podate.
Tramwajki symbol respekta
W serbskej drasće po wsy kročili
Popołdnjo za swójby w Rakečanskej pěstowarni
W našim regionje hajimy nałožk, w dojutrownym času jejka debić. Tutej rjanej tradiciji wěnowaše so krótko do jutrow popołdnjo za swójby w pěstowarni „Raj palčikow“, kotraž je w nošerstwje Miłočanskeho Křesćansko-socialneho kubłanskeho skutka. Zhromadnje su starši a jich dźěći serbske jutrowne jejka debili. Z wjele sćerpliwosću, kreatiwitu a wjeselom nastachu při tym mnohe wuměłske unikaty.
Wosebity dźak słuša Dianje Mejnowej, projektowej sobudźěłaćerce Radworskeho serbskeho experiMINT campusa, kaž tež Raphaeli Wićazowej, rěčnej motiwatorce projekta Zari, kotraž skutkuje mjez druhim w Rakecach. Dźakowano jeju nazornym wujasnjenjam dóstachu wopytowarjo mnohe informacije wo nastaću a wuznamje serbskich jutrownych tradicijow. Nimo toho posrědkowaštej symboliku wuměłskich mustrow na jejkach, rozłožichu wuznam kmótřiskich jejkow a nawjazachu zwisk k serbskej rěči.
Twarske dźěła přestorčene
Radwor. Poprawom mějachu so dźensa wobšěrne dróhotwarske dźěła w Radworju zahajić. Kaž Budyski krajnoradny zarjad zdźěli, pak bu wutwar dróhi dr. Marje Grólmusec wot nawsy hač ke kromje wsy do směra na Chelno přestorčeny. Přičina su ćeže při dodawanju trěbnych twaršćiznow. Nowy termin je nětko 4. meja. Hač so z tym tež wotzamknjenje twarskich dźěłow přesunje, štož bě dotal srjedź oktobra předwidźane, krajnoradny zarjad zdźělił njeje.
Informuja wo jutrach
Pančicy-Kukow. „Jutry w Serbach“ je titul noweje multimedialneje wustajeńcy w komunikaciskej arenje w Pančicach-Kukowje. Krótko do jutrow su mału přehladku zestajeli. Tam wustajeja mjez druhim křižerski grat a seklu. Widejofilm skedźbnja na film „Křižerki“. Dale su někotre dźěła rězbarja Alojsa Šołty ze Žuric wustajene. Přehladka je we witrinach wjetšeho z dweju pawiljonow widźeć.
Na dźeń wotewrjenych duri
Nowe ławki na torhošću
Při Wojerowskej radnicy móžeš so posydnyć a so nad kwětkami wjeselić
Wojerecy (SN/MWj). Wot spočatka apryla přeprošuja na torhošću před Wojerowskej radnicu nowe ławki w kombinaciji ze sudobjemi za rostliny k posydnjenju. Nowe elementy bě město hižo loni nazymu wobstarało. Tehdy su je tež w měsće nastajili. W zymskich měsacach pak so zaso z měšćanskeho wobraza zminychu. Nětko su je znowa nastajili a prěni raz z kwětkami wosadźeli, kaž měšćanske zarjadnistwo zdźěli. „Kombinacija móžnosće za posydnjenje z kwětkacym sudobjom stara so w starym měsće wo wjace barby a zdobom wo wjace žiwjenja. Runje spočatk nalěća a w dnjach wokoło jutrow nowe ławki flair stareho města wožiwjeja“, w zdźělence města rěka.
Hudźba z regionalneje produkcije
Budyšin (SN/bn). Pjeć stacijow wopřijimaše tura po zwukowych studijach Hornjej Łužicy, kotruž bě iniciatiwa seś – nowa serbska muzika zeleny štwórtk prěni raz zarjadowała. Zaměr projekta je, „akter(k)am regiona dohlad do rozdźělneho wašnja dźěła a hudźbnych kontekstow we wobłuku serbskeje hudźbneje produkcije posrědkować a profesionelnu wuměnu šěrić“, w oficialnym wopisowanju rěka. Hłowny organizator tury je Labor za multisensorisku kreatiwitu Ectoplastic, kiž je mjez druhim za projekt „Drasta digital“ znaty. Za studijowu turu zaruči sej podpěru centralneho spěchowarja hudźby Zwjazka „Iniciatiwa hudźba“ kaž tež Běrowa za popkulturu a hudźbu Krajneho zwjazka kulturneho a kreatiwneho hospodarstwa Sakskeje.
W kopaće połnej Róžeńčanskej hnadownej cyrkwi su so wčera ...
Krótkopowěsće (08.04.26)
Dawki na diesel znižić
Drježdźany. Hladajo na tuchwilu wysoke płaćizny ćěriwa žada sej Sakski zwjazk rjemjesła, zo politiscy zamołwići dawki na diesel za přemysłownikow zniža. „Tuchwilne wysoke kóšty za njón produkty a posłužby masiwnje podróša. Dotalne naprawy zwjazkoweho knježerstwa njedosahaja“, prezident Sakskeho zwjazka rjemjesła Uwe Nostitz podšmórny.
Nowe škitne pasmo
Zhorjelc. Jako škit před afriskej swinjacej mrětwu je Sakska krajna direkcija nowe zawrjene pasmo w Zhorjelskim wokrjesu postajiła. Po tym zo běchu na Limasu 31. měrca zahinjene dźiwje swinjo našli, su nětko dźesać kilometrow šěroke pasmo zarjadowali. Tole je pasmo I, dalše pasmo II saha hač na pólsku mjezu. W potrjechenych kónčinach nětko hižo dźiwje swinje třěleć njesmědźa.
Češa wobmjezuja płaćiznu ćěriwow
