Wobšěrne twarske dźěła w třećim Božim domje wosady zakónčili

Radwor (MkWj/SN). We wobłuku swjedźenskeho nyšpora su wěriwi Radworskeje katolskeje wosady wčera ponowjenu Křižnu cyrkej na kěrchowje poswje­ćili. Z Drježdźan bě za to biskopski administrator Andreas Kutschke přichwatał. Wón po wotstupje dotalneho Drježdźansko-Mišnjanskeho biskopa Heinricha Timmereveresa biskopstwo tuchwilu nawjeduje. Na swojim patronatnym swjedźenju podachu so wěriwi w procesionje z družkami na kěrchow. W ponowjenym Božim domje dźakowaše so wosadny farar Beno Jakubaš wšěm rjemjeslniskim zawodam, pomocnikam a darićelam, kotřiž su ponowjenju dopomhali. Wosebje dźakowaše so wón architektej Pětrej Kubankej z Bronja, kotryž bě dźěła organizował, wotběhi rjadował a při tym tójšto problemow rozrisał.

Křižna cyrkej słuži Radworskej wo­sadźe w prěnim rjedźe jako ćěłownja na kěrchowje. Po cyrkwinskim archiwje eksistuje wona z lěta 1397. Swoju dźens­nišu formu je cyrkej po wobšěrnym přetwarje w lěće 1888 dóstała.

Radwor (StŠ/SN). Hižo třeći raz bě towarstwo Cyrila a Metoda (TCM) běharki a běharjow sobotu, na dnju jednoty Němskeje, do Radworja přeprosyło. Mjeztym je běh wo pokal zbóžneho Alojsa wjace hač wólnočasne serbske katolske wubědźowanje. „Mějachmy nimo serbskich wobdźělnikow tež ludźi, kotřiž su z Pirny, Žitawy abo tež z Huskeje k nam dojěli a so sobu wubědźowali. Tež hdyž njeje to prěnjotny wotmysł, wjeselimy so wězo, hdyž naš běh tež druhich sportowcow z regiona přićehnje“, wjeseli so předsyda TCM Cyril Hančik nad wobdźělenjom.

Dohromady 144 wobdźělnikow bě sobotu po Radworju běžało. Na šěsć wšelako dołhi čarach, wot 500 metrow hač do 6000 metrow, so dźěći kaž tež dorosćeni wubědźowachu. „Wjedro běše krasne nazymske, nalada mjez wobdźělnikami bě wulkotna a fairna a přihladowarjo podłu čary pohonjowachu woprawdźe wšitkich. To běše wulkotne zarjadowanje – sportowje, ale tež z wida ekumeny“, Hančik z pokazom na dobyće serbskeje ewangelskeje fararki Jadwigi Malinkoweje w starobnej klasy žonow nad 40 lětami, ze posměwkom zjima.

Kamjenc (SN). Towarstwo přećelow a spěchowarjow muzeja Zapadneje Łužicy w Kamjencu je z wulkim zadźiwanjom, wustróženjom a starosću na ideju Budyskeho wokrjesneho sejmika dźensa tydźenja reagowało: Nošerstwo maja hač do 31.12.2027 wotedać. Hladajo na rozsud mějachu wjacore prašenja. Wotpowědny list z prašenjemi je towarstwo nětko krajnemu radu Budyskeho wokrjesa Udo Witschasej (CDU) a radźićelam wokrjesneho sejmika pósłało.

Wot 2025 do 2027 njeje muzej 1,1 milionow eurow wot wokrjesa dóstał, ale 800 000 eurow. Ličby přirjadnica krajnoradneho zarjada Budyskeho wokrjesa dr. Romy Reinisch poprawom znaje, z lista towarstwa wuchadźa. Minjenu póndźelu dóstachu radźićeljo zdobom informaciju, zo dyrbi wokrjes za saněrowanje muzeja 15 do 20 milionow eurow nałožić. Studije, kotrež su zamołwići do nadawka dali, pak cyle hinaše sumy mjenuja. Tak towarstwo twjerdźi. Tam trochuja šěsć do sydom milionow eurow. Prawdźepodobnje předležachu wokrjesnemu sejmikej wopačne ličby. Towarstwo wobžaruje, zo njejsu ze zamołwitymi muzeja rěčeli.

Studija prašenja wujewiła

Kamjenc. W Budyskim wokrjesnym sejmiku předstajena MEDIQON-analyza dźensa tydźenja wo přichodźe zastaranja z chorownjemi w Budyskim wokrjesu, je w zjawnym rozprawnistwje tež prašenja wo wobjimje přichodnych wukonow chorownje swj. Jana Kamjenc wujewiła. Nawodnistwo chorownje chce so tuž jutře w nowinarskej rozmołwje k wuslědkam analyzy wuprajić.

Wuspěšne slědźenja

Choćebuz. Slědźerjo Braniborskeje Techniskeje uniwersity Choćebuz-Zły Komorow su snano wulki wuspěch hladajo na slědźenje raka pola dźěći docpěli. A to nastupajo lěkowanje wosebiteho tumora Rhabdorsarkom. Specielny mechanizm w zwisku z redukowanjom mnóstwa wěsteho proteina su wědomostnicy wuspěšnje pola myšow testowali. Nětko ma mechanizm klasisku terapiju wudospołnić.

Žadaja sej zachowanje zastaranja