Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (67)

W raju zwěrjatow eksistuje wjele wšelakich přičinow a formow bolosćow kosćow a zhibadłow. Čłowjekej znate su ­bolosće, kotrež nastawaja přez artrozu. Artroza nastawa w zhibadłach, hdyž so chrymst (Knorpel) mjez zhibadłami wottwarja a so škropawy stawa. Chrymst pak funguje kaž zawk za kósć, kiž wšelke mocy wotpopaduje a funkciju zhibadła zaruča. Bywa chrymst přeco ćeńši, njeje kósć hižo wjace tak derje škitana. W najhóršim padźe je chrymst dospołnje wottwarjeny, a při pohibje zhibadła kósć na kosći šudruje.

Wosebje z přiběracej starobu stanje so chrymst mjenje stabilny a so spěšnišo wottwarja, hač pola młodeho zwěrjeća. Tež nadwaha abo přesylne napinanja kaž tež přemało pohiba dopomhaja k tomu, zo stanje so chrymst ćeńši. Dale zawinuja chorosće, operacije abo přinarodźene defekty, zo so artroza spěšnje wuwiwa.