Wojerecy (KD/SN). Hižo dlěši čas we Wojerowskim zwěrjencu wo tym rozmysluja, kak móhli hladarjam zwěrjatow tam dźěło wolóžić. Wilu při zwjazkowej dróze B 97 zwěrjenc nětko na nowy hospodarski dwór přetwarja. Čłonam Towarstwa přećelow zwěrjenca, kotrež swjeći lětsa swoje 35lětne wobstaće, su njedawno twarnišćo pokazali a rozłožili, što tam nastawa.

Swoju wonkownu fasadu z klinkerami ma wjace hač sto lět stare twarjenje tež w přichodźe wobchować. Nutřka pak wutwarja nimo třoch běrowow moderne předrasćernje a sanitarne rumnosće, nawoda zwěrjenca Eugene Bruins znazorni. W jednym z běrowow změje Helmar Pohle,­ kotryž je za wšu picu zamołwity, swoje dźěłowe městno. Po jeho słowach zarjaduja w pódlanskich twarjenjach přihotowansku kuchnju za picu, hdźež matej tež wulki mróžak za rybu a wjacore kwadratne metry wulki chłódźak za sad a zeleninu stać. Wopytowarjo móža pozdźišo z wulkim woknom wobkedźbować, kak sobudźěłaćerjo picu za jednotliwe zwěrjata přihotuja. Dale zarjaduja skład za pšeńcu, ječmjeń a wšelake pelety.

Puć wot kružneho wobchada pola Serbskich Pazlic přez Miłoćicy hač k S 100 po dlěje hač dźesać lět trajacym planowanju nětko skónčnje wutwarić započnu. Kaž Budyski wokrjes zdźěli, je prěni twarski wotrězk zahajeny. Wón wopřija 640 metrow dołhi dźěl dróhi wot S 100 hač k wotbóčce Lindach. Tam nastawa kolesowanski pućik. Po tym dóstanje dróha nowu asfaltowu worštu. Za čas twarskich dźěłow je puć połojčnje zawrjeny, wobchad rjaduja z amplu. Druhi wotrězk powjedźe wot Miłoćic hač ke kružnemu wobchadej, třeći wopřijima puć přez Miłoćicy. Konkretne terminy za tutej wotrězkaj hišće znate njejsu. Foto: Mila Dźisławkec

Gmejnska biblioteka w Hodźiju je wjace hač jenož městno, hdźež móžeš sej knihi wupožčeć. Tam je dosć poskitkow za dźěći a dorosćenych, so do stawiznow zanurjeć, sej mnoho noweho wotkrywać a zhromadnje rjany čas přežiwić. W knihowni maja wulki wuběr serbskich publikacijow wšelakich žanrow, kotryž k tomu přinošuje, wužiwarjam serbsku rěč a literaturu zbližić. Na foće staj Taya Bloom Wager a Martin Thomas zhromadnje z Heidrun Schieber (wotlěwa) z gmejnskeje biblioteki widźeć. Na połnych knižnych polcach so mnohostronskosć knihownje a prezenca rěčow regiona, němčiny a serbšćiny, wotbłyšćuje. Foto: SN/Bojan Benić

Sakski etat dale njejasny

Drježdźany. Ćahańca wo etat Sakskeje za 2027/2028 dźe dale: Předsyda frakcije CDU w krajnym sejmje, Christian Hartmann, informowaše wčera na nowinarskej konferency, zo njeje so mjeńšinowa koalicija CDU/SPD dotal ani z BSW ani ze Zelenymi a Lěwicu wo naćisku za přichodny krajny etat dojednała. Ručež nowe­ trochowanje dochodow zwjazkoweho kraja z dawkow předleži, chcedźa tole nachwatać.

Zwjazkowa wobora zwučuje

Wuskidź. Na wojerskim zwučowanišću w Hornjej Łužicy chce Zwjazkowa wobora jutře za tydźeń za „chutny pad“ trenować. W scenariju, kotryž zdźěla zjawnje prezentuja, simuluja ćežke nje­zbožo ze železnicu za čas transporta wojakow zwjazkoweje wobory na wuchodnu mjezu NATO. Na zwučowanju so mjez druhim policija a wohnjowe wobory wobdźěla.

Mjenje lěkarskich terminow